ၸၢဝ်းလွႆ တဢၢင်း ၼႂ်းၸိုင်ႈတႆးပွတ်းႁွင်ႇ ႁိမ်း 300 ၵေႃႉ ၼႄး RCSS/SSA တီႉၺွပ်းၵူၼ်းမၢၼ်ႈလီႈ ၸႄႈဝဵင်း ၼမ်ႉတူႈၼႆသေ ႁူမ်ႈၵၼ်ၼႄၵၢင်ၸႂ်တုၵ်းယွၼ်း ႁႂ်ႈပွႆႇပၼ်ၶိုၼ်းၵူၼ်းဝၢၼ်ႈ မၢၼ်ႈလီႈ 12 ၵေႃႉ ဝႃႈၼႆ။
ဝၼ်းတီႈ 17/03/2019 ယၢမ်းၵၢင်ၼႂ် 9 မူင်း ထိုင် 12 မူင်း ၸၢဝ်းတဢၢင်း ႁိမ်း 300 ၵေႃႉ ႁူမ်ႈၵၼ် တီႈႁိမ်းႁူင်း ႁေႃဝဵင်းလႃႈသဵဝ်ႈသေ ၼႄၵၢင်ၸႂ်ပႆထိုင် ဝၢင်းပိတ်ႉမၢၵ်ႇၼင် လႃႈသဵဝ်ႈလူင်။ တုၵ်းယွၼ်း ထိုင် RCSS လၢႆ ၶေႃႈ။
ၸဝ်ႈသိုၵ်းလူင် ၸၢႆးငိုၼ်း ၽူႈၼမ်းၼႂ်း မၢႆ 2 RCSS/SSA လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈၵေႃႈ တိုၵ်ႉထတ်း သၢင်တူၺ်းယူႇ ဝႃႈၸႂ်ႈဢမ်ႇၸႂ်ႈ လွင်ႈၼႆႉ ႁဝ်းၶႃႈ ပႆႇၸၢင်ႈယိုၼ်ယၼ် ၵူၺ်းၵႃႈ ပဵၼ်ႁိုဝ်ၵေႃႈလီ ဢၼ်ၼႆႉ ပေႃး ဢဝ်ပိူင်ႁဝ်းဝႃႈတႄႉ ဢၼ်ဝႃႈၵႂႃႇၺွပ်းၵူၼ်းဝၢၼ်ႈၵူၼ်းမိူင်း ၸိူဝ်းၼႆႉ ပိူင်ႁဝ်း ဢမ်ႇမီး။ ဢၼ်ႁဝ်းၶႂ်ႈဝႃႈ တႄႉ ပဵၼ်ႁိုဝ်ၵေႃႈလီ ႁဝ်းလူဝ်ႇၸႂ်ႉလၢႆးဢုပ်ႇဢူဝ်း ၵႄႈၶႆ ၼွၵ်ႈလႅၵ်ႈမၼ်း မီးသင်ၵေႃႈယဝ်ႉ ၵွပ်ႈပိူဝ်ႈႁဝ်းပဵၼ် ၵူၼ်း မိူင်းလဵဝ်ၵၼ် ၵႂၢမ်းႁဝ်းၵေႃႈပွင်ႇၵၼ်၊ ႁဝ်းၶႃႈ ၸႂ်ႉလၢႆးဢုပ်ႇဢူဝ်းၵၼ် မၼ်းပဵၼ်ႁိုဝ်တႄႉတႄႉ ၸွင်ႇၸႂ်ႈဢမ်ႇ ၸႂ်ႈ မၼ်းပဵၼ်ႁိုဝ် ႁဝ်းမႃးငီႉ ၵၼ်လီလီ။ ပေႃးႁဵတ်းၸိူင်ႉၼႆတႄႉ မၼ်းတေၵႄႈလႆႈ၊ ၸဵဝ်းယဝ်ႉ။ ပေႃးတေမႃး ၼႄၵၢင်ၸႂ် ၸိူင်ႉၼႆ ၼႆႉ ၸႂ်ႈတႄႉဢမ်ႇၸႂ်ႈတႄႉ ၽႂ်ၵေႃႈဢမ်ႇႁူႉ မၼ်းပဵၼ် ၾၢႆႇလဵဝ်ၵူၺ်း ပေႃးၸိူင်ႉၼႆ ပၼ် ႁႃမၼ်းၵေႃႈ ၸၢင်ႈယႂ်ႇမႃးထႅင်ႈ” ဝႃႈၼႆ။
သိုပ်ႇလၢတ်ႈဝႃႈ “ ယူႇတီႈတၢင်းၾၢႆႇႁဝ်းတႄႉ ၶႂ်ႈလၢတ်ႈဝႃႈ ပၼ်ႁႃမဵဝ်းၼႆႉ ပဵၼ်ႁိုဝ်ၵေႃႈလီ ႁဝ်းၸႂ်ႉလၢႆးၵတ်း ယဵၼ်သေ ၵႄႈၶႆဢုပ်ႇဢူဝ်းငူပ်ႉငီႉၵၼ်တူၺ်း ႁဝ်းႁူမ်ႈၵၼ်ထတ်းတူၺ်း။ ဢၼ်ၶဝ်လၢတ်ႈၼၼ်ႉ ၸႂ်ႈတႄႉယူႇ ႁႃႉ ၶဝ်မီးသၢၵ်ႈသေႇလၵ်းထၢၼ်ၸိူင်ႉႁိုဝ်။ ၵူၼ်းမိူင်းၾၢႆႇတၢင်းႁဝ်းၶႃႈၵေႃႈၺႃးတီႉၺွပ်းၵႂႃႇၵေႃႈမီးၼမ်။ ၵွပ်ႈ ၼၼ်လႄႈ ၸႂ်ႉတႄႉ ဢမ်ႇၸႂ်ႈတႄႉ ၽႂ်ၽိတ်းၽႂ်ထုၵ်ႇ ႁဝ်းမႃးၸႂ်ႉလၢႆးၸိူင်ႉၼႆသေ ငူပ်ႉငီႉၵၼ် ဢုပ်ႇဢူဝ်းႁႃ လၢႆၵႄႈလိတ်ႈၵၼ်။ တွၼ်ႈႁဝ်းၶႃႈတႄႉ ၶႂ်ႈလၢတ်ႈၸိူင်ႉၼႆ” ဝႃႈၼႆ။
ၽူႈၼႄၵၢင်ၸႂ် ၵေႃႈၼိုင်ႈလၢတ်ႈဝႃႈ “ တပ်ႉသိုၵ်း RCSS လႄႈ TNLA ပဵၼ်ပၢင်တိုၵ်းၵၼ် တင်ႈတႄႇ လိူၼ် ၾႅပ်ႊၿိဝ်ႊရီႊ ဝၼ်းတီႈ 26 တေႃႇ လိူၼ်မၢတ်ႊၶျ် ဝၼ်းတီႈ 3 ၼႂ်းၸႄႈဝဵင်းၼမ်ႉတူႈ။ ၵူၼ်းဝၢၼ်ႈ မၢၼ်ႈလီႈ12 ၵေႃႉ ၺႃးတီႉၺွပ်းၵႂႃႇ မိူဝ်ႈဝၼ်းတီႈ1 လိူၼ်မၢတ်ႊၶျ်။ ယုမ်ႇယမ်ဝႃႈ RCSS တီႉၺွပ်းၵႂႃႇၵူၼ်းဝၢၼ်ႈၸိူဝ်း ၼၼ်ႉ” ဝႃႈၼႆ။
ပၢင်ၼႄၵၢင်ၸႂ်ၼႆႉ ဢွၼ်ၵၼ်ႁွင်ႉပၢဝ်ႇဝႃႈ ႁႂ်ႈ RCSS ပွႆႇပၼ်ၶိုၼ်း ၵူၼ်းဝၢၼ်ႈမၢၼ်ႈလီႈ12 ၵေႃႉလႄႈ ၵူၼ်း မိူင်း ၸိူဝ်းၺႃးတီႉၺွပ်းၵႂႃႇၼၼ်ႉ ဝႆးဝႆး၊ ႁႂ်ႈဝႆႉၸႂ်ဢေးလူၵူၼ်းတေႃႇၵူၼ်း ၼိူဝ်ၸၢဝ်းၶိူဝ်းၼင်ႇၵၼ် ဢၼ် ႁႃ ၵိၼ်လဵင်ႉ တွင်ႉယူႇ သိုဝ်ႈသိုဝ်ႈယူဝ်းယူဝ်း၊ ႁႂ်ႈၵိုတ်းပၢင်တိုၵ်းၼႂ်းဝၢၼ်ႈ၊ ႁႂ်ႈၵိုတ်းလွင်ႈ ဢဝ်ၵူၼ်းဝၢၼ်ႈပဵၼ် ယိူဝ်ႇ သိုၵ်း၊ ႁႂ်ႈၸုမ်းယိပ်းၵွင်ႈၵၢင်ႇၸၢဝ်းၶိူဝ်းတင်းသဵင်ႈ ၵိုတ်းလွင်ႈပူၼ်ႉပႅၼ်သုၼ်ႇလႆႈၵူၼ်း ၼိူဝ်ၵူၼ်းဝၢၼ်ႈ ၵူၼ်းမိူင်း ၸဵမ်ၸိူဝ်းၼႆႉ။
ပၼ်ႁႃပၢင်တိုၵ်းသိုၵ်းသိူဝ်ၼႂ်းမိူင်းတႆးပွတ်းႁွင်ႇၼႆႉ ၸိူင်ႉၼင်ႇၸၢဝ်းလွႆ ၼႄး RCSS တီႉၵူၼ်းဝၢၼ်ႈၼၼ်ႉ ၸၢဝ်းၶိူဝ်း ၶူဝ်လူင်လီႉသေႃးသမ်ႉၼႄး ဝႃႈသိုၵ်းလွႆ TNLA တီႉၵူၼ်းဝၢၼ်ႈၵႂႃႇ 8 ၵေႃႉ တဵၵ်းၸႂ်ႉႁႂ်ႈဢဝ်ငိုၼ်း ၵႂႃႇထုတ်ႇဢဝ်ၶိုၼ်း 1 ၵေႃႉ လႂ် 30 သႅၼ်။ လိူဝ်ၼၼ်ႉ ၵူၼ်းမိူင်းၵူတ်ႉၶၢႆၵေႃႈ ၼႄးဝႃႈ သိုၵ်းၶၢင် KIA တီႉဢဝ် ၵူၼ်းႁဵတ်းသူၼ်ၵႂႃႇ 47 ၵေႃႉ ၼၼ်ႉၵေႃႈ ၵူၼ်းမိူင်းတုၵ်းယွၼ်းႁႂ်ႈပွႆႇပၼ်ၶိုၼ်း။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