မၢဝ်ႇတႆး ၵုၼ်ႁဵင်သွင်ပီႈၼွင်ႉ လုၵ်ႉဝဵင်းၵဵင်းမႆႇ မိူင်းထႆးသေ တႄႇပၼ်ႇရူတ်ႉထိပ်ႇ လဵပ်ႈမိူင်းတႆးပွတ်းဢွၵ်ႇ/ ၸၢၼ်း/ ႁွင်ႇသေ ဢၢၼ်းလူင်းထိုင်တႃႈၵုင်ႈ မိူင်းမၢၼ်ႈ ၼႂ်းၶၢဝ်းတၢင်း 3 လိူၼ်။
တႄႇဢဝ် ဝၼ်းတီႈ 13/01/2019 မႃးၼႆႉ ၸၢႆးသႅင်ႁၢၼ် တင်း ၸၢႆးဢွၼ်ႇၶိူဝ်း ၵူၼ်းၼုမ်ႇတႆး 2 ပီႈၼွင်ႉ ႁူမ်ႈၵၼ် ပၼ်ႇ ရူတ်ႉထိပ်ႇ လုၵ်ႉၵဵင်းမႆႇ ၸိုင်ႈထႆး တွၼ်ႈၼိူဝ် ပၼ်ႇထိုင် မိူင်းတႆးပွတ်းဢွၵ်ႇ၊ ပွတ်းၸၢၼ်းဢၢၼ်းပွင်ႇထိုင်မိူင်းတႆး ပွတ်းႁွင်ႇ။ လိူဝ်ၼၼ်ႉ တေဢၢၼ်းပၼ်ႇထိုင်ထႅင်ႈ ၼႂ်းမိူင်းမၢၼ်ႈ တႃႈၵုင်ႈ၊ ၼေႇပျီႇတေႃႇလႄႈ ဝဵင်းလိူဝ်ႇ ၸိူဝ်းၼႆႉ။
ၸၢႆးဢွၼ်ႇၶိူဝ်း ၵေႃႉပဵၼ်ၼွင်ႉ လၢတ်ႈတီႈၽူႈတွႆႇႁွၵ်ႈဝႃႈ “ႁဝ်းတင်ႈၸႂ် တင်ႈၶေႃးၶႂ်ႈႁဵတ်း ၸိူင်ႉ ၼႆ ၼႂ်းၸူဝ်ႈပၢၼ် ႁဝ်းၶႃႈၼႆႉ ႁိုင်ၼႃႇယဝ်ႉ။ ဢၢၼ်းဝႆႉႁိုင်ၼႃႇယဝ်ႉ။ ယိူင်းဢၢၼ်း ဢၼ်ႁဝ်းပၼ်ႇ ရူတ်ႉထိပ်ႇၼႆႉတႄႉ ၵေႃႈႁႂ်ႈပၢႆးယူႇ လီႁဝ်းၶႃႈ ၶႅမ်ႉလႅပ်ႈယူႇလီ၊ ထႅင်ႈလွင်ႈၼိုင်ႈၵေႃႈ ၶႂ်ႈတိုၵ်းသူၼ်းႁႂ်ႈၵူၼ်းၼုမ်ႇတႆးႁဝ်း ယၢၼ်ၵႆယႃႈမဝ်းၵမ်။ လိူဝ် ၼၼ်ႉ ယူႇတီသုၼ်ႇႁဝ်းၶႃႈသမ်ႉ ႁဝ်းႁဵတ်းၵၢၼ်မိူင်းပိူၼ်ႈမႃးၵေႃႈ ႁိုင်ၼႃႇယဝ်ႉ။ ၵူၼ်းႁဝ်းၼႆႉ ယူႇတီႈလႂ် ၵေႃႈႁဵတ်း ၵၢၼ်ယူႇတိၵ်းတိၵ်း၊ ပေႃးဢႃယုႁဝ်းယႂ်ႇမႃး ႁဝ်းဢမ်ႇၸၢင်ႈၵႂႃႇတၢင်းလႂ်၊ မီးၼႃႈႁိူၼ်းမႃး ယဝ်ႉၵေႃႈ ဢမ်ႇၸၢင်ႈၵႂႃႇ ယဝ်ႉ။ ယွၼ်ႉၼၼ် တေႃႈလဵဝ်ၼႆႉ ႁဝ်းပဵၼ်ပၢၼ်ၵူၼ်းၼုမ်ႇလွတ်ႈလႅဝ်း တိုၵ်ႉမီးႁႅင်း ပၢႆးယူႇလီ တဵမ်ထူၼ်ႈ ယူႇလႄႈ ႁဝ်းၶႃႈ ၸင်ႇဢွၼ်ၵၼ် ပၼ်ႇရူတ်ႉထိပ်ႇၵၼ်ၶႃႈ” ဝႃႈၼႆ။
