တွၼ်ႈတႃႇဝူင်ႈၼႆႉ ႁဝ်းၶႃႈၶႂ်ႈဢုပ်ႇၸွမ်း လွင်ႈၸုမ်းၽၢၵ်ႈၼိူဝ် 7 ၸုမ်း ဢၼ်ဝႃႉ ဢွၼ်ႁူဝ် တင်းၼမ်ႁူႉၸၵ်းဝႃႈ FPNCC ၼၼ်ႉ ၸွင်ႇၶဝ်တေၸၢင်ႈလူင်းလၢႆးမိုဝ်းၸွမ်း ၼႂ်းၶၢဝ်းတၢင်း ၵိုတ်းသိုၵ်းၵၼ် 4 လိူၼ်ၼႆႉႁိုဝ် ဢၼ်ဝႃႈၼၼ်ႉ။
FPNCC ၸုမ်းၽၢၵ်ႈၼိူဝ် 7 ၸုမ်း ဢၼ်ဝႃႉဢွၼ်ႁူဝ်ၼၼ်ႉ မီးၸုမ်းတႆး၊ ၸုမ်းၶၢင်၊ ဝႃႉ၊ မိူင်းလႃး၊ ၵဝ်ႈၵၢင်ႉ၊ ၸုမ်းလွႆလႄႈ ၸုမ်းရၶႅင်ႇ AA တင်းမူတ်း 7 ၸုမ်း ၶဝ်ႈပႃးဝႆႉ။
ဢၼ်ပႆႇလႆႈလူင်းလၢႆးမိုဝ်းၵိုတ်းတိုၵ်းၼႆႉ ၸုမ်းၽၢၵ်ႈၼိူဝ် 7 ၸုမ်း ဢိၵ်ႇလူၺ်ႈပႃးတင်း ၸုမ်း KNPP ဢၼ်ပဵၼ် ၸုမ်းပီႈၼွင်ႉယၢင်းလႅင် ၵိုတ်းဝႆႉ 8 ၸုမ်းၵူၺ်း။ ၼွၵ်ႈလိူဝ်သေ ပီႈၼွင်ႉယၢင်းလႅင်ၼၼ်ႉ ၼႂ်းၸုမ်း 7 ၸုမ်းၼၼ်ႉ ဝႃႉၼႆႉ ပဵၼ်ဢဵၼ်ႁႅင်းယႂ်ႇလိူဝ်ပိူၼ်ႈ ၾၢႆႇသိုၵ်းသေဢမ်ႇၵႃး သမ်ႉဢဝ်ဝႆႉတၼ်းႁဵင်းႁူဝ်ၼႃႈ ပိူဝ်ႈတႃႇတေဢုပ်ႇဢူဝ်း ၸွမ်း ပီႈၼွင်ႉမၢၼ်ႈ ႁဝ်းၶႃႈၵေႃႈ ႁူႉၸွမ်းၵၼ်ယူႇ။
ၵူၺ်းၵႃႈ ၼႂ်းၶၢဝ်းတၢင်း တပ်ႉသိုၵ်းမၢၼ်ႈ ပိုၼ်ၽၢဝ်ႇၵိုတ်းတိုၵ်း တႄႇဢဝ်လိူၼ်ၻီႊသႅမ်ႊၿိူဝ်ႊ 21 ဝၼ်းမႃးၼၼ်ႉ မိူဝ်ႈလဵဝ်ၸမ်မႃးႁိမ်းလိူၼ်ယဝ်ႉ ပိူဝ်ႈတႃႇတေပိုတ်ႇ ၵေႃႇသၢင်ႈလွင်ႈတေၵိုတ်းတိုၵ်းၵၼ်ၼၼ်ႉ တေပဵၼ်ၸိူင်ႉႁိုဝ်မႃး ယူႇတီႈၸုမ်းဝႃႉတေဢွၼ်ႁူဝ်ၶဝ် 7 ၸုမ်းၼၼ်ႉသေ လူင်းလၢႆးမိုဝ်းၵၼ်လႆႈယူႇၼႄႇ ႁဝ်းၶႃႈ တေထတ်းသၢင်တူၺ်းဢိတ်းၼိုင်ႈ။
