ၽူႈၵွၼ်းၸႄႈတွၼ်ႈၵဵင်းႁၢႆးလႄႈ ၽူႈမီးပုၼ်ႈၽွၼ်းလုမ်းၽွင်းတၢင် မိူင်းႁူမ်ႈတုမ်မၢၼ်ႈ ႁူပ့်ထူပ်းဢုပ်ႇဢူဝ်းၵၼ် ။သၢင်ႈလွင်ႈမိုတ်ႈၵိုဝ်းၸမ်ၸႂ်ၵၼ် ႁူမ်ႈႁႃလၢႆးၵႄႈပၼ်ႁႃ ဝူင်ႈၵၢင်သွင်မိူင်းလႄႈ လွင်ႈသၢၼ်မိုဝ်းပူၵ်းပွင်ၶိုၼ်ႈယႂ်ႇ။

ဝၼ်းတီႈ 07/03/2019 ၸၢႆးပရႃႊၸူၼ်ႊ ပရတ်ႊသၵုၼ်ႊ ၽူႈၵွၼ်းၸႄႈတွၼ်ႈၵဵင်းႁၢႆး တင်း Mr.Thein Tin ၽူတူဝ်တႅၼ်း လုမ်းၽွင်းတၢင်မိူင်းမၢၼ်ႈလႄႈ ၸုမ်းၸိူဝ်းႁူပ့်ထူပ်းဢုပ်ႇဢူဝ်းၵၼ် တီႈလုမ်းၸႄႈတွၼ်ႈ ၵဵင်းႁၢႆး ၸိုင်ႈထႆးပွတ်းႁွင်ႇ ဢုပ်ႇဢူဝ်းလွင်ႈၵူၼ်းၶဝ်ႈမိူင်း၊ လွင်ႈပၼ်ႁႃၾႆးပႃႇ/မွၵ်ႇၵႂၼ်း၊လွင်ႈယႃႈမဝ်းၵမ်၊ ပၼ်ႁႃၸွမ်းလႅၼ်လိၼ်လႄႈ လွင်ႈတႃႇသွင်မိူင်းသၢၼ်မိုဝ်းၵၼ်သၢင်ႈပၢႆးမၢၵ်ႈမီးၶိုၼ်ႈယႂ်ႇၵႂႃႇမိူဝ်းၼႃႈ။

Mr.Thein Tin လၢတ်ႈဝႃႈ မိူဝ်ႈလဵဝ်ၼႆ့ ၵၢၼ်ၵႃ့ၵၢၼ်ၶၢႆ ၸွမ်းလႅၼ်လိၼ် တိူဝ်းတွၼ်း ၶိုၼ်ႈယႂ်ႇမႃးတႄ့တႄ့ ၊ ႁႅင်းၵၢၼ်ၼႂ်းမိူင်းႁူမ်ႈတုမ်ၵေႃႈ ၶဝ်ႈႁဵတ်းၵၢၼ်ၼႂ်းမိူင်းထႆးၼမ်၊ မၢင်ၸိူဝ်းၵေႃႈမီးဝတ်းဝႂ်ထုၵ်ႇမႅၼ်ႈ မၢင်ၸိူဝ်းၵေႃႈ ဢမ်ႇပႆႇမီးဝတ်းဝႂ် ၵွပ်ႈၼၼ်လႄႈ ပၼ်ႁႃဢၼ်မီးယူႇၼႆ့ႁဝ်းၸၢင်ႈႁူမ်ႈၵၼ်ၵႄႈလိတ်ႈလႆႈ ၼႂ်းဝႆးဝႆးၼႆ့ ၊ ႁႅင်းၵၢၼ် ဢၼ်ဢမ်ႇမီးဝတ်းဝႂ်ၼၼ့်ၵေႃႈ ႁႂ်ႈဢွၼ်ၵၼ်ၶိုၼ်းပွၵ်ႈမိူင်းသေ ႁဵတ်းဝႂ်ႁႂ်ႈမၼ်းထုၵ်ႇမႅၼ်ႈယဝ့် ၸင်ႇၶဝ်ႈႁဵတ်း ၵၢၼ်ၼႂ်းမိူင်းထႆး ” ဝႃႈၼႆ။

