ၸုမ်းၶၢဝ်ႇၽူႈတွႆႇႁွၵ်ႈ ၸတ်းႁဵတ်းပၢင်ပွႆး ၵေႃႇတင်ႈၸုမ်း ၶွပ်ႈတဵမ် 27 ပီ ၸတ်းႁဵတ်းပဵၼ်ပွၵ်ႈၵမ်းႁႅၵ်ႈ မီးၽူႈၶဝ်ႈႁူမ်ႈ ႁိမ်း 200 ၵေႃႉ။
ဝၼ်းတီႈ 24/12/2018 ယၢမ်းၵၢင်ၼႂ် 9 မူင်း ထိုင် 12 မူင်း ၸုမ်းၶၢဝ်ႇၽူႈတွႆႇႁွၵ်ႈ (SHAN) ၸတ်းႁဵတ်းဝၼ်းၵိူတ်ႇ/ ဝၼ်း ၵေႃႇတင်ႈ ၸုမ်းၶၢဝ်ႇမႃး ၶွပ်ႈတဵမ် 27 ပီ တီႈႁူင်းႁေႃ ၵေႃလိၵ်ႈလၢႆးလႄႈ ၾိင်ႈငႄႈတႆး ဝဵင်းလူင်တူၼ်ႈတီး ၸိုင်ႈတႆး ပွတ်းၸၢၼ်း။
ၸဝ်ႈၶိုၼ်းသႂ် ၸႂ်ယဵၼ် ၽူႈၵေႃႇတင်ႈၸုမ်းၶၢဝ်ႇၽူႈတွႆႇႁွၵ်ႈ လၢတ်ႈဝႃႈ “ ပေႃးဢဝ်ပီၵေႃႇတင်ႈ ၸုမ်းၽူႈ တွႆႇႁွၵ်ႈၼႆႉ တႄႉ မၼ်းပဵၼ် 1991 ၵူၺ်းၵႃႈ ဢၼ်ႁဝ်း တႄႇႁဵတ်းမႃး ၵၢၼ်ပိုၼ်ၽၢဝ်ႇ ၵၢၼ်တႅမ်ႈလိၵ်ႈ တႅမ်ႈလၢႆးသေလႄႈ ပိုၼ် ၽႄႈပၼ်ၵူၼ်းမိူင်းႁႂ်ႈႁူႉၼႆတႄႉ ၸဵမ်မိူဝ်ႈ 1984။ 1984 ၼႆႉ ၼႂ်းမုၵ်ႉၸုမ်းႁဝ်း တပ်ႉသိုၵ်းၽွမ်ႉႁူမ်ႈ လုၵ်ႉၾိုၼ်ႉ ၸိုင်ႈ တႆးၼႆႉ ၶဝ်ၵေႃႈပၼ်ၼႃႈတီႈပုၼ်ႈၽွၼ်းဝႃႈ ႁႂ်ႈပဵၼ်ၾၢႆႇသူၼ်းတုမ် 1991 ၶုၼ်သႃႇ ၸင်ႇပွႆႇပၼ်ႁဝ်း ၸုမ်းၶၢဝ်ႇလွတ်ႈ လႅဝ်း” ဝႃႈၼႆ။
ၼႂ်းပၢင်ပွႆးၶွပ်ႈတဵမ် 27 ပီ ၽူႈတွႆႇႁွၵ်ႈၼႆႉ မီးၽူႈယႂ်ႇၵူၼ်းလူင် ၶဝ်ႈႁူမ်ႈမွၵ်ႇလၢတ်ႈၶေႃႈ မိူၼ်ၼင်ႇ ၸဝ်ႈၶိုၼ်းသႂ် ၸႂ် ယဵၼ် ၽူႈဢွၼ်ၵေႃႇတင်ႈ ၸုမ်းၶၢဝ်ႇၽူႈတွႆႇႁွၵ်ႈ၊ ၸဝ်ႈၶႂၢၼ်မိူင်း၊ ႁိုၼ်း ၵႃယၢင်းလႄႈ ၸွမ်ၽွင်းလူင်မိူင်းတႆး ၻွၵ်ႊ တိူဝ်ႊလိၼ်းထုတ်ႉ ၸဵမ်ၸိူဝ်းၼႆႉ မွၵ်ႇလၢတ်ႈၶေႃႈၵႂၢမ်း။
ၻွၵ်ႊတိူဝ်ႊလိၼ်းထုတ်ႉ လၢတ်ႈဝႃႈ “ သိုဝ်ႇၶၢဝ်ႇၼႆႉ ပဵၼ်သင်ႉလၵ်းထီႉ 4 ၼႂ်းၵၢၼ်ပူၵ်းပွင်ၸိုင်ႈမိူင်း။ တႅမ်ႈၶၢဝ်ႇ၊ ပိုၼ် ၽၢဝ်ႇ လႆႈလွတ်ႈလႅဝ်း ပိူင်လူင်ယႃႇႁႂ်ႈပဵၼ်ၶၢဝ်ႇ ဢၼ်ႁဵတ်းႁႂ်ႈပဵၼ်ပၼ်ႁႃၼႂ်းၵႄႈ ၸၢဝ်းၶိူဝ်း” ဝႃႈၼႆ။
လိူဝ်ၼၼ်ႉ မီးၸုမ်းတူင်ႉၼိုင်တူင်ႇဝူင်းတႆး CSO ၸႄႈဝဵင်းတူၼ်ႈတီး၊ ပႃႇတီႇၵၢၼ်မိူင်းလႄႈ လုမ်းၵပ်းသၢၼ် RCSS၊ ၽူႈ လူင်ႉလႅၼ်ႇလိၵ်ႈလၢႆး ဢိၵ်ႇထႅင်ႈလၢႆလၢႆၸုမ်း ၸိူဝ်းၼႆႉၶဝ်ႈႁူမ်ႈပၼ်ႁႅင်း။
ၸုမ်းၶၢဝ်ႇၽူႈတွႆႇႁွၵ်ႈၼႆႉ တႄႇၵေႃႇတင်ႈမႃး မိူဝ်ႈပီ 1991 လိူၼ်ၻီႊသႅမ်ႊၿိူဝ်ႊ ဝၼ်းတီႈ 27 မၵ်းမၼ်ႈပဵၼ်မႃး ဝၼ်း ဢၼ်တင်ႈၸုမ်းၽူႈတွႆႇႁွၵ်ႈ။
တီႈပၢင်ၼၼ်ႉ မီးၸဝ်ႈၽူႈမီးၼမ်ႉၸႂ် လၢႆလၢႆၸဝ်ႈ မိူၼ်ၼင်ႇ ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းတူၼ်ႈတီး၊ ၸဝ်ႈ ၸၢႆးဢူး RCSS ၊ ၸဝ်ႈမျႃႉဝတီႇ၊ ၸဝ်ႈႁေႇမႃႇတႅၵ်ႈ၊ ၸုမ်းၼၢင်းယိင်းတႆး၊ ၸုမ်းမႄႈႁိူၼ်းၼုမ်ႇလႄႈ ဢိၵ်ႇလၢႆၸဝ်ႈ လၢႆၵေႃႉ ႁူမ်ႈလူႇတၢၼ်း ပၼ်ငိုၼ်းၵွင်ၵၢင် တႃႇၵေႃႇသၢင်ႈလုမ်း ၸုမ်းၶၢဝ်ႇၽူႈတွႆႇႁွၵ်ႈ တီႈဝဵင်းတူၼ်ႈတီး။
