ၸဝ်ႈၸၢႆးလိုၼ်း ႁူဝ်ပဝ်ႈငဝ်ႈငုၼ်း ၼႃႈလိၼ်ၶိုၵ်ႉတွၼ်းမၢႆ 4 (ႁိုဝ်) ၸုမ်းမိူင်းလႃး ဢွၼ်ႁူဝ် ၸုမ်းပွင်ၵၢၼ်ငဝ်ႈငုၼ်း သေ ၵႂႃႇႁူပ်ႉၽူႈၼမ်းဝႃႉ တီႈဝဵင်းပၢင်သၢင်း။

ဝၼ်းတီႈ 16/01/2019 ယၢမ်းဝၢႆးဝၼ်း ၸဝ်ႈၸၢႆးလိုၼ်း ႁူဝ်ပဝ်ႈလူင်ငဝ်ႈငုၼ်း ၼႃႈလိၼ်ၶိုၵ်ႉတွၼ်း မၢႆ 4 ႁွတ်ႈၵႂႃႇတီႈ ဝဵင်းပၢင်သၢင်းငဝ်ႈငုၼ်းဝႃႉ UWSA သေႁူပ်ႉထူပ်းႁူဝ်ပဝ်ႈဝႃႉ ပဝ်းယဵဝ်ႇသျႅင် ၼႃႈလိၼ်ၶိုၵ်ႉတွၼ်းမၢႆ 2 တီႈၸႄႈ ဝဵင်းပၢင်သၢင်း ၸိုင်ႈတႆးပွတ်းဢွၵ်ႇၶူင်း။ ႁူဝ်ပဝ်ႈ သွင်ၾၢႆႇတၵ်ႉၼၢႆ ပီမႂ်ႇလႄႈ သူႇၸႂ်း/ ဢႅဝ်ႇယဵမ်ႈၵၼ် ၼင်ႇႁိုဝ် တင်း သွင်ၾၢႆႇပေႃးတေမီးလွင်ႈမိုတ်ႈၵိုဝ်းၸမ်ၸႂ်ၵၼ် ဝႃႈၼႆ။

ၸဝ်ႈၸၢႆးလိုၼ်း ႁူဝ်ပဝ်ႈလူင် ၼႃႈလိၼ်ၶိုၵ်ႉတွၼ်းမၢႆ 4 ၸႄႈဝဵင်းမိူင်းလႃး မွၵ်ႇလၢတ်ႈဝႃႈ“ ၸမ်ထိုင်မႃး ပီမႂ်ႇၶႄႇ 2019 ၼႆႉ လႆႈဢွၼ်ဢဝ် ၽူႈမီးပုၼ်ႈၽွၼ်း ၼႂ်းၼႃႈလိၼ်ၶိုၵ်ႉတွၼ်းမၢႆ 4 တင်းလၢႆ ႁွတ်ႈၽႅဝ်မႃးတၵ်ႉၼၢႆ ၵူႈၵေႃႉ တီႈၼႂ်း တွၼ်ႈလိၼ်ဝႃႉ။ ႁူင်းပွႆႇသဵင်တႆး တီႈပၢင်သၢင်းၵေႃႈပွႆႇသဵင်ၵႂႃႇဝႃႈ ၸဝ်ႈၸၢႆးလိုၼ်းလၢတ်ႈဝႃႈ ႁဝ်းၶဝ်သွင်ၸုမ်းၼႆႉ လႆႈ ၶၢမ်ႇၼမ်ႉ၊ ၾူၼ်၊ လူမ်းမႃးၸွမ်းၵၼ် ၸမ် 50 ပီမိူင်းယဝ်ႉလႄႈ လႆႈဢဝ် ၼိူဝ်ႉလိူတ်ႈ ၼမ်ႉႁိူဝ်ႇ ၼမ်ႉၶႆးသေ လႅၵ်ႈမႃး ပဵၼ်ဢူၺ်းလီၵၼ်သေ ႁဝ်းၶဝ်လူဝ်ႇလႆႈသိုပ်ႇႁၵ်ႉပႅင်းၵၼ်ၵႂႃႇ။ လိူဝ်ၼၼ်ႉ ၼႂ်းပီၼႆႉ ႁဝ်းၶဝ် ၸမ်ႁွတ်ႈထိုင်မႃးဝၼ်း ၵေႃႇသၢင်ႈလွင်ႈငမ်းယဵၼ် ၶွပ်ႈတဵမ် 30 ပီမိူင်း ယဝ်ႉလႄႈ လႆႈႁၼ်သူၸဝ်ႈ ၼႅတ်ႈႁၢင်ႈႁႅၼ်းၼႃႈၵၢၼ်ပၢင်ပွႆးယွၼ်း သူးပၼ် ႁႂ်ႈၸတ်းႁဵတ်းၶႅမ်ႉလႅပ်ႈလီငၢမ်း” ဝႃႈၼႆ။

ၸုမ်းၸိူဝ်း ၼႃႈလိၼ်ၶိုၵ်ႉတွၼ်းမၢႆ 4 ဢၼ်ၵႂႃႇႁူပ်ႉထူပ်း တင်းငဝ်ႈငုၼ်းပၢင်သၢင်းဝႃႉၼႆ ၸဝ်ႈၸၢႆးလိုၼ်း ႁူဝ်ပဝ်ႈ လူင် ၼႃႈလိၼ်ၶိုၵ်ႉတွၼ်းမၢႆ 4 ၸႄႈဝဵင်းမိူင်းလႃး၊ ႁူဝ်ပဝ်ႈ လွင်ႈငမ်းယဵၼ်လႄႈ ၶွမ်ႊမတီႊၾၢႆႇၽွမ်ႉႁူမ်ႈ၊ ဢူးၸီႇ မိၼ်း ၽူႈမၢႆလူင်လွင်ႈငမ်းယဵၼ်လႄႈ ၶွမ်ႊမတီႊၾၢႆႇၽွမ်ႉႁူမ်ႈ၊ ဢူးသၢၼ်းပိူဝ်ႇ ၵႅမ်ႁူဝ်ပဝ်ႈ/ ၽူႈၶဝ်ႈပႃးလွင်ႈငမ်း ယဵၼ်လႄႈၶွမ်ႊ မတီႊလွင်ႈၽွမ်ႉႁူမ်ႈ ဢိၵ်ႇထႅင်ႈလၢႆလၢႆၵေႃႉ ဝႃႈၼႆ။

တၢင်းၾၢႆႇၼႃႈလိၼ်ၶိုၵ်ႉတွၼ်းမၢႆ 2 ဝႃႉသမ်ႉ ႁူဝ်ပဝ်ႈလူင် ပဝ်းယဵဝ်ႇသျႅင်၊ ၵႅမ်ႁူဝ်ပဝ်ႈ သႅဝ်းမိၼ်ႇလႅင်၊ ပဝ်းယဵဝ်ႇယီႉ ဢိၵ်ႇထႅင်ႈလၢႆလၢႆၵေႃႉ ႁူမ်ႈၵၼ်ပႂ်ႉႁပ်ႉတွၼ်ႈ ဝႃႈၼႆ။