ၼႂ်းၸုမ်းၽၢၵ်ႈၼိူဝ် 7 ၸုမ်းၼႆႉ ၼွၵ်ႈသေ ၸုမ်း AA ပဵၼ်ဢၼ်တင်ႈသဝ်းဝႆႉၼႂ်းမိူင်းတႆးၵမ်ႈၼမ်ၼမ် ၶႂ်ႈဝႃႈတင်း မူတ်းၼႆၵေႃႈ ဝႃႈလႆႈၵွၼ်ႇ။ ၵွပ်ႈပိူဝ်ႈၸိူင်ႉၼႆလႄႈ ပေႃးဝႃႈၶဝ် 7 ၸုမ်းၼႆႉ ပႆႇလူင်းလၢႆးမိုဝ်းၼႆၸိုင် ပိူဝ်ႈတႃႇ လွင်ႈ ငမ်းယဵၼ်မိူင်းတႆးႁဝ်းၶႃႈ ႁဝ်းၶႃႈၵေႃႈ တေပႆႇၸၢင်ႈမုင်ႈမွင်း။ ၵူၺ်းၵႃႈ ၼႂ်းၶဝ် 7 ၸုမ်းၼၼ်ႉ ပေႃးမႃးတူၺ်း TNLA ဢၼ်ပဵၼ် ၸုမ်းလွႆ၊ MNDAA ၸုမ်းၵဝ်ႈၵၢင်ႉ လႄႈ AA ၸုမ်းရၶႅင်ႇၶဝ် 3 ၸုမ်းၼၼ်ႉ ယူႇတီႈလုမ်းတႅၼ်းၽွင်း သၽႃးမိူင်းတႆး လႆႈမၵ်းမၼ်ႈဝႆႉဝႃႈ ၶဝ်ပဵၼ်ၸုမ်းၵေႃႇၵၢၼ်ႁၢႆႉ၊ ၸုမ်းယူႇၼွၵ်ႈၶွပ်ႇမၢႆမီႈ ၼႆၵေႃႈ ႁဝ်းၶႃႈ လႆႈႁူႉၸွမ်း ၵၼ်ဝႆႉယူႇ။
ၼွၵ်ႈလိူဝ်သေၼၼ်ႉသမ်ႉ မိူဝ်ႈဝၼ်းလွတ်ႈလႅဝ်းသဝ်းၶေႃ တဵမ် 71 ပီၼၼ်ႉ ယူႇတီႈၸုမ်း AA လႆႈၵႂႃႇ လူမ်ႇတိုၵ်း ပၢင်သဝ်းပလိၵ်ႈၾၢႆႇမၢၼ်ႈၶဝ် 4 တီႈ၊ တီႈတၢင်းမိူင်းရၶႅင်ႇၼၼ်ႉသေယဝ်ႉ ႁဵတ်းႁႂ်ႈလူႉယႂ်ႇသုမ်းလူင် သေဢမ်ႇၵႃး လႆႈတိူဝ်ႉသၢင်ႈပႃးတင်းသရေႇၼႃႈတႃ ၸိုင်ႈမိူင်း လူင်ပွင်ၸိုင်ႈဢိၵ်ႇလူၺ်ႈပႃးတင်း တပ်ႉသိုၵ်း။ ၵွပ်ႈပိူဝ်ႈၸိူင်ႉၼၼ် သေယဝ်ႉ တႄႇဢဝ်မိုဝ်ႉၼႆႉ ဝၼ်းၼႆႉမႃး ႁၢၼ်ႉတေႃႇထိုင်ဝၼ်းမိူဝ်ႈၼႆႉ ယူႇတီႈ AA တင်းတပ်ႉ သိုၵ်းမၢၼ်ႈ တိုၵ်ႉပဵၼ် ပၢင်တိုၵ်းသိုၵ်းသိူဝ်ၵၼ်ယူႇ ႁဝ်းၶႃႈလႆႈႁူႉၸွမ်းၵၼ်ယူႇ။
ၵွပ်ႈပိူဝ်ႈၸိူင်ႉၼႆ ပေႃးတေဢဝ် ပႃးတင်း AA ၼပ်ႉသွၼ်ႇပႃးၼႆၸိုင် တႃႇတေပဵၼ်မႃးလွင်ႈ ဢုပ်ႇၵုမ်ၵၢၼ်မိူင်း၊ ယႃႇ ပေၽူမ်ႈဝႃႈ တႃႇတေတေႃႇၼႃႈၵၼ်ၵိုတ်းတိုၵ်းၼၼ်ႉၵူၺ်း တင်းတေပဵၼ်ဢၼ်ယၢပ်ႇယူႇ ၼႆႉပဵၼ်ငဝ်းလၢႆး ဢၼ် ပဵၼ်ဝႆႉ မီးဝႆႉယၢမ်းမိူဝ်ႈလဵဝ်။
