ၸုမ်းတူင်ႉၼိုင်တူင်ႇဝူင်းတႆး ၼႂ်းၵဵင်းမႆႇ ဢုပ်ႇဢူဝ်းတႅပ်းတတ်းၵၼ် တေပူင်သွၼ်လိၵ်ႈတႆး ပၼ်လုၵ်ႈဢွၼ်ႇတႆး ၸိူဝ်းယူႇသဝ်းဝႆႉ ၼႂ်းၵဵင်းမႆႇ ၸိုင်ႈထႆး တေပူင်သွၼ်ပၼ်ၵႂႃႇတႃႇၶၢဝ်းတၢင်း ႁိမ်းၸမ် 2 လိူၼ် ဝႃႈၼႆ။

ဝၼ်းတီႈ 10/03/2019 ယၢမ်းၵၢင်ၼႂ် 9 မူင်းထိုင် 3 မူင်းဝၢႆးဝၼ်း ယူႇတီႈၵေႃႁူမ်ႈသၢင်ႈၸိူဝ်ႉၸၢတ်ႈတႆး ၸတ်းႁဵတ်း ပၢင်ၵုမ် ႁူဝ်ႁုပ်ႈပီ တီႈဝၢၼ်ႈၼွင်ၽိုင်ႈ ၸႄႈဝဵင်းသႃရၾီး ၸႄႈတွၼ်ႈၵဵင်းမႆႇ ၸိုင်ႈထႆး။ ဢုပ်ႇဢူဝ်းထတ်းသၢင် ၼႃႈၵၢၼ် ဢၼ်လႆႈတူင်ႉၼိုင်ႁဵတ်းသၢင်ႈမႃး ၶၢဝ်းတၢင်း 1 ပီလႄႈ လွင်ႈတၢမ်းဝၢင်းၽႅၼ်ၵၢၼ်တၢင်းၼႃႈ ၸဵမ်ၸိူဝ်း ၼႆႉ။

ၸၢႆးသၢႆဝၼ်း ၽူႈၼင်ႈၸိုင်ႈ ၵေႃႁူမ်ႈသၢင်ႈၸိူဝ်ႉၸၢတ်ႈတႆး ၵဵင်းမႆႇ လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈ ဢုပ်ႇဢူဝ်း ထတ်းသၢင်ၵၢၼ် ဢၼ်လႆႈႁဵတ်းသၢင်ႈမႃးၶၢဝ်းတၢင်းၼိုင်ႈပီလႄႈ လွင်ႈတမ်းဝၢင်းၼႃႈၵၢၼ်ၵႂႃႇတၢင်းၼႃႈ ၸိူဝ်းၼႆႉ။ ထႅင်ႈလွင်ႈၼိုင်ႈၵေႃႈ ဢုပ်ႇဢူဝ်းၵၼ် လွင်ႈတေပိုတ်ႇပၢင်သွၼ်လိၵ်ႈတႆး ၽွင်းၶၢဝ်းမႆႈၼႆႉ ယူႇတီႈၵေႃႁူမ်ႈသၢင်ႈႁဝ်း ၶႃႈသေ တေပိုတ်ႇပူင်သွၼ်ၵႂႃႇ။ ပီၼႆႉ တေပဵၼ်ၵမ်းႁႅၵ်း ဢွင်ႈတီႈတေပိုတ်ႇ ပဵၼ်တီႈဝတ်ႉလွၼ်း ၸၼ်” ဝႃႈၼႆ။

