ပႃႇတီႇႁူဝ်သိူဝ် ၸႄႈဝဵင်းတူၼ်ႈတီး ယုၵ်ႉဢဝ် ၸၢႆးၸွမ်ဝၼ်း ၶိုၼ်ႈပဵၼ်ႁူဝ်ပဝ်ႈ ၸႄႈဝဵင်းတႃႇၼႂ်းပီ 2019 ဝႃႈၼႆ။
ဝၼ်းတီႈ 24/03/2019 ယူႇတီႈပႃႇတီႇႁူဝ်သိူဝ် ၸႄႈဝဵင်းတူၼ်ႈတီး ၸတ်းႁဵတ်းပၢင်လိူၵ်ႈတင်ႈ ၶွတ်ႇၽွတ်ႈၸုမ်းပွင်ၵၢၼ်မႂ်ႇ ၸႄႈဝဵင်း တီႈႁူင်းႁႅမ်း Taunggyi City Hotel ၸႄႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း။ ပီၼႆႉ ၽူႈပွင်ၵၢၼ်ၼႂ်းပႃႇတီႇ ၵမ်ႈ ၼမ် ပဵၼ်ၵူၼ်းၼုမ်ႇ ၶဝ်ႈႁၢပ်ႇၵၢၼ်ၼမ် ဝႃႈၼႆ။
ၸၢႆးၸွမ်ဝၼ်း ႁူဝ်ပဝ်ႈမႂ်ႇ ပႃႇတီႇႁူဝ်သိူဝ် ၸႄႈဝဵင်းတူၼ်ႈတီး လၢတ်ႈတီႈၽူႈတွႆႇႁွၵ်ႈဝႃႈ “ ဢၼ်ႁဝ်းၶႃႈလိူၵ်ႈ ၵူၼ်းၼုမ်ႇ ၶဝ်ႈမႃးၸွႆႈၵၢၼ်ၼႆႉ မၼ်းတေၸွႆႈလႆႈၵၢၼ်တင်းၼမ်။ ပေႃးမႃးတူၺ်းငဝ်းလၢႆးတေႃႈလဵဝ် ၵူၼ်းၼုမ်ႇၵေႃႈ ဢွၼ်ၵၼ် ၶိုၼ်ႈ မႃးတူင်ႉၼိုင်တင်းၼမ်။ မိူၼ်ၼင်ႇ မိူင်းထႆးၵေႃႈ ပႃႇတီႇဢၼ်ၵူၼ်းၼုမ်ႇ ဢွၼ်ႁူဝ်ၼၼ်ႉ လမ်းၶိုၼ်ႈမႃးပဵၼ်တီႈသၢမ်ၵမ်း လဵဝ် လႆႈႁၼ် ဝႆႉ ၸိူင်ႉၼၼ်။ ၵူၼ်းၼုမ်ႇၼႆႉ မၼ်းလမ်ႇလွင်ႈၶႃႈဢေႃႈ။ မိူၼ်ၼင်ႇ ၵႂႃႇၶိုၼ်ႈပၢင်သွၼ်ဝႃႇ၊ တေႁဵတ်းပၢင် သွၼ် သေဢၼ်ဢၼ်ၼႆ ၵပ်းသိုပ်ႇတင်းငဝ်ႈငုၼ်းႁိုဝ်ႉ ၵူၼ်းမိူင်းႁိုဝ်ႉၼႆ တေတိူဝ်းလႅတ်းလႅင်ႈလႅတ်းသႅဝ်း ၼႆ ႁဝ်းၶႃႈ တႄႉ ႁၼ် ထိုင်ဝႆႉၸိူင်ႉၼႆၶႃႈဢေႃႈ” ဝႃႈၼႆ။
ၸုမ်းပွင်ၵၢၼ်မႂ်ႇ ပႃႇတီႇႁူဝ်သိူဝ် ၸႄႈဝဵင်းတူၼ်ႈတီး ပီ 2019 ၼႆႉ ႁူဝ်ပဝ်ႈ ပဵၼ်ၸၢႆးၸွမ်ဝၼ်း ႁပ်ႉတၼ်းႁဵင်း ပဵၼ်ႁူဝ်ပဝ်ႈ ၵႂႃႇတႃႇၶၢဝ်းတၢင်းၼိုင်ႈပီ။ ၸွမ်းၼင်ႇ ပိူင်ၸုမ်းမီးဝႆႉၼၼ်ႉ ပီၼႆႉ ၸုမ်းပွင်ၵၢၼ် လႆႈၶွတ်ႇၽွတ်ႈၶိုၼ်ႈမႃး တင်း မူတ်း 21 ၵေႃႉ။ ၼႂ်းၼၼ်ႉ ၸႅၵ်ႇၼႃႈၵၢၼ်ဝႆႉ ၾၢႆႇႁပ်ႉပုၼ်ႈၽွၼ်း ၾၢႆႇၼၢင်းယိင်း၊ ၾၢႆႇပၢႆးပၺ်ၺႃ၊ ၾၢႆႇသူၼ်းတုမ်၊ ၾၢႆႇ ၵၢၼ်ငိုၼ်း ၸိူဝ်းၼႆႉ။
ႁူဝ်ပဝ်ႈ ပႃႇတီႇႁူဝ်သိူဝ် ၸႄႈဝဵင်းတူၼ်ႈတီးၵေႃႉ ဢၼ်လႆႈႁၢပ်ႇၵၢၼ်မႃး ႁိမ်း 2 ပီ (2017-2018) ၼၼ်ႉတႄႉ ပဵၼ်ၸၢႆး ၵျေႃႇလႅင်ႇ ဝႃႈၼႆ။