ၵူၺ်းၵႃႈ ပေႃးမႃးတူၺ်းၾၢႆႇၼိုင်ႈသမ်ႉ တႃႇတေပဵၼ်မႃး FPNCC ဢၼ်ဝႃႈ ၸုမ်းၽၢၵ်ႈၼိူဝ်ၼႆႉ ယွၼ်ႉပီႈၼွင်ႉၶႄႇ ၶတ်းၸႂ် ၶတ်းၶေႃးသေယဝ်ႉ ၸင်ႇတေပဵၼ်မႃး ၶဝ်ၵေႃႈတေလၢမ်းႁူႉၵၼ်ယူႇ။ မိူၼ်ၸိူင်ႉ KIA၊ SSPP ၸုမ်းတႆး ဢိၵ်ႇလူၺ်ႈပႃးတင်း TNLA ၵဝ်ႈၵၢင်ႉၸိူဝ်းၼႆႉ တင်းမူတ်း တင်းသဵင်ႈ ၼွၵ်ႈသေ ပီႈၼွင်ႉဝႃႉလႄႈ မိူင်းလႃးၼၼ်ႉ တိုၼ်းယၢမ်ႈပဵၼ်လုၵ်ႈၸုမ်း UNFC မႃးတင်းမူတ်းတင်းသဵင်ႈ။ ၵူၺ်းၵႃႈ ပေႃးဝႃႈယူႇတီႈ UNFC ၼႆႉ သိုပ်ႇပဵၼ် ၵႂႃႇၼႆၸိုင် ယူဝ်တေၵႂႃႇယိူင်ႈၸွမ်း RCSS လႄႈ KNU ၶဝ်ယဝ်ႉ လူင်းလၢႆးမိုဝ်းၸွမ်း ၵိုတ်းတိုၵ်းၼႆလႄႈ ယူႇတီႈ ပီႈၼွင်ႉၶႄႇသမ်ႉ ယွၼ်ႉလူၺ်ႈၽွၼ်းသၢင်ႈသုၼ်ႇတူဝ်ၶွင်မိူင်းမၼ်းၵေႃႈ ပႃးသေယဝ်ႉ ၾၢႆႇၼိုင်ႈတၢင်းၼိုင်ႈ ယွၼ်ႉလူၺ်ႈတူၺ်းထိုင်ပိူဝ်ႈတႃႇ လွင်ႈၼိမ်တဵင်ႈ လႅၼ်လိၼ်မိူင်းၶႄႇ၊ မိူင်းတႆးလႄႈ မိူင်းမၢၼ်ႈ မိူင်းၶၢင် ဢၼ်တိတ်းၸပ်းၵၼ်ၸိူဝ်းၼၼ်ႉသေ ၸင်ႇဝႃႈ ႁူၺ်းၵၼ်ႁႂ်ႈ ၸိူဝ်းပဵၼ် KIA၊ SSPP ၸိူဝ်းၼၼ်ႉသေ ႁႂ်ႈမႃးၶဝ်ႈႁူမ်ႈပႃးၸွမ်းတင်း FPNCC မိူၼ်တင်းဝႃႈ ႁဵတ်းႁႂ်ႈၾၢႆႇၸုမ်း UNFC ႁႅင်းယူပ်ႈၵႂႃႇ ႁဝ်းၶႃႈ တေႁူႉၸွမ်း ၵၼ်ယူႇ။
ၵူၺ်းၵႃႈ ၽိူဝ်ႇမႃးပဵၼ်ၸိူင်ႉၼၼ်ႉယဝ်ႉသမ်ႉ တီႈၸုမ်း FPNCC ၼၼ်ႉ ယွၼ်ႉပိူဝ်ႈၶဝ် ဢွၼ်တၢင်းလႆႈၶၢၼ်ပၢၵ်ႇဝႆႉဝႃႈ NCA ၼႆႉ ႁဝ်းၶႃႈ ဢမ်ယွမ်းႁပ်ႉ တေယူႇၼွၵ်ႈ NCA သေယဝ်ႉ ဢဝ်လၢႆးတၢင်းဢုပ်ႇဢူဝ်း တၢင်ႇလွင်ႈတၢင်ႇတၢင်းသေ တေသုတ်ႉၸူးလွင်ႈငမ်းယဵၼ်ၵူၺ်း ဝႃႈၸိူင်ႉၼၼ်ဝႆႉလႄႈ ယူႇတီႈလူင်ပွင်ၸိုင်ႈၵေႃႈ ဢမ်ႇၸၢင်ႈႁူၺ်းႁွင်ႉၶဝ် ပိူဝ်ႈ တႃႇၶဝ်ႈမႃးၸွမ်းၼႂ်းၶၵ်ႉၵၢၼ်လွင်ႈငမ်းယဵၼ်။ ၵူၺ်းၵႃႈ ဝၢႆးမႃး မိူင်းၶႄႇၶတ်းၸႂ် ၶတ်းၶေႃး ၼႃႇဢႃးလႃးသေယဝ်ႉ ထိုင်မႃးမိူဝ်ႈပၢင်လူင် ၸူဝ်ႈပၢၵ်ႇပီ 21 ၵမ်းထူၼ်ႈ 2 ၼၼ်ႉ ၶဝ်ၵေႃႈလႆႈမႃးၶဝ်ႈႁူမ်ႈၸွမ်းၼႂ်းပၢင်ၵုမ်။ ၵူၺ်းၵႃႈ ဢမ်ႇ ပေႃး သၢင်ႇထုၵ်ႇၵၼ်သေယဝ်ႉ တေႃႉတႄႉတၼ်းလႆႈၶိုၼ်ႈဝၼ်းလဵဝ်သေ ယူႇတီႈၸုမ်းဝႃႉ ဢွၼ်ပၢႆႈ ဢွၵ်ႇပၢင်ၵုမ် မိူဝ်းၵႂႃႇၼၼ်ႉ လႆႈႁၼ်ၸုမ်းဝႃႉ ဢွၵ်ႇလိၵ်ႈၽိုၼ်ၼိုင်ႈ ၵဵဝ်ႇလူၺ်ႈတၢင်းႁၼ်ၵၢၼ်မိူင်း ၶွင်ၸုမ်း FPNCC ဝႃႈၼၼ်။
ၵူၺ်းၵႃႈ ၽိူဝ်ႇမႃးတူၺ်းတႄႉ မၼ်းဢမ်ႇၸႂ်ႈ ၶေႃႈပိုၼ်ၽၢဝ်ႇဢၼ်လႆႈ တူၵ်းလူင်းလႆႈၸႂ်ၵၼ်ၼႂ်းပၢင်ၵုမ် ၶွင်ၸုမ်း FPNCC။ ၵူၺ်းပဵၼ် ၶေႃႈတၢင်းႁၼ်ထိုင် ၵၢၼ်မိူင်းၶွင်ၸုမ်းဝႃႉ ဢၼ်လဵဝ် ဢၼ်ၸုမ်းဝႃႉၶႂ်ႈလႆႈၶႂ်ႈပဵၼ်ၸိူင်ႉၼင်ႇႁိုဝ် ၶႂ်ႈႁႂ်ႈလူင်ပွင်ၸိုင်ႈလႄႈ တပ်ႉသိုၵ်းႁဵတ်းၸွမ်းၸိူင်ႉၼင်ႇႁိုဝ် ပဵၼ်ဢၼ်ၼၼ်ႉၵူၺ်းလႄႈ ယူႇတီႈလုၵ်ႈၸုမ်း FPNCC ၶဝ်ၵေႃႈ လႆႈမီးလွင်ႈငမ်းငဝ်းတေႃႇ လၢႆးဢွၼ်ႁူဝ်ၸုမ်းဝႃႉမႃးပွၵ်ႈၼိုင်ႈ ၵမ်းၼိုင်ႈ၊ သိုပ်ႇသေယဝ်ႉ ၽိူဝ်ႇပဵၼ်မႃး ပၢင် ၵုမ် ၸူဝ်ႈပၢၵ်ႇပီ 21 ၵမ်းထူၼ်ႈ 3 ၼၼ်ႉၼႆၵေႃႈ ယူႇတီႈမိူင်းၶႄႇ လႆႈၶတ်းၸႂ် ၶတ်းၶေႃး ဢွၼ်ႁူဝ်ႁွင်ႉမႃးသေယဝ်ႉ ၸုမ်း FPNCC ၶဝ်ၼႆႉ ၶဝ်ႈမႃး ၸွမ်းၼႂ်းပၢင်ၵုမ်ယူႇ ၵူၺ်းၵႃႈ ၽိူဝ်ႇဝႃႈလႆႈႁူပ်ႉထူပ်းတင်း ၽူႈၵိူဝ်းၵုမ်ၸိုင်ႈမိူင်းတေႃႇ ဢွင်ႇသၢၼ်းသူႉၵျီႇ ဢိၵ်ႇလူၺ်ႈပႃးတင်း ၽူႈပွင်ၵၢၼ်သိုၵ်းမၢၼ်ႈ ၸွမ်သိုၵ်းလူင် မိၼ်းဢွင်ႇလၢႆႇၼၼ်ႉၼႆၵေႃႈ သမ်ႉ ယူႇတီႈၶဝ် 7 ၸုမ်းၼႆႉ လႆႈထုၵ်ႇၸႅၵ်ႇယႅၵ်ႈပဵၼ် 2 မူႇ 2 ၸုမ်းသေ ၸင်ႇလႆႈႁူပ်ႉထူပ်းၵၼ် ႁဝ်းၶႃႈၵေႃႈ တေလႆႈႁၼ်မႃး။ ပွင်ႇဝႃႈလွင်ႈဢွၼ်ႁူဝ် ၸုမ်းဝႃႉၼႆႉ ဢမ်ႇပေႃးႁူမ်ႇငမ်းလႆႈထိုင်တီႈ ဢၼ်ဝႃႈၼၼ်ႉၵေႃႈ ႁဝ်းၶႃႈတေၸၢင်ႈထတ်း သၢင် ဢၼ်ၼိုင်ႈ။
ၵူၺ်းပဵၼ်ႁိုဝ် မီးႁိုဝ်ၵေႃႈယဝ်ႉ ထိုင်မႃးမိူဝ်ႈ လိူၼ်ၻီႊသႅမ်ႊၿိူဝ်ႊ ၸမ်သဵင်ႈၼႆႉတႄႉ ယွၼ်ႉငဝ်းလၢႆးၵူႈလွင်ႈလွင်ႈ တဵၵ်းတဵင် ဢမ်ႇၼၼ်ၵေႃႈ သူၼ်းဢီးမႃးသေယဝ်ႉ ယူႇတီႈတပ်ႉသိုၵ်းမၢၼ်ႈၵႃႈလႆႈ ပိုၼ်ၽၢဝ်ႇလွင်ႈၵိုတ်းတိုၵ်း ၵိုင်ႉၵၢင်ႉလႆႈႁဵတ်းၵႂႃႇ။ ၼႆႉႁဝ်းၶႃႈ တေလၢမ်းႁူႉ ႁၼ်ထိုင်ၵၼ်ဝႃႈ ယွၼ်ႉပိူဝ်ႈ ၸုမ်း EU ၸုမ်းမိူင်းဝၼ်းတူၵ်းၶဝ် ဢိၵ်ႇလူၺ်ႈပႃးတင်း ၸုမ်း OIC ၸုမ်းတႂ်ႈမိူင်းဢိသလၢမ်းမိတ်ႊၶဝ်ၸိူဝ်းၼႆ တုၵ်းယွၼ်းႁၢဝ်ႈႁႅင်းၼႃႇဢႃးလႃး ပိူဝ်ႈတႃႇဢဝ် ႁူဝ်ၼႃႈၸုမ်းသိုၵ်း ၸိူဝ်းဢၼ် ပူၼ်ႉပႅၼ်လူလၢႆတေႃႇၵူၼ်း ပီႈၼွင်ႉၿင်ႊၵႃႇရီႊ ၶဝ်ၸိူဝ်းၼၼ်ႉသေ ယဝ်ႉလႄႈ ၸင်ႇဝႃႈ ႁႂ်ႈလႆႈဢဝ်ၶဝ်တၢင်ႇထိုင် တီႈလုမ်းတြႃး ICC ဢၼ်ၵဵဝ်ႇၶွင်ႈတင်း လုမ်ႈၾႃႉၼၼ်ႉၼႆ ၼႆႉၵေႃႈ တၢင်းၼိုင်ႈ။ ထႅင်ႈၾၢႆႇၼိုင်ႈၵေႃႈ ယွၼ်ႉပိူဝ်ႈသဵၼ်ႈတၢင်းၵၢၼ်မၢၵ်ႈမီး ၶွတ်ႇလိူတ်ႈ BRI ၶွင်မိူင်းၶႄႇၼၼ်ႉၵေႃႈ ထိုင် ၶၢဝ်းတေလႆႈတႄႇၵၢၼ်မၼ်းယဝ်ႉလႄႈ ယွၼ်ႉပိူဝ်ႈႁႅင်းဢီး 2 လွင်ႈၼၼ်ႉသေ ယူႇတီႈတပ်ႉသိုၵ်းမၢၼ်ႈၵေႃႈ ဢမ်ႇ ၽွင်းလိူဝ်လႆႈ တၢင်းယိုၼ်ႈယွၼ်းၶွင်မိူင်းၶႄႇၵေႃႇပႃး ဢၼ်ၼိုင်ႈသေလႄႈ ၸင်ႇဝႃႈ လႆႈပိုၼ်ၽၢဝ်ႇၵိုတ်းတိုၵ်းၵႂႃႇ ႁဝ်းၶႃႈတႄႉ လႆႈလၢမ်းႁၼ်ၸိူင်ႉၼၼ်။
