UNOCHA ဢွၵ်ႇၶေႃႈပိုၼ်ၽၢဝ်ႇဝႃႈ ၼႂ်းႁၢင်လိူၼ်ၻီႊသႅမ်ႊၿိူဝ်ႊ 2018 မႃးၼႆႉ ၸႄႈမိူင်းတႆး တင်း ၸႄႈမိူင်းရၶႅင်ႇ ၵူၼ်းမိူင်းပၢႆႈၽေးသိုၵ်းတိူဝ်းၼမ်ထိုင်မႃး ၼပ်ႉႁဵင်။
ဝၼ်းတီႈ 22-25 /12/2018 မႃးၼႆႉ သိုၵ်း RCSS တင်း SSPP ပဵၼ်ပၢင်တိုၵ်းၵၼ် ၼႂ်းၸႄႈဝဵင်းသီႇပေႃႉ ၸိုင်ႈတႆး ပွတ်းႁွင်ႇသေ ဝၢၼ်ႈၵူၼ်းမွၵ်ႈ 10 ဝၢၼ်ႈ ႁူဝ်ၵူၼ်း 1,200 ပၢႆ လႆႈဢွၼ်ၵၼ်ပၢႆႈၽေးသိုၵ်း ၽၢတ်ႇယၢၼ်ႁိူၼ်းယေး ၵၼ် ဝႃႈၼႆ။
လိူဝ်ၼၼ်ႉဢမ်ႇၵႃး ပူၼ်ႉမႃး ဢဝ်လၢႆဝူင်ႈၼႆႉၵူၺ်း ၼႂ်ႈၸႄႈမိူင်းရၶႅင်ႇၵေႃႈ တပ်ႉသိုၵ်းလူင်ပွင်ၸိုင်ႈမၢၼ်ႈတင်း တပ်ႉ သိုၵ်းရၶႅင်ႇ AA လႆႈပဵၼ်ပၢင်တိုၵ်းၵၼ်သေ ၵူၼ်းမိူင်းမွၵ်ႈ 1,500 ၵေႃႉ လႆႈဢွၼ်ၵၼ်ပၢႆႈၽေးသိုၵ်း။ ထိုင်မႃး ဝၼ်းတီႈ 8 လိူၼ်ၻီႊသႅမ်ႊၿိူဝ်ႊၼၼ်ႉ တင်းမူတ်းၵူၼ်းပၢႆႈၽေးသိုၵ်းမီးၵႂႃႇ မွၵ်ႈ 2,500 ၵေႃႉ ဝႃႈၼႆ။
ၼႂ်းလိၵ်ႈပိုၼ်ၽၢဝ်ႇၼၼ်ႉ ဢွၵ်ႇဝႆႉဝႃႈ ၵူၼ်းပၢႆႈၽေးသိုၵ်း ၼႂ်းၸႄႈဝဵင်းသီႇပေႃႉ ဢၼ်လႆႈပၢႆႈၽေးသိုၵ်းၵႂႃႇသွၼ်ႈဝႆႉ ၸွမ်းဝတ်ႉ မီး 3 တီႈ။ လိူဝ်ၼၼ်ႉ ၸုမ်းတူင်ႉၼိုင်တူင်ႇဝူင်းၵူၼ်း၊ ၵူၼ်းမိူင်းပိုၼ်ႉတီႈ ဢွၼ်ၵၼ်ၵမ်ႉထႅမ် လွင်ႈၶဝ်ႈ ၼမ်ႉတၢင်းၵိၼ် ဝႃႈၼႆ။
သိုၵ်းလူင်ပွင်ၸိုင်ႈမၢၼ်ႈ ပိုၼ်ၽၢဝ်ႇၵိုတ်းသိုၵ်းၼႂ်းၸႄႈမိူင်းတႆး၊ ၸႄႈမိူင်းၶၢင်ဝႆႉ ၶၢဝ်းတၢင်း 4 လိူၼ် (21/12/2018 – 30/04/2019) ဝႃႈတေဢမ်ႇႁႅၼ်းသိုၵ်းလေႃႇတိုၵ်းၽႂ်၊ သိုၵ်းၸၢဝ်းၶိူဝ်းၵူႈၸုမ်းၵေႃႈလီလႆႈၵုမ်းၵမ်ၵူၼ်းသိုၵ်းၽႂ်မၼ်း၊ ၸုမ်းလႂ် ၸႂ်ႉဢဵၼ်ႁႅင်းတေႃႇၵၼ်ၵေႃႈ သိုၵ်းတပ်ႉမတေႃႇမၢၼ်ႈ မီးပုၼ်ႈၽွၼ်းတေၵႂၢတ်ႇလၢင်ႉၵႂႃႇ ဝႃႈၼႆ။