သွင်ပီႈၼွင်ႉ တႄႇပၼ်ႇရူတ်ႉထိပ်ႇ လုၵ်ႉၵဵင်းမႆႇ ၸိုင်ႈထႆး ပၼ်ႇႁွတ်ႈၽႅဝ် ၵဵင်းႁၢႆး-မႄးသၢႆ ၸိုင်ႈထႆး။ လိူဝ်ၼၼ်ႉ ပၼ်ႇႁွတ်ႈထိုင် တႃႈၶီႈလဵၵ်း၊ တႃႈလိူဝ်ႇ၊ မိူင်းၽျၢၵ်ႈ၊ ၵဵင်းတုင်၊ မိူင်းသၢတ်ႇ၊ မိူင်းတူၼ်သေ ဝၼ်းတီႈ 29/01/2019 ၼႆႉထိုင် မိူင်းပၼ်ႇယဝ်ႉ ဝႃႈၼႆ။
ၸၢႆးဢွၼ်ႇၶိူဝ်း လၢတ်ႈဝႃႈ “ ဢၼ်ႁဝ်းၶႃႈ 2 ပီႈၼွင်ႉ လႆႈပၼ်ႇရူတ်ႉထိပ်ႇမႃးထိုင်တွၼ်ႈၼႆႉ တေမီးၶၢဝ်းတၢင်း 16 ဝၼ်းယဝ်ႉ။ ၶမ်ႈတီႈလႂ်ၼွၼ်းတီႈၼၼ်ႈ ယင်ႉတီႈၼၼ်ႈ။ မၢင်ပွၵ်ႈၵိုတ်းယင်ႉၼိုင်ႈဝဵင်းၼိုင်ႈၶိုၼ်း၊ သွင်ၶိုၼ်း ယဝ်ႉ ၵေႃႈ သိုပ်ႇပၼ်ႇထႅင်ႈ။ ဢၼ်လုၵ်ႉတၢင်းၵဵင်းမႆႇ ၶိုၼ်ႈမႃးထိုင် မႄႈသၢႆတႄႉၵေႃႈ သဵၼ်ႈတၢင်းပိူၼ်ႈလီ။ ထိုင်မႃးၼႂ်း မိူင်းတႆးႁဝ်းၶႃႈတႄႉ သဵၼ်ႈတၢင်းမိူင်းႁဝ်း ဢမ်ႇငၢႆႈၶႃႈ ယၢပ်ႇဝႆႉဢေႃႈ မၢင်တီႈၵေႃႈသိူဝ်ႇယၢင်၊ မၢင်တီႈသိူဝ်ႇမၢၵ်ႇႁိၼ် ႁဵတ်းၼၼ် ၵူၺ်းၵႃႈ ဢမ်ႇၵၢၼ်ႉ၊ ဢမ်ႇထွႆၶႃႈ” ဝႃႈၼႆ။
သဵၼ်ႈတၢင်း 2 ပီႈၼွင်ႉ တေဢၢၼ်းသိုပ်ႇပၼ်ႇၵႂႃႇထႅင်ႈ ဝၼ်းတီႈ 30/01/2019 တေ ဢၢၼ်းဢွၵ်ႇမိူင်းပၼ်ႇ ၵႂႃႇတၢင်း လၢင်းၶိူဝ်း၊ မိူင်းၼၢႆး၊ ၵဵင်းတွင်း၊ ၶူဝ်လမ်၊ ၼမ်ႉၸၢင်၊ လွႆလႅမ်၊ တူၼ်ႈတီး၊ ၼွင် ႁၢႆးယႃႈ၊ လွႆၵေႃႇ၊ ပႃႇၵိူဝ်၊ ၵျႅၵ်ႉ ထီးယူဝ်း၊ တႃႈၵုင်ႈ။ ၶိုၼ်ႈၵႂႃႇတၢင်းၼေႇပျီႇတေႃႇ၊ မၼ်းတလေး ၶဝ်ႈၸူး တၢင်းမိူင်းတႆး ပွတ်းႁွင်ႇ ၼွင်ၶဵဝ်၊ ၵျွၵ်ႉမႄး၊ လႃႈသဵဝ်ႈ၊ ၼမ်ႉၶမ်း၊ မူႇၸေႊ၊ လူင်းမႃးၶိုၼ်းတၢင်းမိူင်းယႆ၊ တၢင်ႉယၢၼ်း၊ ယဝ်ႉတေၵႂႃႇ တၢင်းမိူင်းတႆးပွတ်းဢွၵ်ႇ ပၢင်သၢင်း၊ မိူင်းပွၵ်ႉ၊ မိူင်းလႃး၊ မိူင်းယၢင်း၊ မိူင်းၶၢၵ်ႇ ၸဵမ်ၸိူဝ်းၼႆႉ။
