ဢိင်ၼိူဝ် ပၢင်တိုၵ်း ၸုမ်းဢူၺ်းလီပွတ်းႁွင်ႇ တင်း သိုၵ်း RCSS ပဵၼ်ပၢင်တိုၵ်းၵၼ်သေ ၵူၼ်းမၢၼ်ႈလီႈ 12 ၵေႃႉ လႆႈႁၢႆ တူဝ်ၵႂႃႇ ထိုင်မႃးႁၢင်လိူၼ်မၢတ်ႉၶျ်ၼၼ်ႉ ၾၢႆႇ RCSS ပွႆႇတူဝ်ပၼ်ၶိုၼ်းၵူၼ်းမၢၼ်ႈလီႈ 8 ၵေႃႉ ဝႃႈၼႆ။
ဝၼ်းတီႈ 29/03/2019 ယူႇတီႈလုမ်းၵပ်းသၢၼ် RCSS တီႈဝဵင်းၵျွၵ်ႉမႄးသေ လႆႈသူင်ႇမွပ်ႈပၼ် ၵူၼ်းမၢၼ်ႈလီႈ တီႈလုမ်း ပႃႇတီႇႁူဝ်သိူဝ် ၸႄႈဝဵင်းသီႇပေႃႉ။ ယူႇတီႈပႃႇတီႇႁူဝ်သိူဝ်ၸႄႈဝဵင်းသီႇပေႃႉ လႆႈႁပ်ႉဢဝ် ၵူၼ်းမၢၼ်ႈလီႈ 8 ၵေႃႉသေ သူင်ႇပွၵ်ႈၸူးႁိူၼ်းၶိုၼ်း။
ၸၢႆးလၢဝ်သႅင် ၽူႈၼမ်းၼႂ်းပႃႇတီႇႁူဝ်သိူဝ် ၸႄႈဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်းမၢၼ်ႈလီႈ 8 ၵေႃႉတႄႉ ယူႇ တီႈ RCSS ပွႆႇတူဝ် ဢၢပ်ႈပၼ်မႃးတီႈလုမ်းပႃႇတီႇႁဝ်းယဝ်ႉၶႃႈ။ ၵိုတ်းထႅင်ႈ 4 ၵေႃႉၼၼ်ႉ ႁဝ်းၶႃႈ ထၢမ်တီႈၵူၼ်းမၢၼ်ႈလီႈ 8 ၵေႃႉ ဢၼ်ၶဝ်လွတ်ႈဢွၵ်ႇမႃးၼၼ်ႉ ၶဝ်လၢတ်ႈဝႃႈ ဢၼ်ၶဝ်ၺႃးၺွပ်းၵႂႃႇ ၼၼ်ႉ 8 ၵေႃႉၵူၺ်း။ ၵိုတ်းထႅင်ႈ 4 ၵေႃႉ ၼၼ်ႉ ၶၢဝ်ႇငၢဝ်းသင်ၵေႃႈ ဢမ်ႇလႆႈငိၼ်း၊ မိူဝ်ႈၽွင်းတီႉ ၺွပ်းၵႂႃႇၼၼ်ႉ ဢမ်ႇလႆႈႁၼ်ပႃးတီႉၵႂႃႇ ၸွမ်း ပဵၼ်ၶဝ် 8 ၵေႃႉ ၵူၺ်း ၶဝ်တႄႉ ဝႃႈၼႄၼင်ႇၼႆ” ဝႃႈၼႆ။
သိုပ်ႇလၢတ်ႈဝႃႈ “ ၵူၼ်းမၢၼ်ႈလီႈ 8 ၵေႃႉ မႃးႁွတ်ႈၽႅဝ်တီႈလုမ်း ပႃႇတီႇႁူဝ်သိူဝ်ၼႆႉ ၸူမ်းတႄႉဢေႃႈ။ ႁဝ်းၶႃႈၸွႆႈၶပ်းၶိုင် ပၼ်တႃႇၶဝ် ပွၵ်ႈမိူဝ်းၶိုၼ်းႁိူၼ်းယေးၽႂ်မၼ်းဢေႃႈ။ ထႅင်ႈလွင်ႈၼိုင်ႈၵေႃႈ ႁဝ်းၶႃႈ သပ်းလႅင်းၼႄ တုၵ်းယွၼ်း တီႈ ပႃႇတီႇတဢၢင်း TNP ၶဝ်ဝႃႈ ၵူၼ်းၸၢဝ်းတႆးႁဝ်း ဢၼ်တပ်ႉသိုၵ်းတဢၢင်းတီႉၺွပ်းၵႂႃႇ ႁၢႆၵႂႃႇၼၼ်ႉ ယူႇတီႇပႃႇတီႇ TNP သေ ႁႂ်ႈၸွႆႈၵပ်းသိုပ်ႇ ၵပ်းသၢၼ်ပၼ် ငူပ်ႉငီႉပၼ်” ဝႃႈၼႆ။
တႃႇၵူၼ်း 8 ၵေႃႉ တေလႆႈပွၵ်ႈၶိုၼ်းမႃးၼၼ်ႉ ၾၢႆႇပႃႇတီႇတဢၢင်း TNP လႆႈတႅမ်ႈလိၵ်ႈယိုၼ်ႈသူင်ႇပၼ်ပႃႇတီႇႁူဝ်သိူဝ် ၸႄႈဝဵင်းသီႇပေႃႉ ႁႂ်ႈၸွႆႈၶပ်းၶိုင် ငူပ်ႉငီႉပၼ် ယူႇတီႈပႃႇတီႇႁူဝ်သိူဝ်ၶဝ်ႈၵၢင်ၶပ်းၶိုင်ပၼ်လႄႈ ၸင်ႇလွတ်ႈမႃး။
မိူဝ်ႈဝၼ်းတီႈ 17/03/2019 ယၢမ်းၵၢင်ၼႂ် 9 မူင်း ထိုင် 12 မူင်း ၸၢဝ်းတဢၢင်း ႁိမ်း 300 ၵေႃႉ ႁူမ်ႈၵၼ်ၼႄၵၢင်ၸႂ် တီႈဝဵင်း လႃႈသဵဝ်ႈသေ တုၵ်းယွၼ်း ထိုင် RCSS ႁႂ်ႈပွႆႇပၼ်ၵူၼ်းၸၢဝ်းလွႆ ဢၼ်တီႉၺွပ်းၵူၼ်းၸၢဝ်းလွႆ (တဢၢင်း) ၵႂႃႇ ဝႃႈၼႆ။
ၵူၼ်းမၢၼ်ႈလီႈ 12 ၵေႃႉ ႁၢႆတူဝ်ၵႂႃႇ မိူဝ်ႈဝၼ်းတီႈ 01/03/2019 ပဵၼ်ၽွင်း သိုၵ်းဢူၺ်းလီပွတ်းႁွင်ႇ တင်း သိုၵ်း RCSS ပဵၼ်ပၢင်တိုၵ်းၵၼ် ၼႂ်းၸႄႈဝဵင်းသီႇပေႃႉ တင်း ၼမ်ႉတူႈ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