ပၢင်ၵုမ်ၶွၼ်ႇၾရႅၼ်ႉ လိၵ်ႈလူင် ၵမ်းတီႈ 6 ပီၼႆႉ ၸတ်းႁဵတ်းတီႈၸႄႈဝဵင်းႁူဝ်ပၢင်ႇလူင် ၽိုၼ်လိၵ်ႈဢၼ်လႆႈ မႃးဢုပ်ႇ ၶႆႈၼႄ တင်းမူတ်းမီး 200 ပၢႆ။

ဝၼ်းတီႈ 27-31/12/2018 သင်ၶၸဝ်ႈ ၸတ်းႁဵတ်းပၢင်ၵုမ်ၶွၼ်ႇၾရႅၼ်ႉလိၵ်ႈလူင် ပွၵ်ႈ ၵမ်း 6 တီႈဝတ်ႉဝိႁၢရ်ဢွင်ႇၶျၢမ်းသႃႇ ၸႄႈဝဵင်းႁူဝ်ပၢင်ႇလူင်(ပၢင်ႇဢူႈ) ၼႂ်းတိူင်းဝဵင်းလိူဝ်ႇ ၶိုၵ်ႉယႂ်ႇလူင် တင်းမူတ်း မီးႁူဝ်ၵူၼ်း ၶဝ်ႈႁူမ်ႈ မွၵ်ႈ 2,500 ၵေႃႉ ဝႃႈၼႆ။

ၸၢႆးသႅင်ဝၼ်း ၽူႈၶဝ်ႈႁူမ်ႈ တၢင်ႇၽိုၼ်လိၵ်ႈ လၢတ်ႈတီႈၽူႈတွႆႇႁွၵ်ႈဝႃႈ “ ဢၼ်ၶႃႈႁဝ်းမႃးတၢင်ႇၽိုၼ်လိၵ်ႈ (ဢုပ်ႇၶႆႈ) သမ်ႉ ၵဵဝ်ႇၵပ်းလွင်ႈၽႃသႃၵႂၢမ်းလၢတ်ႈ ၼႂ်းပွတ်းဢေႊသျိူဝ်ႊၸဵင်ႇၸၢၼ်းဝၢၼ်းဢွၵ်ႇၶႃႈ။ ယူႇတီႈၶႃႈႁဝ်း လႆႈမႃးဢုပ်ႇ ၶႆႈၼႆႉ တေလႆႈဝႃႈ ၸူမ်းသိူဝ်းတႄႉတႄႉ” ဝႃႈၼႆ။

ပၢင်ၵုမ်ၶွၼ်ႇၾရႅၼ်ႉလိၵ်ႈလူင်ပီၼႆႉ ၵမ်ႈၽွင်ႈ ၵမ်ႈၼမ်ဢုပ်ႇလၢတ်ႈတင်းၵႂၢမ်းတႆး၊ ဢၼ်ဢုပ်ႇတၢင်းၵႂၢမ်းဢိင်း ၵလဵတ်ႈလႄႈ တၢင်ႇၽႃသႃၵေႃႈမီး ဝႃႈၼႆ။

ၸၢႆးသႅင်မိူင်း မင်းၵွၼ်း ၽူႈၶဝ်ႈႁူမ်ႈတၢင်ႇၽိုၼ်လိၵ်ႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ဢၼ်ၶႃႈႁဝ်းလႆႈမႃး တၢင်ႇၽိုၼ်လိၵ်ႈၼႆႉသမ်ႉ ၵဵဝ်ႇလူၺ်ႈလွင်ႈပီႈၼွင်ႉတႆး ႁႅင်းၵၢၼ်ယၢၼ်မိူင်း။ လိူဝ်ၼၼ်ႉ ပႃးထႅင်ႈလွင်ႈၵၢၼ်ႁၢင်ႈ ႁႅၼ်း တႃႇပီတေမႃး ပၢင်ၵုမ်လိၵ်ႈလူင်ၶွၼ်ႇၾရႅၼ်ႉၼႆႉ တေဢၢၼ်းၵႂႃႇၸတ်းၼႂ်းမိူင်းထႆး။ ၸုမ်းၵေႃၵမ်ၵၢၼ် တၢင်း ၾၢႆႇမိူင်း တႆးႁဝ်းသေ လႄႈ တင်းၵေႃၵမ်ၵၢၼ် တင်းမိူင်းထႆး တေဢုပ်ႇဢူဝ်းငူပ်ႉငီႉၵၼ်သေ တေပဵၼ်လႆႈ မွၵ်ႈၵႃႈႁိုဝ် ဢၼ်ဝႃႈၼၼ်ႉၵေႃႈ တေသပ်းလႅင်းၸီႉၸမ်ႈၼႄထႅင်ႈၵမ်းၼိုင်ႈၶႃႈ” ဝႃႈၼႆ။

