ပႃႇတီႇႁူဝ်သိူဝ် SNLD တႅမ်ႈလိၵ်ႈသၢၼ်ၶတ်းထိုင် ၶွမ်ႊမသျိၼ်ႊမိူင်းႁူမ်ႈတုမ် ႁႂ်ႈၶိုၼ်းၵူတ်ႇထတ်းပၼ် ပႃႇတီႇၼူၵ်ႉ ယုင်း NLD ဢၼ်ပေႉပၢင်လိူၵ်ႈတင်ႈသွမ်ႈ တီႈၼင်ႈၽွင်းလူင်ၾၢႆႇၸၢဝ်းၶိူဝ်းတႆး တီႈတိူင်းတႃႈလိူဝ်ႇၼၼ်ႉ ဝႃႈၼႆ။
ဝၼ်းတီႈ 16/01/2019 ၼႆႉယူႇတီႈၶွမ်ႊမသျိၼ်ႊ ပၢင်လိူၵ်ႈတင်ႈမိူင်းႁူမ်ႈတုမ် ၶိုၼ်းၵူတ်ႇထတ်း သဵၼ်ႈမၢႆ ၵူႈလွင်ႈ လွင်ႈ ဢၼ်လူင်းပိုၼ်ႉတီႈသူၼ်းတုမ်ၵူၼ်းမိူင်း မိူဝ်ႈပၢင်လိူၵ်ႈတင်ႈသွမ်ႈၼၼ်ႉ ပဵၼ်ၵမ်းတီႈ 2 ယဝ်ႉ ဝႃႈၼႆ။
ၼၢင်းထူၺ်းမုင်ႇ ပႃႇတီႇႁူဝ်သိူဝ် လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈ လႆႈတၢင်ႇလိၵ်ႈသၢၼ်ၶတ်းၸူးထိုင် တီႈၶွမ်ႊမ သျိၼ်ႊမိူင်းႁူမ်ႈတုမ်ၵႂႃႇ မိူဝ်ႈဝၼ်းတီႈ 18/12/2018 ႁဝ်းၶႃႈ တႅမ်ႈလိၵ်ႈသၢၼ်ၶတ်းၵႂႃႇဝႃႈ ဢမ်ႇၸႂ်ႈ တႆးသေ မႃးတွတ်ႈ ၶႅပ်းၵၢင်ၸႂ်ၵေႃႈပႃး၊ ဢမ်ႇၸႂ်ႈဝၼ်းလူင်းသူၼ်းတုမ်သေ သမ်ႉၵႂႃႇလူင်းသူၼ်းတုမ် ဢၼ်ၼၼ်ႉ ၵေႃႈပႃး၊ ယဝ်ႉၵေႃႈ တီႈႁိမ်းႁူင်းတွတ်ႈၶႅပ်းၵၢင်ၸႂ်ၼၼ်ႉ တေဢမ်ႇလႆႈဢဝ်မိၵ်ႈမၢႆ (Logo) ပႃႇတီႇသင် သႂ်ႇမႃး ၶဝ် သမ်ႉသႂ်ႇမိၵ်ႈမၢႆသေ မႃးပႂ်ႉႁူင်းတွတ်ႈၶႅပ်းၵၢင်ၸႂ်ၵေႃႈမီး၊ ယဝ်ႉၵေႃႈ မိူဝ်ႈၶဝ်ၵႂႃႇတၢင်ႇ သဵၼ်ႈမၢႆငိုၼ်း တီႈၶွမ်ႊမသျိၼ်ႊ ၼၼ်ႉၵေႃႈ သဵၼ်ႈ မၢႆၶဝ် ၽိတ်းၽိတ်းၽူၼ်ၽူၼ်ဝႆႉ ၵေႃႈမီး” ဝႃႈၼႆ။
ၼေႃႈၽူႈတႅၼ်းဢၼ်ၶဝ်ႈလိူၵ်ႈတင်ႈၼၼ်ႉ ၼိုင်ႈၵေႃႉလႂ် တေဢမ်ႇလႆႈမီးသုၼ်ႇၸႂ်ႉတိုဝ်းငိုၼ်းၼမ်လိူဝ် 100 သႅၼ် ပျႃး လွင်ႈၼႆႉ ၶွမ်ႊမသျိၼ်ႊပၢင်လိူၵ်ႈတင်ႈဢွၵ်ႇမၢႆမီႈဝႆႉ ဝႃႈၼႆ။
