ပီႈၼွင်ႉတၵ်ႉၵႃႇသတ်ႉထႃး တီႈၸမ်ၵႆ ဢွၼ်ၵၼ်ဝႆႈသႃ ၸဝ်ႈသိလ်ထမ်းဝုၼ်းၸုမ်ႉ ၼႂ်းတိုဝ်ႉတၢင်း ဝၼ်းၵိူတ်ႇ ဢႃ ယုၸဝ်ႈ ၶွပ်ႈတဵမ် 56 ပီ တီႈဝတ်ႉၽရႃႉထၢတ်ႈသီႊတွၼ်ႊရိူင်ႊ(သီရိတွၼ်းႁိူင်း) ၼႂ်းဢိူင်ႇမိူင်းၽူင်း ၸႄႈဝဵင်းတႃႈၶီႈ လဵၵ်း ၸိုင်ႈတႆးပွတ်းဢွၵ်ႇ ဝႃႈၼႆ။
ယူႇတီႈသင်ၶၸဝ်ႈလႄႈ တၵ်ႉၵႃႇသတ်ႉထႃး ႁူမ်ႈၵၼ်သေ ၸတ်းႁဵတ်းပၢင်ပွႆး ဝၼ်းၵိူတ်ႇၸဝ်ႈသိလ်ထမ်း ဝုၼ်းၸုမ်ႉ ဢႃယု ၶွပ်ႈတဵမ် 56 ပီ တီႈဝတ်ႉၽရႃႉထၢတ်ႈသီႊတွၼ်ႊရိူင်ႊ ဝၢၼ်ႈပႃႇသႃ ဢိူင်ႇမိူင်းၽူင်း(ၶ) ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း တႄႇဢဝ် ဝၼ်းတီႈ 01-05/01/2019 တႃႇၶၢဝ်းတၢင်း 5 ဝၼ်း မီးပီႈၼွင်ႉတၵ်ႉၵႃႇသတ်ႉထႃး ၼႂ်းမိူင်းတႆး၊ မိူင်းထႆး၊ မိူင်းၶႄႇ လႄႈ ဢိၵ်ႇထႅင်ႈလၢႆလၢႆတီႈ မႃးၶဝ်ႈႁူမ်ႈ ဝႆႈသႃ တင်းၼမ်လၢႆ ဝႃႈၼႆ။
တၵ်ႉၵႃႇသတ်ႉထႃး ဢၼ်လုၵ်ႉတၢင်းသႅၼ်ဝီ ၸိုင်ႈတႆးပွတ်းႁွင်ႇ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈ မႃးဝႆႈ သႃ ၶူးဝႃးသိလ်ထမ်းဝုၼ်းၸုမ်ႉ လႆႈငိၼ်းဝႃႈ ၸဝ်ႈႁဝ်း တေၶဝ်ႈတိုဝ်းၵမ်(ၵျၢင်ႉၵမ်) ၼႂ်းထမ်ႈ တႃႇၶၢဝ်းတၢင်း 3 ပီၼႆ ၶႃႈ။ ႁဝ်းၶႃႈ မႃးႁွတ်ႈၽႅဝ် တီႈမိူင်းၽူင်းၼႆႉ မီး 3-4 ဝၼ်းယဝ်ႉ။ မိူဝ်ႈၼႆႉ ၸဝ်ႈၶူးဝႃးဝုၼ်းၸုမ်ႉ တေႁေႃးတြႃးမဵတ်ႉ တႃႇပၼ် ၽီသၢင် သတ်းၵူၼ်း ၼႆၶႃႈဢေႃႈ။ တေလႆႈဝႃႈ ပၢင်ပွႆးတႄႉ ၵိုၼ်းၶွၼ်ႈတႄႉၶႃႈ ဢမ်ႇဝႃႈ ပီႈၼွင်ႉတႆး၊ ပီႈ ၼွင်ႉလွႆ၊ ပီႈၼွင်ႉၵူႈၸၢဝ်းၶိူဝ်းလႂ် ဢွၼ်ၵၼ်မႃးဝႆႈသႃတင်းၼမ်ၶႃႈယဝ်ႉ။ လႆႈငိၼ်းဝႃႈ ပီႈၼွင်ႉတၢင်းမိူင်းထႆးၵေႃႈ မႃး ၼမ်ၼႆၶႃႈဢေႃႈ” ဝႃႈၼႆ။
