ၸုမ်းယိပ်းၵွင်ႈၵၢင်ႇၸၢဝ်းၶိူဝ်းၼင်ႇၵၼ် ပဵၼ်ပၢင်တိုၵ်းၵၼ်ႁၢဝ်ႈႁႅင်း ၼႂ်းၸိုင်ႈတႆးပွတ်းႁွင်ႇ လၢႆလၢႆၸႄႈဝဵင်း ၵူၼ်း ဝၢၼ်ႈလႆႈပၢႆႈၽေးသိုၵ်း ၼပ်ႉႁူဝ်ႁဵင်ၵေႃႉ ဝႃႈၼႆ။

ဝၼ်းတီႈ 13/02/2019 ယၢမ်းဝၢႆးဝၼ်း 1 မူင်း ၵူၼ်းဝၢၼ်ႈဝႃႈ ဢိူင်ႇလွႆၸေး မုင်ႉႁေႃႁိူၼ်း 21 မေႃႈၶဝ်ႈ ႁူဝ်ၵူၼ်း 63 ၵေႃႉ လႆႈဢွၼ်ၵၼ်ပၢႆႈၽေးသိုၵ်း မႃးသွၼ်ႈဝႆႉတီႈဝတ်ႉပုပ်ႉပႃႇရူင်ႇ ၸႄႈဝဵင်းၼမ်ႉတူႈ ၸိုင်ႈတႆးပွတ်းႁွင်ႇ။ ယွၼ်ႉ သိုၵ်းဢူၺ်းလီပွတ်းႁွင်ႇလႄႈ RCSS ပဵၼ်ပၢင်တိုၵ်းၵၼ်ႁၢဝ်ႈႁႅင်း ဝႃႈၼႆ။

လုင်းၸၢႆးပႃႉၺၢၼ်ႇ ၵႅမ်ႁူဝ်ပဝ်ႈၶွမ်ႊမတီႊ ၵူၼ်းပၢႆႈၽေးသိုၵ်း ၸႄႈဝဵင်းၼမ်ႉတူႈ လၢတ်ႈတီႈၽူႈတွႆႇႁွၵ်ႈဝႃႈ “ ပၢင် တိုၵ်းၼႆႉ ပဵၼ်ၵၼ်ႁၢဝ်ႈႁႅင်းၶႃႈဢေႃႈ။ ပဵၼ်ႁိမ်းဝၢၼ်ႈဝႃႈ ၵူၼ်းဝၢၼ်ႈ 60 ပၢႆ ပၢႆႈႁွတ်ႈ မႃးမိူဝ်ႈဝႃး ဝၢႆးဝၼ်း 1 မူင်း။ တေႃႈလဵဝ်တႄႉ မႃးယူႇဝႆႉယူႇ တီႈဝတ်ႉပုပ်ႉပႃႇရူင်ႇ။ လွင်ႈယၢပ်ႇၽိုတ်ႇတႄႉ တႃႇတေၵိၼ် ယႅမ်ႉၵႂႃႇမိူဝ်းၼႃႈၼၼ်ႉ ၵူၺ်းၶႃႈ။ တေႃႈလဵဝ်ၼႆႉ ႁဝ်းၶႃႈ လႆႈၸွႆႈဝႆႉ ၶဝ်ႈသၢၼ် 5 ထူင်၊ ၼမ်ႉမၼ်း 5 ၸွႆႉလႄႈ ၵႃႈၽၵ်း ယိူဝ်ႈၼၢင်းၶဵဝ် ငိုၼ်း 2 သႅၼ်ပျႃး” ဝႃႈၼႆ။

ပၢင်တိုၵ်းၼႂ်းၸႄႈဝဵင်းၼမ်ႉတူႈၼႆႉ တႄႇပဵၼ်မႃး မိူဝ်ႈဝၼ်းတီႈ 12/02/2019 ယၢမ်းၵၢင်ၶိုၼ်း 11 မူင်း သေ တေႃႇထိုင် ယၢမ်းလဵဝ် သဵင်ၵွင်ႈပႆႇယဵၼ် ဝႃႈၼႆ။

ၵူၼ်းပၢႆႈၽေးသိုၵ်း ဢၼ်ႁွတ်ႈၽႅဝ် ဝတ်ႉၵျွင်းပုပ်ႉပႃႇရူင်ႇ ၵေႃႉၼိုင်ႈ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ မိူဝ်ႈၼႆႉ ၵေႃႈ သဵင်ၵွင်ႈတႅၵ်ႇၵၼ်ႁႅင်းၼႃႇၶႃႈ။ ပဵၼ်တပ်ႉပွင်းၸူႉ(ၸုမ်းဢူၺ်းလီ) တင်း ၶူဝ်းလၢႆး ၶႃႈဢေႃႈ ယိုဝ်းၵၼ်။ ၶဝ်ယိုဝ်း ၵၼ် ႁိမ်းဝၢၼ်ႈဝႃႈႁဝ်းၶႃႈၵူၺ်း။ သိုၵ်းၶူဝ်းလၢႆးသမ်ႉ ယူႇၼႂ်းဝၢၼ်ႈ၊ တပ်ႉပွင်းၸူႉ သမ်ႉ ယူႇၼွၵ်ႈဝၢၼ်ႈႁဵတ်းၼၼ်ၶႃႈ ၵွၼ်ႇၶဝ်တေယိုဝ်းၵၼ်ၼၼ်ႉ” ဝႃႈၼႆ။