သိုပ်ႇလၢတ်ႈဝႃႈ“ၶႂ်ႈတိုၵ်းသူၼ်းထိုင်ဝႃႈ ပၢႆးပၺ်ၺႃဢၼ်ဝႃႈၼႆႉ မၼ်းပဵၼ်ၵၢၵ်ႇသေႃးႁူဝ်ၸႂ်တွၼ်ႈတႃႇၵူၼ်းၵူႈ ၵေႃႉ ယဝ်ႉ ပေႃးႁဝ်းၶႃႈ တူၵ်းလိုၼ်းပၢႆးပၺ်ၺႃၼႆ ပေႃးမႃးၼပ်ႉသၢင်ႈတႃႇတူဝ်ႁဝ်းၵေႃႈ တူၵ်းတႅမ်ႇသေဢမ်ႇၵႃး ၸိူဝ်ႉ ၸၢတ်ႈ၊ ၸိူဝ်ႉၶိူဝ်းလႄႈ ၽႃ သႃႁဝ်းၶႃႈၵေႃႈ တေၸၢင်ႈတူၵ်းတႅမ်ႇပႃး။ ၵွပ်ႈၼႆလႄႈ ၶႂ်ႈႁႂ်ႈပေႃႈမႄႈႁဝ်းၶႃႈ ဢဝ်လိၵ်ႈ လၢႆးၼႆႉ တိုၵ်းသူၼ်းပၼ်လုၵ်ႈ ဢွၼ်ႇႁဝ်းၶႃႈ ႁႂ်ႈၶတ်းၸႂ်ႁဵၼ်းႁူႉ ၼင်ႇႁိုဝ် ပေႃးတေဢမ်ႇလိုမ်းၽႃသႃ လိၵ်ႈလၢႆးႁဝ်း ၶႃႈလႄႈ ၸင်ႇတေပိုတ်ႇပၢင်သွၼ် လိၵ်ႈတႆးပၼ်ၶႃႈယဝ်ႉ။ ပေႃးလိၵ်ႈႁဝ်းၶိုၼ်ႈယႂ်ႇၵေႃႈ ဝၢၼ်ႈမိူင်းႁဝ်း ၵေႃႈတေၶိုၼ်ႈ ယႂ်ႇမႂ်ႇသုင် ႁိူဝ်ႈႁိူင်း” ဝႃႈၼႆ။

ၶေႃႈတႅပ်းတတ်း ၼႂ်းပၢင်ၵုမ် ၵေႃႁူမ်ႈသၢင်ႈၸိူဝ်ႉၸၢတ်ႈတႆးသမ်ႉ မိူၼ်ၼင်ႇ ပိုတ်ႇႁပ်ႉသဵၼ်ႈသၢႆမၢႆလုၵ်ႈႁဵၼ်း သွၼ် လိၵ်ႈတႆး – မၢၼ်ႈလႄႈ ဢင်းၵိတ်း ၼႂ်းဝၼ်းတီႈ 12 – 28/3/2019။ ပိုတ်ႇႁပ်ႉလုၵ်ႈႁဵၼ်းၵူႈၸၢဝ်းၶိူဝ်း တႄႇဢဝ် ဢႃယု 7 ၶူပ်ႇၶိုၼ်ႈၼိူဝ်။ ဝၼ်းတီႈ 31/03/2019 သမ်ႉ ပိုတ်ႇပၢင်သွၼ် ႁူပ်ႉထူပ်းပေႃႈမႄႈလုၵ်ႈႁဵၼ်းလႄႈ သူင်ႇလုၵ်ႈ ဢွၼ်ႇ ၶဝ်ႈႁဵၼ်း။ ဝၼ်းတီႈ 1/4/2019 တႄႇပိုတ်ႇပၢင်သွၼ်ၵႂႃႇ။ ပူင်သွၼ်ပၼ်လုၵ်ႈႁဵၼ်း ဝၼ်းၸၼ် ထိုင် ဝၼ်းသုၵ်း၊ ဝၼ်းသဝ်တင်း ဝၼ်းဢႃးတိတ်ႉ ဢိုတ်းယင်ႉ။ ပူင်သွၼ်ပၼ်လိၵ်ႈတႆး၊ လိၵ်ႈမၢၼ်ႈလႄႈ ဢင်းၵိတ်းတႃႇ ၶၢဝ်းတၢင်း 45 ဝၼ်း။