ပၢင်ၵုမ်ၶွၼ်ႇၾရႅၼ်ႉလိၵ်ႈလူင် ပွၵ်ႈၵမ်း 6 ၼႆႉ မီးၽူႈလူင်ႉလႅၼ်ႇလိၵ်ႈလၢႆး ပၢႆပေႇၸဵမ်သင်ၶၸဝ်ႈ၊ ၵူၼ်းမိူင်း ၼွၵ်ႈ မိူင်း/ ၼႂ်းမိူင်း မႃးၶဝ်ႈႁူမ်ႈ တၢင်ႇၽိုၼ်လိၵ်ႈ လႄႈ လဵပ်ႈႁဵၼ်း တင်းမူတ်း မီး 30 မိူင်းပၢႆ၊ မိူၼ်ၼင်ႇ မိူင်းတႆး၊ မိူင်းမၢၼ်ႈ၊ မိူင်းထႆး၊ မိူင်းၶႄႇ၊ မိူင်းဢိၼ်ႊၻီႊယိူဝ်ႊ၊ မိူင်း UK၊ မိူင်းဢိင်ႇၵလၼ်ႇလႄႈ ဢိၵ်ႇထႅင်ႈလၢႆလၢႆမိူင်း ဝႃႈၼႆ။

ၸၢႆးသႅင်ဝၼ်း လၢတ်ႈဝႃႈ “ ဢၼ်ၶႃႈႁဝ်းတွင်းလႆႈတႄႉ ၽိုၼ်လိၵ်ႈလူင် ဢၼ်မႃးတၢင်ႇသမ်ႉ တင်းမူတ်းမီး 192 ၽိုၼ်၊ ပိုၼ်း 17 ႁူဝ် တင်းမူတ်း တေမီး 209 ႁူဝ်။ ပၢင်ၵုမ်ၼႆႉ မိူၼ်ၼင်ႇ ပၢင်ၵုမ်လိၵ်ႈလူင်၊ ပၢင်ၵုမ်ပိုၼ်းလႄႈ ပၢင်ၵုမ်ၸဝ်ႈၸရေးလႄႈ သင်ၶ တင်း ၽူႈလူင်ႉ လႅၼ်ႇၼွၵ်ႈမိူင်း ဢုပ်ႇၵုမ်ၵၼ် လွင်ႈၵဵပ်းသဵၼ်ႈမၢႆလိၵ်ႈလူင် ဢၼ်ၵဵပ်းမႃးယဝ်ႉလႄႈ ဢၼ်တေၵဵပ်းၵႂႃႇ ထႅင်ႈဝၼ်း တႃမိူဝ်းၼႃႈ ၸိူဝ်းၼႆႉ ပိူင်လူင်မၼ်းတႄႉ မီး 3 လွင်ႈၼႆႉ ဢၼ်ဢုပ်ႇၵုမ်ၵၼ်ၵႂႃႇ” ဝႃႈၼႆ။

ပၢင်ၵုမ်ၶွၼ်ႇၾရႅၼ်ႉလိၵ်ႈလူင်ၼႆႉ တႄႇၸတ်းႁဵတ်းမႃး မိူဝ်ႈပီ 2013 တီႈတႃႈၵုင်ႈ(ယၼ်ႇၵုင်ႇ)၊ ပီ 2014 တီႈဝဵင်း လၢႆး ၶႃႈ၊ ပီ 2015 တီႈၸႄႈဝဵင်းလႃႈသဵဝ်ႈ၊ ပီ 2016 မၼ်းတလေး၊ ပီ 2017 သမ်ႉ ဝဵင်းပၢင်လူင် လႄႈ ပီ 2018 သမ်ႉ ၸတ်း ႁဵတ်းတီႈ ၸႄႈဝဵင်းႁူဝ်ပၢင်ႇလူင် ၸဵမ်ၸိူဝ်းၼႆႉ။