ငဝ်ႈငုၼ်းတီႇမူဝ်ႇၶရေႇၸီႇ ၸိူဝ်ႉၶိူဝ်းတႆး SNLD ႁို်ဝ် ပႃႇတီႇႁူဝ်သိူဝ် ၸႄႈဝဵင်းမူႇၸေႊ ၸတ်းပၢင်လိူၵ်ႈႁူဝ်ပဝ်ႈ ၸႄႈဝဵင်း ၶိုၼ်းယုၵ်ႉဢဝ် လုင်းလႃႉၽေႇ(ႁွင်ႉ) လုင်းသိူဝ်ယွမ် သိုပ်ႇပဵၼ်ႁူဝ်ပဝ်ႈၵႂႃႇထႅင်ႈၼႂ်းပီ 2019 ဝႃႈၼႆ။
ဝၼ်းတီႈ 24/03/2019 ယၢမ်းဝၢႆးဝၼ်း 1:30 ထိုင် 4:00 မူင်းပၢႆ ပႃႇတီႇႁူဝ်သိူဝ် ၸႄႈဝဵင်းမူႇၸေႊ ၸတ်းႁဵတ်း ပၢင်လိူၵ်ႈတၢင်ႇ(လိူၵ်ႈတင်ႈ)ၸုမ်းပွင်ၵၢၼ်မႂ်ႇ ၸႄႈဝဵင်း တီႈႁူင်းႁေႃ တၢၵ်ႇၼၢႆးၽွင် ပွၵ်ႉတူဝ်ႇယွတ်ႈ ၸႄႈဝဵင်းမူႇၸေႊ ၸိုင်ႈတႆး ပွတ်းႁွင်ႇ။
ၸၢႆးမျၢတ်ႉဢွင်ႇ ၽူႈၶဝ်ႈႁူမ်ႈ ပၢင်လိူၵ်ႈတၢင်ႇၸုမ်းပွင်ၵၢၼ်မႂ်ႇ ၸႄႈဝဵင်း လၢတ်ႈတီႈၽူႈတွႆႇႁွၵ်ႈဝႃႈ “ ပဵၼ်ပၢင်လိူၵ်ႈ ၸုမ်းပွင်ၵၢၼ်မႂ်ႇ ၼိုင်ႈပီ ၼိုင်ႈပွၵ်ႈ ဢဝ်ၸွမ်းပိူင် တမ်းဝၢင်းဝႆႉ။ ယူႇတီႈလုင်းသိူဝ်ယွမ် သပ်းလႅင်းၼႄ ပိူင်ၶွတ်ႇ ၽွတ်ႈပႃႇတီႇႁူဝ်သိူဝ်။ လုင်းၽူဝ်းမျၢတ်ႈ ၽူႈတႅၼ်းၵူၼ်းမိူင်းသမ်ႉ သပ်းလႅင်း ၼႄလွင်ႈသၽႃး ယဝ်ႉၵေႃႈ တိုၵ်း သူၼ်းထိုင် ႁႂ်ႈၵူၼ်းမိူင်းႁဝ်း ဢွၼ်ၵၼ်ၵႂႃႇ လဵပ်ႈႁဵၼ်းၼႂ်းသၽႃး။ ၸၢႆးၵျေႃႇတဵင်း ၽူႈတႅၼ်းသၽႃးၸႄႈမိူင်းသမ်ႉ ၶႆႈၼႄ၊ လၢတ်ႈၼႄ တီႈထုင်ႉႁဝ်း ပဵၼ်ႁိုဝ် မီးႁိုဝ် ယဝ်ႉၵေႃႈ တေႁဵတ်းႁိုဝ် ႁူမ်ႈမိုဝ်းၵၼ်တင်းၵူၼ်းမိူင်းလႄႈ သင် ၵူၼ်းမိူင်းမီးပၼ်ႁႃသင်ၵေႃႈ ႁႂ်ႈမွၵ်ႇထိုင်ၽူႈတႅၼ်း ၸဵမ်ၸိူဝ်းၼႆႉ” ဝႃႈၼႆ။
ပၢင်လိူၵ်ႈတၢင်ႇၸုမ်းပွင်ၵၢၼ်မႂ်ႇ ပႃႇတီႇႁူဝ်သိူဝ် ၸႄႈဝဵင်းမူႇၸေႊ 2019 ၼႆႉ ႁူဝ်ပဝ်ႈပဵၼ် လုင်းၸၢႆးလႃႉၽေႇ (ႁွင်ႉ) လုင်းသိူဝ်ယွမ်၊ ၵႅမ်ႁူဝ်ပဝ်ႈ ၸၢႆးလၢဝ်သႂ်၊ ၽူႈၼမ်းၼႂ်း ၸၢႆးမိၼ်ႉတဵင်းလႄႈ ၵႅမ်ၽူႈၼမ်းၼႂ်း ၼၢင်းတဵင်းၵျီႇ ၸိူဝ်းၼႆႉ ဝႃႈၼႆ။
ၼႂ်းပၢင်လိူၵ်ႈတၢင်ႇၸုမ်းပွင်ၵၢၼ်မႂ်ႇ ပႃႇတီႇႁူဝ်သိူဝ် ၸေႈဝဵင်းမူႇၸေႊၼႆႉ မီးၵေႃၵမ်ၵၢၼ်လႄႈ လုၵ်ႈၸုမ်းၶဝ်ႈႁူမ်ႈ တင်းမူတ်း ႁိမ်း 170 ၵေႃႉ ဝႃႈၼႆ။
