သိုၵ်း RCSS တင်း SSPP ၶဵင်ႈၶႅင်ၵၢၼ်သိုၵ်းတေႃႇၵၼ် လၢႆဝၼ်းထပ်းၵၼ်မႃး လေႃႇတိုၵ်းပိုတ်းယိုဝ်းၵၼ် ႁိမ်းဝၢၼ်ႈၵူၼ်းမိူင်းယူႇသဝ်းလႄႈ ႁဵတ်းႁႂ်ႈၵူၼ်းမိူင်း လႆႈပၢႆႈယၢၼ်ႁိူၼ်းယေးတီႈယူႇ 1500 ပၢႆ – လႆႈႁူႉၸွမ်းၶၢဝ်ႇပိုၼ်ႉတီႈ ၼင်ႇၼႆ။
မိူဝ်ႈဝၼ်းတီႈ 27/12/2018 ၼႆႉ သိုၵ်း RCSS တင်း SSPP ၶဵင်ႈၶႅင်ၵၢၼ်သိုၵ်းတေႃႇၵၼ် လႄႈ ၵူၼ်းမိူင်း 439 မေႃႈၶဝ်ႈ၊ ႁူဝ်ၵူၼ်း 1522 ၵေႃႉ ၸိူဝ်းယူႇၼႂ်းၸႄႈဝဵင်းသီႇပေႃႉ ထုင်ႉတူင်ႇၸၢၼ်းၸိူဝ်းၼၼ်ႉ လႆႈပၢႆႈမီးယူႇတီႈ ဝတ်ႉပၢင်သိမ် ၊ ဝတ်ႉၼႃးသၢင်း(ဝတ်ႉၵွင်းႁုင်း)၊ ဝတ်ႉသွင်ၵႄး တင်း ဝတ်ႉၸေႈၶၢၼ် ၸိူဝ်းၼႆႉ။
ၵူၼ်းပၢႆႈၽေးသိုၵ်း တီႈၼႃးမၢၵ်ႇၶေႃ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ပၢင်တိုၵ်းၼႆႉ တႄႇပဵၼ်မႃး မိူဝ်ႈဝၼ်းတီႈ 24 ၶႃႈယဝ်ႉ။ တေႃႇထိုင်ယၢမ်းလဵဝ် ပၢင်တိုၵ်းၼႆႉ တိုၵ်ႉပဵၼ်ၵၼ်ယူႇ ပႆႇယဵၼ်။ မိူဝ်ႈၼႆႉ ဝၼ်းတီႈ 27 ၵေႃႈ ပၢင်တိုၵ်း ပဵၼ်ႁိမ်းဝၢၼ်ႈတူၼ်ႈၵႅင်းထႅင်ႈ ၵူၼ်းဝၢၼ်ႈ 34 ၵေႃႉ လႆႈဢွၼ်ပၢႆႈဢွၵ်ႇမႃးထႅင်ႈ” ဝႃႈၼႆ။
ၵူၼ်းဝၢၼ်ႈ ဢၼ်ပၢႆႈၽေးမႃးသွၼ်ႈဝႆႉတီႈ ဝတ်ႉၼႃးမၢၵ်ႇၶေႃသမ်ႉ ပဵၼ်ၵူၼ်းဝၢၼ်ႈတူၼ်ႈၵႅင်း၊ ႁူဝ်ၼႃး၊ ၼႂ်းလူင် လင်ႁိူၼ်း 264 လင်၊ ၸၢႆး 300 ၵေႃႉ၊ ယိင်း 498 ၵေႃႉ – ၶဝ်ၸိူဝ်းၼႆႉပၢႆႈမႃးၸဵမ်မိူဝ်ႈ ဝၼ်းတီႈ 24/12/2018။
ယၢမ်းလဵဝ်တီႈ ဝတ်ႉၼႃးမၢၵ်ႇၶေႃ – မီး 798 ၵေႃႉ၊ ဝတ်ႉၼႃးသၢင်း 286 ၵေႃႉ၊ ဝတ်ႉပၢင်သိမ် 40 ၵေႃႉ၊ ဝတ်ႉသွင်ၵႄး 83 ၵေႃႉ၊ ဝတ်ႉၸေႈၶၢင် 315 ၵေႃႉ ။
ၼႂ်းၸိုင်ႈတႆး ပွတ်းႁွင်ႇယၢမ်းလဵဝ် သိုၵ်း RCSS တင်း SSPP ႁိမ်ပိုၼ်ႉတီႈၼႃႈလိၼ်သိုၵ်းၵၼ်၊ ၾၢႆႇသိုၵ်းလူင် ပွင်ၸိုင်ႈမၢၼ်ႈသမ်ႉဝႃႈတေၵေႃႇသၢင်ႈလွင်ႈငမ်းယဵၼ် တင်း ၸုမ်းသိုၵ်းဢူၺ်းလီပွတ်းႁွင်ႇ ၼႆ သေ ပိုၼ်ၽၢဝ်ႇ ၵိုတ်းတိုၵ်း ဝႆႉ ၶၢဝ်းတၢင်း 4 လိူၼ် ( 21/12/2018 – 30/4/2019) ။ ယင်းပိုၼ်ၽၢဝ်ႇပႃးဝႆႉဝႃႈ သိုၵ်းၸၢဝ်းၶိူဝ်းၵေႃႈ ယႃႇႁႂ်ႈၸႂ်ႉႁႅင်းသိုၵ်းတိုၵ်းယိုဝ်းပေႉၵိၼ်ၵၼ် သင်ပူၼ်ႉပႅၼ် တေႁပ်ႉပုၼ်ႈၽွၼ်းၵႄႈလိတ်ႈၵႂႃႇ ဝႃႈၼႆ။
