ပၢင်ပွႆးယုၵ်ႉယွင်ႈၸဝ်ႈၶူးမေႃတႆးလႄႈ ပွႆးယုၵ်ႉယွင်ႈၾိင်ႈငႄႈၸဝ်ႈပၢႆးမွၼ်း ၸၢတ်ႈသႅင်းတႆး သြႃႇလူင်ဢေႃးၸေႇယ ဢွၼ်ႁူဝ် တႄႇတင်ႈ ထူၼ်ႈထိုင် 75 ပီတဵမ် တေၸတ်းႁဵတ်းပၢင်ပွႆးၶိုၵ်ႉယႂ်ႇလူင် တီႈဝဵင်းသီႇပေႃႉ။
ပေႃးထိုင်မႃး ဝၼ်းတီႈ 21-23/01/2019 ၸိုင် လုၵ်ႉၼွင်ႉပွင်ႈပၢႆလႄႈ ၵူၼ်းမိူင်းသီႇပေႃႉ တေဢွၼ်ၸတ်းႁဵတ်း ပၢင်ပွႆး ယုၵ်ႉယွင်ႈၸဝ်ႈၶူးမေႃတႆးလႄႈ သြႃႇလူင်ဢေႃးၸေႇယ ၽူႈဢွၼ်ႁူဝ်တႄႇတင်ႈ ၸၢတ်ႈသႅင်းတႆး ထူၼ်ႈထိုင် 75 ပီ (ပီၵွၼ်းသႅင်) တေၸတ်းႁဵတ်းတီႈဝတ်ႉ/ၵျွင်းလူင်ဢွင်ႇမင်ၵလႃႇၽူဝ်းတေႃႇ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ။
လုင်းၸၢႆးမႅတ်ႉဢွင်ႇ ၵႅမ်ႁူဝ်ပဝ်ႈလႄႈ ၽူႈပွင်ၵၢၼ် ပွင်ပဵၼ်ပၢင်ပွႆး လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈ တေယုၵ်ႉယွင်ႈ ၸဝ်ႈၶူးမေႃပဵၼ်ၵဝ်ႉလူင်သေ ယဝ်ႉၵေႃႈ လုင်းဢေႃးၸေႇယႃႉ ၵေႃႉဢွၼ်တႄႇတင်ႈမႃး ၸၢတ်ႈသႅင်းတႆး ၶွပ်ႈတဵမ် 75 ပီယဝ်ႉလႄႈ ၸင်ႇဝႃႈ ပွႆးၶူးမေႃလႄႈ ပွႆးပီၵွၼ်းသႅင် 75 ပီ ၸၢတ်ႈသႅင်းတႆး။ ယိူင်းဢၢၼ်း ဢၼ်ႁဝ်းၶႃႈ ၸတ်းႁဵတ်း သမ်ႉ ၼင်ႇႁိုဝ် တေသိုပ်ႇသၢႆၸႂ် ၸိူဝ်ႉၶိူဝ်းၵႂႃႇမိူဝ်းၼႃႈၼၼ်ႉ ပေႃးႁဝ်းၶႃႈ ဢမ်ႇတူၵ်ႇ၊ ဢမ်ႇတၵ်ႉၼေႃႇတႅၼ်းၶိူဝ်း ႁဝ်းၶႃႈ ဢၼ်တေမႃးပႃႈလင်ၼႆၸိုင် ဝၢႆးလိုၼ်းမႃး ၵူဝ်လႆႈမွတ်ႈဝၢႆးႁၢႆၵႂႃႇၶႃႈဢေႃႈ။ ယွၼ်ႉၼၼ် ၶႂ်ႈႁႂ်ႈ ၵူၼ်းၼုမ်ႇ သႅၼ်းပႃႈလင်ႁဝ်းၶႃႈ ပေႃးသိုပ်ႇႁဵတ်းသၢင်ႈၵႂႃႇထႅင်ႈတၢင်းၼႃႈသေ ယဝ်ႉၵေႃႈ ႁႂ်ႈမေႃႁၵ်ႉသႃမႅတ်ႇပႅင်း ၵၼ်ၵႂႃႇ ၸဵမ် ၸိူဝ်းၼႆႉ” ဝႃႈၼႆ။
