ၸႄႈဝဵင်းလွၵ်ႉၸွၵ်ႇ ၸႄႈတွၼ်ႈတူၼ်ႈတီးၼၼ်ႉ လုၵ်ႈဢွၼ်ႇ ဢႃယု 2 ၶူပ်ႇ ၵေႃႉၼိုင်ႈ ႁၢႆၵႂႃႇ မိူဝ်ႈဝႃး တေႃႇဝၼ်း မိူဝ်ႈၼႆႉ ပေႃႈမႄႈသေႃႉႁႃ ပႆႇႁၼ် ဝႃႈၼႆ။
ဝၼ်းတီႈ 22/12/2018 ယၢမ်းဝၢႆးဝၼ်း 2 မူင်း လုၵ်ႈဢွၼ်ႇ ၸိုဝ်ႈႁွင်ႉ ၸၢႆးဢွၼ်ႇ ဢႃယု 2 ၶူပ်ႇ ပဵၼ်လုၵ်ႈၸၢႆး ၸၢႆး သၢင်ႇၶမ်းလႄႈ ၼၢင်းသႅင် ႁၢႆတူဝ်ၵႂႃႇ တီႈၼႂ်းသူၼ်ႁႆႈ ဝၢၼ်ႈလိၼ်လမ် ဢိူင်ႇလိၼ်လမ် ၸႄႈဝဵင်းလွၵ်ႉၸွၵ်ႇ ၸႄႈ တွၼ်ႈတူၼ်ႈတီး ၸိုင်ႈ တႆးပွတ်းၸၢၼ်း။
ၸၢႆးဢွင်ႇ ၽူႈပွင်ၵၢၼ် ၼႂ်းၵေႃလိၵ်ႈလၢႆးလႄႈ ၾိင်ႈငႄႈတႆး ၸႄႈဝဵင်းလွၵ်ႉၸွၵ်ႇ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၶမ်ႈဝႃးၼႆႉ လုၵ်ႈဢွၼ်ႇၵေႃႉၼၼ်ႉ တင်း ပီႈဢၢႆႈမၼ်း လဵၼ်ႈၵေႃႉၵၼ် ၼႂ်းသူၼ် ပေႃႈမႄႈလုၵ်ႈ ဢွၼ်ႇ ၼၼ်ႉသမ်ႉ ၵႂႃႇႁဵတ်းသူၼ်ၶႃ ပီႈၼွင်ႉလဵၼ်ႈၵေႃႉၵၼ် ၼႂ်းသူၼ်။ ၵေႃႉပဵၼ်ပီႈဢၢႆႈသမ်ႉ ၶႂ်ႈၼွၼ်းသေ ၵၢၼ်းၶိုၼ်ႈ ၵႂႃႇၼွၼ်းၼိူဝ်သုမ်ႉ ႁဵတ်းၼၼ် ၽိူဝ်ႇလူင်းမႃးၵေႃႈ ဢမ်ႇႁၼ်မႅၼ်ႈ ၼွင်ႉၸၢႆးမၼ်း” ဝႃႈၼႆ။
ၵဵဝ်ႇလူၺ်ႈလွင်ႈၼႆႉ ၵေႃႉပဵၼ်ပေႃႈမႄႈသမ်ႉ ႁဵတ်းၵၢၼ်ၵႆၶဝ် သွင်ပီႈၼွင်ႉ ၽိူဝ်ႇမႃးၸူးထဵင် ႁၼ်ၵေႃႉပဵၼ် ပီႈဢၢႆႈ မၼ်းၵေႃႉလဵဝ်၊ သိုပ်ႇသေႃႉႁႃၵေႃႉပဵၼ်ၼွင်ႉၵေႃႈ ဢမ်ႇႁၼ် တေႃႇထိုင်ဝၼ်းမိူဝ်ႈၼႆႉ ပဵၼ်ၼမ်ႉႁူၼမ်ႉတႃ ဝႆႉယူႇ ဝႃႈၼႆ။
သင်ဝႃႈ ၽူႈလႂ်/ ၵေႃႉလႂ်၊ ၸုမ်းလႂ် ထူပ်းႁၼ် တူဝ်လုၵ်ႈဢွၼ်ႇ ၸိုဝ်ႈႁွင်ႉ ၸၢႆးဢွၼ်ႇ ဢႃယု 2 ၶူပ်ႇၼႆႉၸိုင် ၶႅၼ်းတေႃႈ ၵပ်းသိုပ်ႇ ပွင်ႇပၼ် တီႈမၢႆၾူၼ်း 096-94954174 (ၸၢႆးဢွင်ႇ) ဝႃႈၼႆ။
