ပၢင်ပွႆးမႁႃသတိပထၢၼ်ႇ ပၢင်ၵုမ်လူင် ၺီႇလႃႇၶၢမ်ႇ သင်ၶၸဝ်ႈ ၼႂ်းၸိုင်ႈတႆး ၵမ်းထူၼ်ႈ 53 ပွၵ်ႈၵမ်း 3 တီႈၸႄႈဝဵင်း ၵဵင်းတုင် ၸတ်းႁဵတ်းယဝ်ႉတူဝ်ႈလီ။ ပၢင်ၵုမ်ၺီႇလႃႇၶၢမ်ႇပွၵ်ႈၵမ်း 54 တေၸတ်းတီႈဝဵင်းၶူဝ်လမ် ဝႃႈၼႆ။
ၵေႃၵမ်ၵၢၼ် ၸတ်းႁဵတ်းပၢင်ပွႆးၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ပၢင်ၵုမ်တႄႉ ၸတ်းႁဵတ်း 2 ဝၼ်း ဝၼ်းတီႈ 28 /02/2019 တင်း ဝၼ်းတီႈ 01/03/2019 ၸတ်းႁဵတ်းယဝ်ႉတူဝ်ႈလီငၢမ်းၵႂႃႇယဝ်ႉ။ လိူဝ်ၼၼ်ႉ ၵေႃၵမ်ၵၢၼ် ၵမ်မထၢၼ်း တီႈၼမ်ႉၸၢင်ၵေႃႈ တၢင်ႇယိုၼ်ႈ ႁႂ်ႈမၵ်းမၼ်ႈ တိူၵ်ႈၵမ်မထၢၼ်း တီႈၼမ်ႉၸၢင် ၶဝ်ႈပဵၼ်တၢင်းၵၢၼ်/ ၶဝ်ႈၼႂ်းတိူၵ်ႈၵမ် မထၢၼ်း ၼၼ်ႉၵေႃႈ လႆႈမၵ်းမၼ်ႈ ၶဝ်ႈပဵၼ်တိူၵ်ႈၵမ်မထၢၼ်းၵႂႃႇယဝ်ႉ။ တေႃႈလဵဝ် တိူၵ်ႈၵမ်မထၢၼ်း တင်းမူတ်းမီး 35 တိူၵ်ႈ ပီတေမႃးတေၸတ်းတီႈၵျွင်းၵမ်မထၢၼ်း မၢၵ်ႇမူင်ႈလဝ်း ၶူဝ်လမ်” ဝႃႈၼႆ။
လိူဝ်ၼၼ်ႉ တီႈၼႂ်းပၢင်ၵုမ်လူင်ၺီႇလႃႇၶၢမ်ႇၼၼ်ႉ ႁူမ်ႈၵၼ် တႅပ်းတတ်း ပၼ်ႇပုတ်ႈၵၼ် တႃႇၸတ်းႁဵတ်း ပၢင်ၵုမ် လူင်ၺီႇလႃႇၶၢမ်ႇ ၵႂႃႇ မိူၼ်ၼင်ႇ ၵမ်းထူၼ်ႈ 54 တေၸတ်းႁဵတ်းတီႈ ဝတ်ႉမၢၵ်ႇမူင်ႈလဝ်း ဝဵင်းၶူဝ်လမ်၊ ၵမ်းထူၼ်ႈ 55 ၵေးသီး၊ ၵမ်းထူၼ်ႈ 56 မွၵ်ႇမႆႇ၊ ၵမ်းထူၼ်ႈ 57 လၢင်းၶိူဝ်း၊ ၵမ်းထူၼ်ႈ 58 ပၢင်လူင်၊ ၵမ်းထူၼ်ႈ 59 ပႆႇမီး၊ ၵမ်းထူၼ်ႈ 60 ဝတ်ႉၼမ်ႉ သၢႆး လၢင်းၶိူဝ်း၊ ၵမ်းထူၼ်ႈ 61 ပႆႇမီး၊ ၵမ်းထူၼ်ႈ 62 လွႆလႅမ်၊ ၵမ်းထူၼ်ႈ 63 ပႆႇမီး၊ ၵမ်းထူၼ်ႈ 64 ပႆႇမီးလႄႈ ၵမ်းထူၼ်ႈ 65 မိူင်းသၢတ်ႇ ၸိူဝ်းၼႆႉ ဝႃႈၼႆ။
ပၢင်ၵုမ်လူင်(သင်ၶၺီႇလႃႇၶၢမ်ႇ) ပွၵ်ႈၵမ်း 53 ၼႆႉယူႇတီႈတိူၵ်ႈၵမ်မထၢၼ်း သတိပထၢၼ်ႇ ၵဵင်းတုင်ႁပ်ႉႁဵတ်း ၸဝ်ႈတႃႇ ၼ။ ပၢင်ၵုမ်ပဵၼ်ဝၼ်းတီႈ 28/02/2019 လႄႈ ဝၼ်းတီႈ 01/03/2019။ ဝၼ်းတီႈ 02/03/2019 သမ်ႉ ပဵၼ်ဝၼ်း လူႇတၢၼ်းယၢတ်ႇၼမ်ႉ။ မီးသင်ၶၸဝ်ႈလႄႈ ၵူၼ်းမိူင်း ၶဝ်ႈႁူမ်ႈ ၼပ်ႉမိုၼ်ႇ။
သုၼ်ငဝ်ႈငုၼ်းတိုဝ်းၵမ် ၵမ်မထၢၼ်း မူႇလမိၼ်းၵုၼ်းၼႆႉ ၼႂ်းမိူင်းတႆးပတ်းပိုၼ်ႉ မီး 35 တီႈ။ ၼႂ်းၼၼ်ႉ တိူၵ်ႈၵမ်မ ထၢၼ်းတီႈဝဵင်းလၢင်းၶိူဝ်း ပဵၼ်တိူၵ်ႈငဝ်ႈ၊ တီႈတႄႇပၢင်တိုဝ်းၵမ် ၵမ်မထၢၼ်းပွၵ်ႈဢွၼ်တၢင်းသုတ်း။