လွင်ႈဢၼ်ၼၢင်းထူၺ်းမုင်ႇ သၢၼ်ၶတ်းဝႆႉၼၼ်ႉ ယူႇတီႈၶွမ်ႊမသျိၼ်ႊ ၵူတ်ႇထတ်းမႃးယဝ်ႉၵမ်းၼိုင်ႈ မိူဝ်ႈဝၼ်းတီႈ 10/01/2019 ယဝ်ႉၵေႃႈ ပေႃးထိုင်မႃး ဝၼ်းတီႈ 22 လိူၼ်ၼႆႉ တေၵူတ်ႇထတ်းသဵၼ်ႈသၢႆမၢႆထႅင်ႈၵမ်းၼိုင်ႈ ဝႃႈၼႆ။
သိုပ်ႇလၢတ်ႈဝႃႈ “ယူႇတီႈၽူႈတႅၼ်း NLD လၢတ်ႈတီႈသိုဝ်ႇၶၢဝ်ႇဝႃႈ လႆႈၸႂ်ႉငိုၼ်းမိူဝ်ႈၽွင်းလူင်းႁႃသဵင်ၼၼ်ႉ လႆႈသဵင်ႈ ငိုၼ်းမွၵ်ႈ 85 သႅၼ်ပျႃး။ ၵမ်းၼႆႉ ထိုင်တၢင်ႇမႃးတီႈၾၢႆႇ ၶွမ်ႊမသျိၼ်ႊပၢင်လိူၵ်ႈတင်ႈသမ်ႉ 55 သႅၼ်ပျႃး လွင်ႈၼႆႉ မၼ်းၵႂႃႇၵၼ် ႁႅင်းဝႆႉသေ ယဝ်ႉၵေႃႈ ၸုမ်ႈ(တံဆိပ်ခေါင်း) ၵေႃႈဢမ်ႇတွၵ်ႇပႃး၊ ယဝ်ႉၵေႃႈ လွင်ႈဝႂ် တိုတ်းငိုၼ်း ၸဵမ် ၸိူဝ်းၼႆႉၵေႃႈပႃး။ ၸိူဝ်းၼႆႉႁႂ်ႈၾၢႆႇၶွမ်ႊမသျိၼ်ႊၶဝ်ထတ်းပၼ်ၶိုၼ်း မူတ်းမူတ်း” ဝႃႈၼႆ။
တီႈၼင်ႈၽွင်းလူင်ၾၢႆႇၸၢဝ်းၶိူဝ်းတႆး တီႈတိူင်းဝဵင်းလိူဝ်ႇၼႆႉ လုင်းၸၢႆးပၢၼ်းသႅင် ပႃႇတီႇၼူၵ်ႉယုင်း ဢွင်ႇပေႉလႆႈ တီႈၼင်ႈဝႆႉ။ ပၢင်လိူၵ်ႈ တင်ႈသွမ်ႈၼႆႉ ၸတ်းႁဵတ်း မိူဝ်ႈဝၼ်းတီႈ 3 လိူၼ်ၼူဝ်ႊဝႅမ်ႊၿိူဝ်ႊ 2018။ ၼႂ်းတိူင်းတႃႈလိူဝ်ႇ ၼႆႉ ၼေႃႇၽူႈတႅၼ်း ဢၼ်ၶဝ်ႈၶႅင်ႇၵၼ် မီးၼၢင်းထူၺ်းမုင်ႇ ပႃႇတီႇႁူဝ်သိူဝ်၊ ၻွၵ်ႊတိူဝ်ႊ ၸၢႆးၵျေႃႇဢုင်း ပႃႇတီႇ သိူဝ် ၽိူၵ်ႇ၊ ၸၢႆးပၢၼ်းသႅင် (ႁွင်ႉ) ၸၢႆးထုၼ်းၸိင်ႇ (ဢမ်ႇၼၼ်) ၸၢႆးၵျေႃႇၸိင်ႇ ပႃႇတီႇၼူၵ်ႉယုင်း၊ ၸၢႆးဢွင်ႇၵျီႇ ပႃႇတီႇ သၢင်ႇသီႈလႄႈ သုၼ်ႇတူဝ် ဢူးဢွင်ႇထေး ၸဵမ်ၸိူဝ်းၼႆႉ ဝႃႈၼႆ။
