ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ပိုတ်းယိုဝ်းၵၼ် ႁိမ်းဝၢၼ်ႈမိူင်းမူႉ ၸႄႈဝဵင်းၼမ်ႉတူႈ ၵူၼ်းမိူင်းတူၵ်းပဵၼ်ယိူဝ်ႇတိူဝ်ႉ ၺႃးမၢၵ်ႇၵွင်ႈ လူႉတၢႆၵေႃႉၼိုင်ႈ ဝႃႈၼႆ။
ဝၼ်းတီႈ 22-23/03/2019 ၸုမ်းဢူၺ်းလီပွတ်းႁွင်ႇ တင်း RCSS/SSA ပဵၼ်ပၢင်တိုၵ်းၵၼ် ၶဵင်ႈၶႅင်ၵၢၼ်သိုၵ်း တေႃႇ ၵၼ် ႁၢဝ်ႈႁႅင်း တၢင်းပွတ်းမိူင်းမူႉ ၸႄႈဝဵင်းၼမ်ႉတူႈ ၸိုင်ႈတႆးပွတ်းႁွင်ႇ။
ၸၢႆးၵျေႃႇ ၵူၼ်းဝၢၼ်ႈၸၢမ် ၵေႃႉလႆႈၶဝ်ႈပႃးၸွႆႈထႅမ် ၵူၼ်းတိူဝ်ႉမၢၵ်ႇၵွင်ႈၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်း ဢၼ်ၺႃး မၢၵ်ႇၵွင်ႈၼၼ်ႉ ပဵၼ်ၵူၼ်းဝၢၼ်ႈသၢမ်ၶႃ ၸိုဝ်ႈႁွင်ႉလုင်းတလဵၼ်း ဢႃယု 60 ပီပၢႆ၊ မၼ်းၸၢႆးတိူဝ်ႉၺႃး မၢၵ်ႇၵွင်ႈတီႈလုပ်ႇၶီႈၶင်ႈ လႆႈလူႉတၢႆထင်တီႈၵမ်းလဵဝ်” ဝႃႈၼႆ။
မိူဝ်ႈဝၼ်းတီႈ 23 ယၢမ်းၵၢင်ၼႂ် လုင်းတလဵၼ်းလႄႈလၢၼ်မၼ်း ၵႂႃႇသိုဝ်ႉၶဝ်ႈသွႆးတီႈၵၢတ်ႇမၢၼ်ႈၸၢမ် တႃႇလဵင်ႉ ၶႅၵ်ႇတီႈပွႆးလူႇတၢၼ်းယၢတ်ႇၼမ်ႉၵျွင်းလႄႈ ပွႆးၶၢမ်ႇသၢင်ႇဝၢၼ်ႈၶဝ် ၽွင်းပွၵ်ႈၶိုၼ်းၼၼ်ႉ ၺႃးယိုဝ်းၵၢင်တၢင်း” ဝႃႈၼႆ။
ၸၢႆးၵျေႃႇ သိုပ်ႇလၢတ်ႈဝႃႈ “ ပၢင်တိုၵ်းၼႆႉ ပဵၼ်တီႈမိူင်းမူႉ၊ ပဵၼ်သိုၵ်းၸုမ်းလႂ်ယိုဝ်းၶႃတႄႉဢမ်ႇႁူႉလႆႈ။ ယၢမ်းလဵဝ်တူဝ်တၢႆမၼ်းႁဝ်းၶႃႈၵူၼ်းဝၢၼ်ႈၸွႆႈၵၼ်ဢဝ်သူင်ႇႁူင်းယႃၼမ်ႉတူႈယဝ်ႉ” ဝႃႈၼႆ။
ၼႂ်းၸႄႈဝဵင်းၼမ်ႉတူႈၼႆႉ ၸုမ်းယိပ်းၵွင်ႈၵၢင်ႇၼင်ႇၵၼ်ပိုတ်းယိုဝ်းၵၼ် ႁၢဝ်ႈႁႅင်း တေႃႈလဵဝ် ၵူၼ်းပၢႆႈၽေးသိုၵ်း တီႈၼမ်ႉတူႈ တေမီးမွၵ်ႈ 150 ၵေႃႉယဝ်ႉ ဝႃႈၼႆ။
မိူဝ်ႈဝၼ်းတီႈ 21/03/2019 ၼၼ်ႉတႄႉယူႇတီႈ RCSS လႆႈဢွၵ်ႇၶေႃႈပိုၼ်ၽၢဝ်ႇ တေၵိုတ်းၵၢၼ်ပိုတ်းယိုဝ်းတေႃႇ SSPP လိူဝ်သေယိုဝ်းၵႅတ်ႇၶႄတူဝ် ဝႃႈၼႆ။
မိူဝ်ႈဝၼ်းတီႈ 19/03/2019 ယၢမ်းဝၢႆးဝၼ်း 3 မူင်းၶိုင်ႈသမ်ႉ ယူႇတီႈ ၽူႈမီးၸၼ်ႉ SSPP ၸီႉသင်ႇလူင်း လုၵ်ႈတပ်ႉ ႁႂ်ႈၵိုတ်းတိုၵ်း ၵူႈတပ်ႉၵွင် ဝႃႈၼႆဝႆႉ။
ၵူၺ်းၵႃႈ ၵူၼ်းမိူင်းပိုၼ်ႉတီႈတႄႉလၢတ်ႈဝႃႈ တင်းသွင်ၾၢႆႇတိုၵ်ႉၽိူမ်ႉႁႅင်းသိုၵ်းတေႃႇၵၼ်ယူႇ ဢမ်ႇထၢတ်ႇ ဝႃႈၼႆ။