မိူဝ်ႈလဵဝ်ၵၼ်ယဝ်ႉ ပေႃးမႃးတူၺ်းတၢင်း လူင်ပွင်ၸိုင်ႈၼႆၵေႃႈသမ်ႉ ၸူဝ်ႈလူင်ပွင်ၸိုင်ႈၼူၵ်ႉယုင်း ၶိုၼ်ႈမႃး ၼႆႉ ၵဵဝ်ႇလူၺ်ႈၵေႃႇသၢင်ႈလွင်ႈငမ်းယဵၼ်ၼႆႉမႃး ဢၼ်ဝႃႈၶိုပ်ႈၼႃႈၼၼ်ႉ ၵူၺ်းမီးလွင်ႈၼိုင်ႈ တေႃႉတႄႉႁဵတ်းႁႂ်ႈ ၸုမ်း ၸၢဝ်းဢၼ်ပႆႇလႆႈလူင်းလၢႆးမိုဝ်း မိူၼ်ၸိူင်ႉ ပီႈၼွင်ႉလႃးႁူႇလႄႈ ပႃးတင်း ပီႈၼွင်ႉမွၼ်းၶဝ် လႆႈမႃးၽွမ်ႉလူင်းလၢႆး မိုဝ်းၸွမ်း NCA မီးလွင်ႈၼႆႉပိူင်လဵဝ်ၵူၺ်း ဢၼ်ၶိုပ်ႈၼႃႈၶိုၼ်ႈယႂ်ႇမႃး။ ပေႃးဝႃႈ ထိုင်ပီ 2020 မႃး သမ်ႉတေလႆႈ မိုင်ႉမၢင်ႉ ၸွမ်း ၵၢၼ်လိူၵ်ႈတင်ႈထႅင်ႈၵမ်းၼိုင်ႈယဝ်ႉၼႆလႄႈ ၵဵဝ်ႇလူၺ်ႈၵၢၼ်ငမ်းယဵၼ်ၼႆႉ ပေႃးတင်းဝႃႈ ၼႂ်းၶၢဝ်းတၢင်း ပီ 2019 ၼႆႉ ယူႇတီႈၸုမ်းလူင်ပွင်ၸိုင်ႈဢမ်ႇၸၢင်ႈႁဵတ်းသင်ၶိုပ်ႈၼႃႈလႆႈမႃးထႅင်ႈၼႆ ပိူဝ်ႈတႃႇ မၼ်းတေဢွင်ႇပေႉထႅင်ႈ ၵၢၼ်လိူၵ်ႈတင်ႈဢၼ်ဝႃႈၼၼ်ႉၵေႃႈ တေဢမ်ႇပေႃးမီးတၢင်းမုင်ႈမွင်း။ ယူႇတီႈလူင်ပွင် ၸိုင်ႈတႄႉၵေႃႈ ၶႂ်ႈႁႂ်ႈလွင်ႈငမ်း ယဵၼ်ၼႆႉ ၶိုပ်ႈၼႃႈတႄႉတႄႉ ၶႂ်ႈႁႂ်ႈလူင်းလၢႆးမိုဝ်းၵိုတ်းတိုၵ်းၵၼ်တႄႉတႄႉယူႇ ႁဝ်းၶႃႈတေႁၼ် ၸွမ်းယူႇ။ ၵူၺ်းငဝ်းလၢႆးၼင်ႇၼၼ်သမ်ႉ ယူႇတီႈ ၸုမ်း AA လႆႈၵႂႃႇပိုတ်းယိုဝ်း ပၢင်သဝ်းပလိၵ်ႈၶဝ် ၸိူင်ႉၼင်ႇၼႆၼႆႉ ႁဵတ်းႁႂ်ႈ တုမ်ႉတိူဝ်ႉဢီႈသင်လႃႇၼႆ ယူႇတီႈမိူင်းၶႄႇ သမ်ႉ ႁၼ်ထိုင်ဝႃႈ 1) မၼ်းတုမ်ႉတိူဝ်ႉလွင်ႈၵေႃႇ သၢင်ႈလွင်ႈငမ်းယဵၼ်/ ၶၵ်ႉၵၢၼ်ငမ်းယဵၼ်။ 