ၵူၼ်းဝၢၼ်ႈၶၢႆးႁဵဝ်းၵေႃႉၼိုင်ႈ ၽွင်းတိုၵ်ႉပၢႆႈၽေးသိုၵ်းၼၼ်ႉ ၶီႇရူတ်ႉၶိူင်ႈ တမ်ၽႃႇသႂ်ႇ တူၼ်ႈမႆႉသေ မၢတ်ႇၸဵပ်းႁၢဝ်ႈ ႁႅင်း လႆႈလူႉတၢႆၵႂႃႇတီႈႁူင်းယႃ ဝဵင်းလိူဝ်ႇ ဝႃႈၼႆ။
ဝၼ်းတီႈ 14/01/2019 ယၢမ်းၵၢင်ၶမ်ႈ မွၵ်ႈ 8 မူင်း ၽွင်းသဵင်ၵွင်ႈတႅၵ်ႇႁိမ်းဝၢၼ်ႈၼၼ်ႉ ၵူၼ်းဝၢၼ်ႈၶၢႆးႁဵဝ်း ၸိုဝ်ႈႁွင်ႉ ၸၢႆးလွတ်ႈ(ဢၢႆႈလွတ်ႈ) ပၢႆႈၽေးသိုၵ်း ႁေႃႈရူတ်ႉၶိူင်ႈဢွၵ်ႇမႃး လႆႈပဵၼ်ၽေးၵိုင်ႉၵၢင်ႉ တမ်ၽႃႇသႂ်ႇတူၼ်ႈမႆႉ တီႈႁိမ်း ဝတ်ႉၶၢႆးႁဵဝ်း ဢိူင်ႇၼႃးမၢၵ်ႇ ၶေႃ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ။ မၼ်းၸၢႆး မၢတ်ႇၸဵပ်းႁၢဝ်ႈႁႅင်း၊ လႆႈသူင်ႇယႃ တူဝ်တီႈႁူင်းယႃသီႇပေႃႉ ယူႇ တီႈမေႃယႃ သီႇပေႃႉ လႆႈၶိုၼ်းသိုပ်ႇသူင်ႇ ယူတ်းယႃ ဝဵင်းလိူဝ်ႇထႅင်ႈ။
ၵူၼ်းဝၢၼ်ႈၶၢႆးႁဵဝ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၶမ်ႈၼၼ်ႉ သဵင်ၵွင်ႈတႅၵ်ႇသေ ႁဝ်းၶႃႈ ၼႅတ်ႈဢွၼ် ၵၼ်ပၢႆႈ။ ယွၼ်ႉပဵၼ်ၵၢင်ၶမ်ႈသေ ဢမ်ႇႁၼ်တႃၵေႃႈပိူင်ၼိုင်ႈ ၸၢႆးလွတ်ႈၼၼ်ႉ ႁေႃႈရူတ်ႉၶိူင်ႈ တမ်ၽႃႇသႂ်ႇတူၼ်ႈမႆႉ တီႈၶၢင်ႈတၢင်း တၢင်းၶဝ်ႈဝၢၼ်ႈၶၢႆးႁဵဝ်းၼၼ်ႉ။ မၼ်းၸၢႆး သမ်ႉ ႁေႃႈဝႆးပိူင်ၼိုင်ႈ ဢမ်ႇပေႃးႁၼ်တႃၵေႃႈပိူင်ၼိုင်ႈ ၵႂႃႇ ၽႃႇသႂ်ႇတူၼ်ႈမႆႉသေ လူမ်ႉၵႂႃႇသေလႄႈ မၼ်းလိုမ်းတူဝ်ပႅတ်ႈ” ဝႃႈၼႆ။
ၵဵဝ်ႇလူၺ်ႈလွင်ႈၼႆႉ ဝၼ်းတီႈ 15/01/2019 ယၢမ်းၵၢင်ၼႂ် မွၵ်ႈ 6 မူင်း ယူႇတီႈၸုမ်းၸွႆႈထႅမ် ၽေးၵိုင်ႉၵၢင်ႉ (နယ်စည်း မခြားပရဟိတ) ၵႂႃႇႁပ်ႉဢဝ်တူဝ်မၼ်းၸၢႆး တီႈဝတ်ႉၶၢႆးႁဵဝ်းသေ သူင်ႇၸူး ႁူင်းယႃ သီႇပေႃႉ ယူႇတီႈမေႃယႃသီႇပေႃႉ သမ်ႉ ၶိုၼ်းသိုပ်ႇသူင်ႇတူဝ်ၵႂႃႇ တီႈႁူင်းယႃဝဵင်းလိူဝ်ႇ ၵမ်းလဵဝ် ဝႃႈၼႆ။
ထိုင်မႃး ဝၼ်းတီႈ 16/01/2019 ယၢမ်းဝၢႆးဝၼ်း ၸၢႆးလွတ်ႈ ဢႃယု 45 ပီ ၵူၼ်းဝၢၼ်ႈၶၢႆးႁဵဝ်း လႆႈလူႉတၢႆၵႂႃႇတီႈ ႁူင်းယႃ ဝဵင်းလိူဝ်ႇ(မၼ်းတလေး) ဝႃႈၼႆ။
ယွၼ်ႉပိူဝ်ႈ ပၢင်တိုၵ်းၶမ်ႈဝၼ်းတီႈ 14 ၼၼ်ႉသေ ၵူၼ်းပၢႆႈၽေးသိုၵ်းမီး 82 ၵေႃႉ။ ယၢမ်းလဵဝ်တီႈသီႇပေႃႉၼႆႉ ၵူၼ်းပၢႆႈ ၽေးသိုၵ်းတိုၵ်ႉမီးယူႇ 982 ၵေႃႉ။
RCSS လႄႈ SSPP လႆႈၶဵင်ႈၶႅင်ၵၢၼ်သိုၵ်းသေ တိုၵ်းတေႃးၵၼ်မႃး ၸဵမ်မိူဝ်ႈၵၢင်ပီ 2018 ။