လိူဝ်ၼၼ်ႉ ၵဵပ်းငိုၼ်းၸႂ်ႉၸၢႆႇ ၵႃႈသွၼ်ႁဵၼ်း လုၵ်ႈႁဵၼ်းၼိုင်ႈၵေႃႉလႂ် 1,000 ဝၢတ်ႇ။ ငိုၼ်းၸိူဝ်းၼၼ်ႉ တေဢဝ်ၸႂ်ႉ ၸၢႆႇ မိူၼ်ၼင်ႇ ၵႃႈၶဝ်ႈၽၵ်းလဵင်ႉလူ လုၵ်ႈဢွၼ်ႇၵၢင်ဝၼ်း ၼိုင်ႈဝၼ်းၼိုင်ႈတႃႇ။ ၵႃႈပပ်ႉႁဵၼ်းၵမ်တႅမ်ႈ။ ၵႃႈတွပ်ႇ တႅၼ်းငိုၼ်းလိူၼ်ၶူးသွၼ်။ ၵႃႈတွပ်ႇတႅၼ်းၸဝ်ႈမိုဝ်ႉႁုင်ၵႅင် လဵင်ႉၶဝ်ႈၽၵ်း လုၵ်ႈဢွၼ်ႇႁဵၼ်း တႃႇၶၢဝ်းတၢင်း 45 ဝၼ်း ဝႃႈၼႆ။

ၼွၵ်ႈလိူဝ်ၼၼ်ႉ တေၸတ်းႁဵတ်းပႃး ပွႆးလူင်းပၢင်သွၼ် တွၼ်ႈသူးၼမ်ႉၸႂ်လုၵ်ႈႁဵၼ်း ၽူႈၵတ်ႉၶႅၼ်ႇ ရၢင်းဝလ်းတီႈ ၼိုင်ႈသွင်သၢမ်သီႇ ၸိူဝ်းၼႆႉ။ လိူဝ်ၼၼ်ႉ တေမီးထႅင်ႈ ၾၢႆႇၽူႈယိပ်းသဵၼ်ႈမၢႆငိုၼ်း။ ၽူႈယိပ်းသဵၼ်ႈသၢႆမၢႆလုၵ်ႈႁဵၼ်း ဢိၵ်ႇထႅင်ႈလၢႆလၢႆၶေႃႈ ဝႃႈၼႆ။

ဢွင်ႈတီႈပူင်သွၼ်လိၵ်ႈတႆး ၶၢဝ်းမႆႈၼႆႉ တေပိုတ်ႇပူင်သွၼ်ပၼ် တီႈဝတ်ႉလွၼ်းၸၼ် ဢိူင်ႇတႃႈသႃလႃး ၸႄႈ တွၼ်ႈၵဵင်းမႆႇ ၸိုင်ႈထႆး။ ၶၢဝ်းယၢမ်းပူင်သွၼ်သမ်ႉ တႄႇ 8 မူင်းၵၢင်ၼႂ် ထိုင် 3 မူင်းဝၢႆးဝၼ်း။ ဝၼ်းၸၼ် ထိုင် ဝၼ်း သုၵ်း ဝႃႈၼႆ။

သင်ပီႈၼွင်ႉႁႅင်းၵၢၼ်တႆး လႄႈ ၵူႈၸၢဝ်းၶိူဝ်း ၶႂ်ႈသူင်ႇလုၵ်ႈလၢင်းၶိုၼ်ႈႁဵၼ်းၼႆၸိုင် ၵပ်းသိုပ်ႇလႆႈတီႈမၢႆၾူၼ်း ၸဝ်ႈၸၢင်း ဢႃႇၸႃႇရ 088-4306021 (ဢမ်ႇၼၼ်) ၸၢႆးသၢႆဝၼ်း 098-8549949 ၸိူဝ်းၼႆႉ။