2) ႁဵတ်းႁႂ်ႈ တုမ်ႉတိူဝ်ႉလွင်ႈၼိမ်သဝ်း ၼႂ်းလႅၼ်လိၼ်မိူင်းၶႄႇလႄႈမိူင်း မၢၼ်ႈ တိတ်း ၸပ်းၵၼ် ဢၼ်ၼႆႉ 2 လွင်ႈ၊ ၸင်ႇဝႃႈ ပေႃးသိုပ်ႇပဵၼ်လွင်ႈၸိူင်ႉၼႆမႃး ယူႇတီႈၸုမ်းဢၼ်ၵဵဝ်ႇၶွင်ႈ တၢင်းလင် ၸုမ်း AA ၸုမ်းၸိူဝ်းပၼ်ႁႅင်း တၢင်းလင် ၸုမ်း AA ၼၼ်ႉ ပေႃးတင်းဝႃႈဢမ်ႇထိင်းသိမ်းလႆႈ လွင်ႈၵၢၼ် ဢၼ်ၼႆႉ ၼႆၸိုင် ပိူဝ်ႈတႃႇတေသိုပ်ႇပဵၼ်မႃး လွင်ႈငမ်း ယဵၼ်ဢၼ်ဝႃႈၼၼ်ႉၵေႃႈ လွင်ႈမုင်ႈမွင်းမၼ်းတေဢေႇတႄႉ တႄႉၼႆႉတႄႉ ႁဝ်းၶႃႈႁၼ်ထိုင်ၸိူင်ႉၼႆဝႆႉ။
သမ်ႉထႅင်ႈလွင်ႈၼိုင်ႈတၢင်းၼိုင်ႈ ယူႇတီႈမိူင်းဝႃႉသမ်ႉ ငဝ်းလၢႆးမၼ်းပဵၼ်ႁိုဝ်ဝႆႉလႃႇ မိူဝ်ႈၻီႊသႅမ်ႊၿိူဝ်ႊ 21 ဝၼ်း ယူႇ တီႈသိုၵ်းမၢၼ်ႈဢွၵ်ႇမႃး ၶေႃႈပိုၼ်ၽၢဝ်ႇပိူဝ်ႈတႃႇၵိုတ်းတိုၵ်း တင်းတိူင်းသိုၵ်း 5 တိူင်း မိူဝ်ႈၶၢဝ်းၼင်ႇၼၼ် ယူႇတီႈ FPNCC ၼႆႉ လီလႆႈဢွၵ်ႇလိၵ်ႈၶေႃႈပိုၼ်ၽၢဝ်ႇ လွင်ႈႁပ်ႉႁူမ်ၸူမ်းတွၼ်ႈဝႃႈၼၼ်သေတႃႉၵေႃႈ ဢမ်ႇပဵၼ်ပၢင်မႃး ယူႇ ၽႂ် ယူႇမၼ်းသေ ၵႃႈလႆႈဢွၵ်ႇမႃး ယူႇတီႈမူႇၽႂ်ၸုမ်းမၼ်းၸိူင်ႉၼၼ်ၵူၺ်း။ ၼႆႉမၼ်းၼႄလွင်ႈဝႃႈ ဝႃႉၼႆႉဢမ်ႇသူၼ် ၸႂ် ပိူဝ်ႈတႃႇတေဢွၼ်ႁူဝ် ၵၢၼ်မိူင်းၶွင်ၸုမ်း FPNCC ၼႆၵေႃႈ ဝႃႈလႆႈ။ ယဝ်ႉၵေႃႈၾၢႆႇၼိုင်ႈ ပေႃးဢမ်ႇမီးၽွၼ်းလီ ပေႃးဢမ်ႇမီး ၽွၼ်းၸႃႉ ပိူဝ်ႈတႃႇၼႃႈတီႈဝႃႉၵမ်းသိုဝ်ႈၼၼ်ႉၼႆ ယူႇတီႈၸုမ်း UWSA ၸုမ်းဝႃႉၼႆႉ တိုၼ်းဢမ်ႇၶဝ်ႈ ၵႅဝ်ၸွမ်း ပိူင်ပဵၼ်ယူႇ၊ ပိူင်မီးဢီႈသင် ဢၼ်ဝႃႈၼၼ်ႉ ႁဝ်းၶႃႈတေလႆႈထတ်းႁၼ်ဢၼ်ၼိုင်ႈ။ ဢၼ်ၼႆႉၵေႃႈ မၼ်း