ၸုမ်းတူင့်ၼိုင်တူင်ႇဝူင်းတႆး ႁူမ်ႈၵၼ် ပိုတ်ႇပၢင်သွၼ်လိၵ်ႈတႆး ၶၢဝ်းမႆႈ တႃႇၶၢဝ်းတၢင်း 45 ဝၼ်း ပၼ်လုၵ်ႈဢွၼ်ႇတႆး ၼႂ်း ၵဵင်းမႆႇ မိူင်းထႆးတွၼ်ႈၼိူဝ် ပွၵ်ႈၵမ်းႁႅၵ်ႈ ဝႃႈၼႆ။
မိူဝ်ႈၼႆ့ ဝၼ်းတီႈ 01/04/2019 ယၢမ်းၵၢင်ၼႂ် 8 မူင်း ယူႇတီႈၵေႃႁူမ်ႈသၢင်ႈၸိူဝ့်ၸၢတ်ႈတႆး ဢွၼ်ႁူဝ်သေ တႄႇပိုတ်ႇပၢင် သွၼ်လိၵ်ႈ တႆးၶၢဝ်းမႆႈ တီႈဝတ်ႉလွၼ်းၸၼ် ဢိူင်ႇတႃႈသႃလႃး ၸႄႈတွၼ်ႈၵဵင်းမႆႇ ၸိုင်ႈထႆး။
ၸၢႆးသၢႆဝၼ်း ၽူႈၼင်ႈၸိုင်ႈ ၵေႃႁူမ်ႈသၢင်ႈၸိူဝ့်ၸၢတ်ႈတႆး လၢတ်ႈတီႈၽူႈတွႆႇႁွၵ်ႈဝႃႈ “ ဢၼ်ႁဝ်းၶႃႈ ပိုတ်ႇပၢင်သွၼ် လိၵ်ႈတႆး ပၼ်လုၵ်ႈ ဢွၼ်ႇႁဝ်းၶႃႈၼႆႉ ပိူင်လူင်မၼ်း ႁႂ်ႈလုၵ်ႈဢွၼ်ႇႁဝ်းႁူႉလိၵ်ႈႁဝ်း၊ ပေႃးႁူႉလိၵ်ႈႁဝ်းယဝ်ႉၵေႃႈ ၵႂၢမ်းတႆး ႁဝ်းၵေႃႈ တေဢမ်ႇလိုမ်းၵၼ်။ ယဝ်ႉ ၵေႃႈ ႁႂ်ႈၶဝ်ႁူႉၸၵ်းပိုၼ်းၸဝ်ႈၵဝ်ႇ၊ ၼင်ႇႁိုဝ် ၶဝ်တေၶိုၼ်းပဵၼ်ၽူႈဢွၼ်ႁူဝ် ၼႂ်း ၸိူဝ်ႉၸၢတ်ႈ၊ တူင်ႇဝူင်းတႆးႁဝ်း တၢင်းၼႃႈၼၼ်ႉ ႁဝ်း မုင်ႈမွင်းဝႃႈ ၶဝ်ၸိူဝ်းၼႆႉ တေပဵၼ်ၽူႈ ဢွၼ်ႁူဝ်ၸိူဝ်ႉ ၸၢတ်ႈဝၢၼ်ႈမိူင်းႁဝ်းၶႃႈၵႂႃႇတၢင်းၼႃႈ” ဝႃႈၼႆ။
လုၵ်ႈဢွၼ်ႇတႆး ၸိူဝ်းၵႂႃႇပၼ်သဵၼ်ႈမၢႆဝႆႉ တႃႇၶိုၼ်ႈႁဵၼ်းသွၼ်လိၵ်ႈတႆး တီႈဝတ်ႉလွၼ်းၸၼ် ဢိူင်ႇတႃႈသႃလႃး ၸႄႈ တွၼ်ႈၵဵင်းမႆႇ ၸိုင်ႈထႆးၼၼ်ႉ တင်းမူတ်း ပၼ်သဵၼ်ႈမၢႆ 50 ပၢႆ ဝႃႈၼႆ။
