RCSS/SSA ႁူပ်ႉထူပ်းဢုပ်ႇဢူဝ်း တင်း ၸုမ်းဢုပ်ႇဢူဝ်းငူပ်ႉငီႉ တပ်ႉသိုၵ်းလူင်ပွင်ၸိုင်ႈမၢၼ်ႈ ၸုမ်းတေႃႇၸုမ်း တီႈၼေႇပျီႇတေႃႇ ဝႃႈၼႆ။

ဝၼ်းတီႈ 12/03/2019 မႃးၼႆႉ တူဝ်တႅၼ်းၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA ၸွမ်ႁၢၼ် ပွင်ၶိူဝ်း ဢွၼ်ႁူဝ်သေ ႁူပ်ႉဢုပ်ႇဢူဝ်း တင်း ၸုမ်းဢုပ်ႇဢူဝ်းငူပ်ႉငီႉ တပ်ႉသိုၵ်းလူင်ပွင်ၸိုင်ႈမၢၼ်ႈ တီႈႁူင်းႁေႃ ပွင်း လွင်းယဵၵ်ႉတႃႇ(ပေါင်းလောင်းရိပ်သာ) ၼေႇပျီႇတေႃႇ ဝႃႈၼႆ။

ႁွင်ႈၵၢၼ် ၾၢႆႇတပ်ႉသိုၵ်းလူင်ပွင်ၸိုင်ႈမၢၼ်ႈ ပိုၼ်ၽၢဝ်ႇဢွၵ်ႇတီႈဝႅပ်ႊသၢႆႊၶဝ်ဝႃႈ “ လွင်ႈဢၼ်လႆႈႁူပ်ႉၵၼ်ၼႆႉ ၵဵဝ်ႇ လူၺ်ႈ တပ်ႉသိုၵ်းမၢၼ်ႈ၊ RCSS/SSA လႄႈ SSPP/SSA 3 ၾၢႆႇဢုပ်ႇၵၼ်။ လွင်ႈလူတ်း ယွမ်းပၢင်တိုၵ်းၼႂ်းၸိုင်ႈတႆး ပွတ်းႁွင်ႇ။ လွင်ႈတေသူင်ႇၵူၼ်းပၢႆႈၽေးသိုၵ်းပွၵ်ႈၶိုၼ်းတီႈ ႁိူၼ်းယေးၽႂ်မၼ်း။

လွင်ႈပွင်ႇၸႂ် ႁၼ်ပိူင်ႈၵၼ် ၼႂ်း NCA ယဝ်ႉၵေႃႈ လွင်ႈၵၢၼ်ၵပ်းသိုပ်ႇဢုပ်ႇဢူဝ်းၵၼ် ၵွင်ႉသၢၼ်ၵၼ် ၼင်ႇႁိုဝ် တေၸႅင်ႈလႅင်း လိူဝ်မႃး ၸဵမ်ၸိူဝ်းၼႆႉ” ဝႃႈၼႆ။
ၵဵဝ်ႇၵပ်းလွင်ႈၼႆႉ ယူႇတီႈၸုမ်းၶၢဝ်ႇၽူႈတွႆႇႁွၵ်ႈ လႆႈၵပ်းသိုပ်ႇတွင်ႈထၢမ် ၵႂႃႇတၢင်း တူဝ်တႅၼ်း RCSS/SSA ဢၼ်ၵႂႃႇ ႁူပ်ႉထူပ်း တပ်ႉသိုၵ်းလူင်ပွင်ၸိုင်ႈမၢၼ်ႈ တီႈၼေႇပျီႇတေႃႇၼၼ်ႉၵေႃႈ ၵပ်းသိုပ်ႇဢမ်ႇလႆႈ။

ၵဵဝ်ႇလူၺ်ႈလွင်ႈႁူပ်ႉထူပ်းၵၼ်ၼႆႉ တၢင်းၾၢႆႇ RCSS/SSA ၸွမ်ႁၢၼ် ပွင်ၶိူဝ်း ဢွၼ်ႁူဝ်ၼမ်းၼႃႈၵႂႃႇ။ တၢင်းၾၢႆႇ တပ်ႉ သိုၵ်းလူင်ပွင်ၸိုင်ႈမၢၼ်ႈသမ်ႉ ၸွမ်သိုၵ်း ယႃႇပျေႇ ဢွၼ်ႁူဝ်။ ဝၢႆးဢုပ်ႇၵၼ်ယဝ်ႉ သွင်ၾၢႆႇ ယိုၼ်ႈမွပ်ႈ ၶွင်တွၼ်ႈ ပၼ် ၵၼ်သေဢမ်ႇၵႃး ထၢႆႇႁၢင်ၵိုၵ်းၵၼ် ပဵၼ်တီႈမၢႆတွင်းၵႂႃႇ ဝႃႈၼႆ။

မိူဝ်ႈဝၼ်းတီႈ 11/03/2019 ၼၼ်ႉ တူဝ်တႅၼ်း RCSS/SSA ႁူပ်ႉထူပ်းတင်း သုၼ်ငမ်းယဵၼ် မႄးလီၶိုၼ်း ၼႂ်းၸၢတ်ႈ NRPC တီႈၼေႇပျီႇတေႃႇ ဝႃႈၼႆ။