ၸၢႆးပရႃႊၸူၼ်ႊ ပရတ်ႊသၵုၼ်ႊ ၽူႈၵွၼ်းၸႄႈတွၼ်ႈၵဵင်းႁၢႆး လၢတ်ႈဝႃႈ – “ ႁဝ်းၶႃႈယိၼ်းလီတေတူၺ်းလွမ် လုမ်းလႃးႁႅင်းၵၢၼ်ယၢၼ်မိူင်း ဢၼ်မႃးႁႃႁဵတ်းၵၢၼ်ၼႂ်းမိူင်းထႆး ၊ မိူင်းထႆးႁဝ်းၶႃႈၼႆ့လူဝ်ႇၵူၼ်းႁဵတ်းၵၢၼ်ၼမ် ၼႃႇ၊ ႁႅင်းၵၢၼ်ဢၼ်လုၵ့် မိူင်းႁူမ်ႈတုမ်မၢၼ်ႈမႃး ႁဵတ်းၵၢၼ်မိူင်းထႆးၼႆ့ ပဵၼ်ႁႅင်းၵၢၼ်ဢၼ်ၶိူင်ႇၶမ့် ႁဵတ်းၵၢၼ်လီ လွင်ႈဢၼ်မီးပၼ်ႁႃၵဵဝ်ႇလူၺ်ႈလွင်ႈႁႅင်းၵၢၼ်ၼႆ့ ႁဝ်းၶႃႈယိၼ်းလီတေပၼ်တၢင်းႁူမ်ႈမိုဝ်းဢေႃႈ ၊ ၾၢႆႇၼိုင်ႈ ၵေႃႈမီးပၢႆးဝူၼ့်ၶႂ်ႈပိုတ်ႇပိုၼ့်တီႈဢႅဝ်ႇယဵမ်ႈတီႈသၢမ်ၸဵင်ႇၶမ်း ႁႂ်ႈလႅၼ်လိၼ်ၵဵင်းႁၢႆး – တႃႈၶီႈလဵၵ်း – ပေႃႇၵႅဝ်ႈ (မိူင်းလၢဝ်း) ႁႂ်ႈပဵၼ်တီႈဢႅဝ်ႇယဵမ်ႈၵူၼ်းၵိုၼ်းၶွၼ်ႈ ၵူၼ်းမိူင်းၸၢင်ႈၶဝ်ႈဢွၵ်ႇၵႃ့ၶၢႆ သၢင်ႈလွင်ႈမိုတ်ႈၵိုဝ်းၸမ်ၸႂ်ၵၼ် ” ဝႃႈၼႆ။

ထႆးတင်းမၢၼ်ႈၼႆ့လႅၼ်လိၼ်တိတ်းၵၼ်ယၢဝ်း ၼႂ်းမိူင်းတႆး – မိူင်းထႆးၵေႃႈ တင်ႈတႄႇသၢမ်ၸဵင်ႇၶမ်း – တႃႈၶီႈလဵၵ်း လူင်းၵႂႃႇတၢင်းမႄႈႁွင်ႈသွၼ် ။ လႅၼ်လိၼ်မိူင်းႁူမ်ႈတုမ်မၢၼ်ႈတင်း ထႆးၶႅၼ်းယၢဝ်းၵႆတႃႈၶီႈလဵၵ်း တေႃႇရၼွင်း ၼပ့်ႁူဝ်ႁဵင်လၵ်း ပၼ်ႁႃဝူင်ႈၵၢင်သွင်မိူင်းၵေႃႈၼမ်၊ ပၼ်ႁႃတုၸရိူၵ်ႈ၊ ပၼ်ႁႃၵူၼ်းၶၢမ်ႈလႅၼ်လိၼ်၊ ပၼ်ႁႃယႃႈမဝ်းၵမ်ဢၼ်လူဝ်ႇႁူမ်ႈၵၼ်ၵႅတ်ႇၵင်ႈပူၵ်းပွင်ၵေႃႈမီးတင်းၼမ်။ ၸႄႈတွၼ်ႈတႃႈၶီႈလဵၵ်းၼႆ့ မီးႁူးၽၵ်းတူလူင်ၵၢၼ်ၵႃ့ၶၢႆ တႃႈၶီႈလဵၵ်း – မႄႈသၢႆ ၵူၼ်းၶဝ်ႈဢွၵ်ႇၼပ့်ဢၢၼ်ႇႁူဝ်မိုၼ်ႇ ႁူဝ်သႅၼ်။