ၸၢႆးသၢႆဝၼ်း လၢတ်ႈဝႃႈ “ မိူဝ်ႈၼႆႉပိုတ်ႇႁဵၼ်းပဵၼ်ဝၼ်းႁႅၵ်ႈၵေႃႈပိူင်ၼိုင်ႈ၊ လုၵ်ႈဢွၼ်ႇၸိူဝ်းၵႂႃႇပွႆးသၢင်ႇလွင်းၵေႃႈ ပိူင် ၼိုင်ႈသေ ပႆႇမႃးမူတ်း မိူဝ်ႈၼႆႉ မီး 30 ပၢႆ။ သဵၼ်ႈမၢႆဢၼ်မႃးပၼ်ဝႆႉတႄႉ 50 ပၢႆ။ ႁဝ်းၶႃႈ တေပိုတ်ႇပူင်သွၼ်ပၼ် တႃႇ 2 ၶၢဝ်း။ တွၼ်ႈၵၢင်ဝၼ်းၼႆႉ ႁဝ်းၶႃႈ တေပူင်သွၼ်ပၼ်လုၵ်ႈဢွၼ်ႇတႆးႁဝ်းတီႈဝတ်ႉလွၼ်းၸၼ်၊ တွၼ်ႈၵၢင်ၶမ်ႈသမ်ႉ တေ လူင်းပူင်သွၼ်ပၼ်ၼႂ်းၶႅမ်ႉ(ပၢင်သဝ်း) တီႈပီႈၼွင်ႉတႆး ၵၢၼ်ႈၵၼူၵ်ႇ 2 တီႈၵဵင်းမႆႇ တီႈၼၼ်ႈတႄႉ ၵမ်ႈၼမ်ပဵၼ် ၵူၼ်းလူင် ဢႃယုယႂ်ႇ” ဝႃႈၼႆ။
လိူဝ်ၼၼ်ႉ ၵဵပ်းငိုၼ်းၸႂ်ႉၸၢႆႇ ၵႃႈသွၼ်ႁဵၼ်း လုၵ်ႈႁဵၼ်းၼိုင်ႈၵေႃႉလႂ် 1,000 ဝၢတ်ႇ။ ငိုၼ်းၸိူဝ်းၼၼ်ႉ တေဢဝ်ၸႂ်ႉ ၸၢႆႇ မိူၼ်ၼင်ႇ ၵႃႈ ၶဝ်ႈၽၵ်းလဵင်ႉလူ လုၵ်ႈဢွၼ်ႇၵၢင်ဝၼ်း ၼိုင်ႈဝၼ်းၼိုင်ႈတႃႇ။ ၵႃႈပပ်ႉႁဵၼ်းၵမ်တႅမ်ႈ။ ၵႃႈတွပ်ႇတႅၼ်းငိုၼ်း လိူၼ်ၶူးသွၼ်။ ၵႃႈတွပ်ႇ တႅၼ်းၸဝ်ႈမိုဝ်ႉႁုင်ၵႅင် လဵင်ႉၶဝ်ႈၽၵ်း လုၵ်ႈဢွၼ်ႇႁဵၼ်း တႃႇၶၢဝ်းတၢင်း 45 ဝၼ်း။ ၶၢဝ်းယၢမ်းပူင်သွၼ်သမ်ႉ တႄႇ 8 မူင်းၵၢင်ၼႂ် ထိုင် 3 မူင်းဝၢႆးဝၼ်း။ ဝၼ်းၸၼ် ထိုင် ဝၼ်းသုၵ်း ဝႃႈၼႆ။
ၼွၵ်ႈလိူဝ်ၼၼ်ႉ တေၸတ်းႁဵတ်းပႃး ပွႆးလူင်းပၢင်သွၼ် တွၼ်ႈသူးၼမ်ႉၸႂ်လုၵ်ႈႁဵၼ်း ၽူႈၵတ်ႉၶႅၼ်ႇ ရၢင်းဝလ်းတီႈၼိုင်ႈ သွင်သၢမ်သီႇ ၸိူဝ်းၼႆႉ။