ၶပ်ႉမၢႆပၢင်ပွႆးသမ်ႉ ၼႂ်းဝၼ်းတီႈ 21 ယၢမ်းၵၢင်ၼႂ် 8 မူင်း ပိုတ်ႇပၢင်/ ၵႅတ်းမႆလၢႆႈ၊ ပိုတ်ႇႁွင်ႈၼႄပိုၼ်း ႁူင်းႁဵၼ်းထမ်မ၊ သပ်းလႅင်းၼႄ လွင်ႈတီႈဢၼ်လႆႈၸတ်းႁဵတ်းပၢင်ပွႆး၊ ႁေႃးလိၵ်ႈလူင် ဢၼ်ၸဝ်ႈၵၢင်းသိူဝ်တႅမ်ႈဝႆႉ ၸိူဝ်းၼႆႉ။
ဝၼ်းတီႈ 22 သမ်ႉ ယၢမ်းၵၢင်ၼႂ် ပၢင်တၢၼ်ႈ/ ဢုပ်ႇၶႆႈ ၵဵဝ်ႇလူၺ်ႈပိုၼ်းၸဝ်ႈၶူးမေႃတႆးလႄႈ လုင်းဢေႃးၸေႇယႃႉ၊ ဝၢႆးဝၼ်းသမ်ႉ ၼႄတၢင်းၵႃႈ ၼူၵ်ႉတူဝ်း၊ တွၼ်ႈၵၢင်ၶမ်ႈသမ်ႉ ၸဝ်ႈၶူးသုၶမ်း တေမႃးပွၼ်ႈထမ်း(ႁေႃႈတြႃး)။ ဝၼ်းတီႈ 23 ယၢမ်းၵၢင်ၼႂ် မွၵ်ႇထိုင်ၸဝ်ႈပၢႆးမွၼ်းတႆး ဢႃယု 60 ပီ ၶိုၼ်ႈၼိူဝ် တေၵၼ်ႇတေႃး/ လူႇတၢၼ်း၊ ယၢမ်းဝၢႆးဝၼ်းသမ်ႉ တေဢွၼ်ၵၼ်ၵႂႃႇဝၢင်းၶူဝ်ႉမွၵ်ႇ တီႈၶုမ်လုင်းဢေႃးၸေႇယႃႉသေ ယဝ်ႉၵေႃႈ ဢွၼ်ၵၼ်လူႇတၢၼ်း ယၢတ်ႇၼမ်ႉၵႂႃႇ ဝႃႈၼႆ။
လုင်းၸၢႆးမႅတ်ႉဢွင်ႇ လၢတ်ႈဝႃႈ “ ယူႇတီႈႁဝ်းၶႃႈ ၸုမ်းပွင်ၵၢၼ် ပွင်ပဵၼ်ပၢင်ပွႆးသေ ယွၼ်းမွၵ်ႇထိုင် ပီႈၼွင်ႉႁဝ်းၶႃႈ တီႈၸမ်ၵႆ မႃးၶဝ်ႈႁူမ်ႈပၢင်ပွႆးႁဝ်းၶႃႈသေဢမ်ႇၵႃး သင်ဝႃႈ ပီႈၼွင်ႉႁဝ်းၶႃႈမႃးၸိုင် ၶႅၼ်းတေႃႇ ပွင်ႇပၼ်ႁဝ်းၶႃႈ ဝႆႉ ဢွၼ်တၢင်း ယွၼ်ႉဝႃႈ ႁဝ်းၶႃႈတေႁၢင်ႈႁႅၼ်း တီႈယူႇတီႈၼွၼ်းဝႆႉပၼ်ၶႃႈ။ ၵပ်းသိုပ်ႇမႃးလႆႈတီႈ မၢႆၾူၼ်းၶႃႈႁဝ်း 099-516-883-21 ၼႆႉၶႃႈ” ဝႃႈၼႆ။
သိုပ်ႇလၢတ်ႈဝႃႈ “ ငိုၼ်းဢၼ်တီႈလႆႈမႃးတီႈၼႂ်းပၢင်ပွႆးၸိူဝ်းၼႆႉ ႁဝ်းၶႃႈ တေႁၢၵ်းၵႃႈၸႂ်ႉၸၢႆႇသေ ဢၼ်ၵိုတ်းလိူဝ်ၸိူင်ႉ ၼၼ်ႉ ႁဝ်းၶႃႈ တေဢဝ်ႁဵတ်းႁွင်ႈၼႄပိုၼ်းလႄႈ ႁူင်းတူၺ်းလိၵ်ႈဝႆႉ” ဝႃႈၼႆ။