ဝၢၼ်ႈဝႃႈၼႆႉ ယူႇၼႂ်းဢိူင်ႇလွႆၸေး မီးၸဵင်ႇႁွင်ႇဝၼ်းဢွၵ်ႇၼမ်ႉတူႈ ၵူၼ်းဝၢၼ်ႈၵမ်ႈၼမ် ပဵၼ်ၸၢဝ်းလွႆ၊ မိူဝ်ႈဝႃး ဝၼ်း တီႈ 13 ၼၼ်ႉ ယူႇတီႈၸုမ်းၸွႆႈထႅမ် သီလိူၼ်ၶမ်း လႆႈဢဝ်ၵႃး ၵႂႃႇႁပ်ႉၵူၼ်းပၢႆႈၽေးသိုၵ်း တီႈဝၢၼ်ႈဝႃႈမႃး သူင်ႇပၼ် တီႈဝတ်ႉပုပ်ႉပႃႇရူင်ႇ ဝႃႈၼႆ။

ၵူၼ်းပၢႆႈၽေး သိုပ်ႇလၢတ်ႈဝႃႈ “ ၵႂၢႆးႁဝ်းၶႃႈ မွၵ်ႈ 30 တူဝ်ၼႆႉ ဢမ်ႇၸၢင်ႈဢဝ်မႃးၸွမ်းႁဝ်းၶႃႈ လႆႈပူတ်းၸိူၵ်ႈဢွၵ်ႇသေ ပွႆႇၵႂႃႇႁဵတ်း ၼၼ်ၵူၺ်းၶႃႈ။ လႆႈငိၼ်းဝႃႈ ၵႂၢႆးႁဝ်းၶႃႈၸိူဝ်းၼၼ်ႉ ၵႂႃႇမီးဝႆႉယူႇႁိမ်းဝၢၼ်ႈၼႃးငူး၊ ၼမ်ႉပၢႆႇ ၸိူဝ်းၼႆႉ ပေႃး တူၺ်းငဝ်းလၢႆးၸိူင်ႉၼႆတႄႉ ပၢင်တိုၵ်းလႅပ်ႈပႆႇယဵၼ်၊ တေလႅပ်ႈပဵၼ်ၵၼ်ႁိုင်ယူႇ” ဝႃႈၼႆ။

လိူဝ်ၼၼ်ႉ ၼႂ်းၸႄႈဝဵင်းၵျွၵ်ႉမႄးၵေႃႈ ပၢင်တိုၵ်းၼႂ်းၵႄႈ ၸုမ်းဢူၺ်းလီလႄႈ RCSS ၵူၺ်းၼင်ႇၵဝ်ႇ ၵူၼ်းဝၢၼ်ႈ ပၢႆႈၽေးသိုၵ်း မႃးသွၼ်ႈဝႆႉ တီႈဝတ်ႉၼမ်ႉၸဵတ်းလိၼ်း ႁူဝ်ၵူၼ်း 359 ၵေႃႉ၊ ဝတ်ႉၵျွင်းယွတ်ႈသမ်ႉ 400 ပၢႆလႄႈ ဝတ်ႉဢွင်ႇသုပၢၼ်ႇသမ်ႉ 300 ပၢႆ ၸိူဝ်းယူႇၸွမ်းႁိူၼ်းပီႈၼွင်ႉ ၼႂ်းဝဵင်း ထႅင်ႈ တင်းမူတ်းႁူမ်ႈၵၼ် တေမီး ႁူဝ်ၵူၼ်း 1,000 ပၢႆ ဝႃႈၼႆ။

တီႈၸႄႈဝဵင်းသီႇပေႃႉသမ်ႉ ႁူဝ်ၵူၼ်းပၢႆႈၽေး မီး 690 ၵေႃႉ။ တီႈဝတ်ႉၼႃးမၢၵ်ႇၶေႃ 303 ၵေႃႉ၊ ၵျွင်းၶရိတ်ႉယၼ်ႇလီႇ သူး၊ 98 ၵေႃႉ၊ ၼႃးၵၢင် 232 ၵေႃႉလႄႈ ဝတ်ႉသူၼ်ဢွႆႈ 57 ၵေႃႉ ၸိူဝ်းၼႆႉ။

ၼွၵ်ႈလိူဝ်ၼၼ်ႉ တီႈၸႄႈဝဵင်းလႃႈသဵဝ်ႈ ဢိူင်ႇမိူင်းၵႅတ်ႇၵေႃႈ ၸုမ်းဢူၺ်းလီပွတ်းႁွင်ႇလႄႈ သိုၵ်းလူင်ပွင်ၸိုင်ႈမၢၼ်ႈ ပဵၼ်ပၢင်တိုၵ်းၵၼ် ဝႃႈၼႆ။