တူၵ်းထုၵ်ႇၸွမ်းသၽႃႇဝမၼ်းယူႇ ၵွပ်ႈပိူဝ်ႈၸိူင်ႉႁိုဝ်လႄႈၼႆ ပဵၵ်ႉသမ်ႉဝႃႈ မၼ်းဢွၼ်ႁူဝ်တူင်ႉၼိုင် ဢမ်ႇတူင်ႉၼႆ ၵေႃႈ ငဝ်းလၢႆးပိူင်ပဵၼ် ၼႃႈတီႈဝႃႉၶဝ် ယၢမ်းမိူဝ်ႈလဵဝ်ၼႆႉၸိုင် ဢမ်ႇမီးသဵၼ်ႈမီးၼၢမ်သေယဝ်ႉ မိူၼ်ႁၢင်ႈမၼ်းပေႃး ၽွင်းငမ်းလႆႈႁင်းၶေႃတူဝ်မၼ်းဝႆႉယဝ်ႉၵေႃႈ မီးမီးယဝ်ႉလႄႈ ပိူဝ်ႈတႃႇမၼ်းတေၶဝ်ႈၵႅဝ်ၸွမ်း ႁဵတ်းႁႂ်ႈ တၢင်ႇမူႇတၢင်း ၸုမ်းပေႃးတေလႆႈ လီၸွမ်းမၼ်း ဢမ်ႇလီၸွမ်းမၼ်းဢၼ်ဝႃႈၼၼ်ႉ မၼ်းၵေႃႈတေဢမ်ႇပေႃးသူၼ်ၸႂ် ႁဝ်းၶႃႈ ႁၼ် ထိုင်ၸွမ်းယူႇ။
ၵွပ်ႈပိူဝ်ႈငဝ်းလၢႆးၸိူင်ႉၼႆ တင်းမူတ်းတင်းသဵင်ႈ ပေႃးမႃးႁုပ်ႈတုမ်ၵၼ်တူၺ်းၼႆၸိုင် ႁဝ်းၶႃႈ ထတ်းသၢင်ဢၼ် ၼိုင်ႈလႆႈတႄႉ ၼႂ်းၶၢဝ်းတၢင်း 4 လိူၼ်ၼႆႉ ပိူဝ်ႈတႃႇ ၸုမ်းဝႃႉတေဢွၼ်ႁူဝ် FPNCC သေ လူင်းလၢႆးမိုဝ်းၵိုတ်းတိုၵ်းႁိုဝ် ဢၼ်ဝႃႈၼၼ်ႉတႄႉ ငၢႆႈငၢႆႈသေ ဢမ်ႇပဵၼ်မႃးလႆႈ လၢင်းလၢင်းဢမ်ႇၸၢင်ႈႁဵတ်းႁိုဝ် ယူႇတီႈမိူင်းၶႄႇ ႁဵၵ်ႈႁွင်ႉတဵၵ်း ၼၵ်းၼႃတႄႉတႄႉဝႃႈဝႃႈၼႆတႄႉၵေႃႈ ယူႇတီႈၸုမ်း FPNCC ဢမ်ႇၼၼ်ၵေႃႈ ယူႇတီႈၸုမ်းဝႃႉၼႆႉ ၸၢင်ႈတေပွႆႇ ႁႂ်ႈ မုၵ်ႉၽႂ်ၸုမ်းမၼ်းၵႂႃႇဢုပ်ႇဢူဝ်းသေယဝ်ႉ လူင်းလၢႆးမိုဝ်း NCA မူႇၽႂ်ၸုမ်းမၼ်းတႄႉၵေႃႈ ၶႄးတေၸၢင်ႈပဵၼ် လႆႈ ယူႇ။ ယူႇတီႈၸုမ်းဝႃႉသေယဝ်ႉ တင်း 7 ၸုမ်း တေႁူမ်ႈၵၼ်ၵႂႃႇလူင်းလၢႆးမိုဝ်းဢၼ်ဝႃႈၼၼ်ႉတႄႉ ႁဝ်းၶႃႈတေ ဢမ်ႇ ၸၢင်ႈ မုင်ႈမွင်းလႆႈ ယွၼ်းထတ်းႁၼ်ၾၢၵ်ႇထိုင်ပီႈၼွင်ႉၵူၼ်းမိူင်းၸိူင်ႉၼင်ႇၼႆသေ တူင်ႉတၵ်ႉမႂ်ႇသုင်ၶႃႈ။
ႁိုၼ်း ၵႃယၢင်း
19/01/2019