ၼႂ်းပၢင်ပွႆးဝၼ်းၵိူတ်ႇၸဝ်ႈသိလ်ထမ်းဝုၼ်းၸုမ်ႉ ဢႃယု ၶွပ်ႈတဵမ် 56 ပီၼႆႉ ၸတ်းႁဵတ်းတီႈဝတ်ႉၽရႃႉထၢတ်ႈသီႊ တွၼ်ႊရိူင်ႊ မီးပီႈၼွင်ႉတၵ်ႉၵႃႇသတ်ႉထႃးတီႈၸမ်ၵႆ မႃးဝႆႈသႃ လူႇတၢၼ်းတင်းၼမ်လၢႆ။ လိူဝ်ၼၼ်ႉ မီးတၵ်ႉ ၵႃႇသတ်ႉထႃး မႃးၸႃႇၵလဵင်ႉလူ ၶဝ်ႈၼမ်ႉတင်းၵိၼ်လႄႈ လိူဝ်ၼၼ်ႉ မီးထႅင်ႈ ၾၢႆႇမေႃယႃ မႃးပႂ်ႉယူတ်းယႃ ပၼ်ပီႈ ၼွင်ႉ တၵ်ႉၵႃႇသတ်ႉထႃး ၸိူဝ်းမႃးၶဝ်ႈဝႆႈသႃ ၼႂ်းပွႆးဝၼ်းၵိူတ်ႇ ၸဝ်ႈသိလ်ထမ်းဝုၼ်းၸုမ်ႉ ၸဵမ်ၸိူဝ်းၼႆႉ ၵေႃႈမီး ဝႃႈၼႆ။
ၸဝ်ႈသိလ်ထမ်းဝုၼ်းၸုမ်ႉၼႆႉ ၵိူတ်ႇမိူဝ်ႈ ဝၼ်းတီႈ 5 လိူၼ်ၵျႅၼ်ႊၼိဝ်ႊရီႊ 1965 တီႈဝၢၼ်ႈမႄႈၶမ်းၼွင်ဝူဝ်း (ၼွင် မူဝ်) ဢိူင်ႇမႄႈၶမ်း၊ ၸႄႈဝဵင်းမႄႈၸၼ်း၊ ၸႄႈတွၼ်ႈၵဵင်းႁၢႆး မိူင်းထႆးပွတ်းႁွင်ႇ။ ၸိုဝ်ႈပေႃႈႁွင်ႉဝႃႈ ၸၢႆးၶမ်းလႃႈ၊ ၸိုဝ်ႈမႄႈႁွင်ႉဝႃႈ ၼၢင်းသႅင်လႃႈ။ မီးပီႈၼွင်ႉႁူမ်ႈတွင်ႉၵၼ် 4 ၵေႃႉ၊ ၸဝ်ႈပဵၼ်ၵေႃႉငဝ်ႈပိူၼ်ႈ။ ၸၼ်ႉလိၵ်ႈသမ်ႉ လႆႈ ၶိုၼ်ႈႁူင်းႁဵၼ်းထႆး ထိုင်ၸၼ်ႉသီႇ။ မိူဝ်ႈဢႃယု 11 ပီ ၸဝ်ႈလႆႈၶိုၼ်ႈပဵၼ်ၸဝ်ႈသၢင်ႇ တီႈဝတ်ႉမႄႈၶမ်းၼွင်ဝူဝ်း။ ၶဝ်ႈႁဵၼ်းၼၵ်ႉထမ်း သွပ်ႇလႆႈၸၼ်ႉၼၵ်ႉထမ်းတြီးမိူင်းထႆး (ၸၼ်ႉပထမငႄႇ – မိူင်းမၢၼ်ႈ)။ ထိုင်မႃး ဢႃယု 12 ပီ တၵ်ႉၵႃႇသတ်ႉထႃး ဢိူင်ႇမိူင်းၽူင်း ၵႂႃႇမွၵ်ႇယေႃးမုၼ်ႁပ်ႉဢဝ်ၸဝ်ႈမႃးပူၵ်းပွင်သႃသၼႃ တီႈဝတ်ႉၽရႃႉထၢတ်ႈသီႊ တွၼ်ႊရိူင်း (သီရိတွၼ်းႁိူင်း) ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၶူင်း တေႃႇထိုင်ဝၼ်းမိူဝ်ႈၼႆႉ။
