ၶွမ်ႊမတီႊလႅၼ်လိၼ်ထႆး – မၢၼ်ႈႁူပ်ႉထူပ်းဢုပ်ႇဢူဝ်းၵၼ် တႃႇႁူမ်ႈၵၼ်ၵႄႈလိတ်ႈပၼ်ႁႃၸွမ်း လႅၼ်လိၼ်လၢႆလွင်ႈ ပွၵ်ႈၵမ်းတီႈ 94 တီႈမႄႈသၢႆ။

ဝၼ်းတီႈ 19/12/2018 သိုဝ်ႇၶၢဝ်ႇ Maesai ပိုၼ်ၽၢဝ်ႇဝႃႈ ၶွမ်ႊမတီႊလႅၼ်လိၼ်ထႆး – မၢၼ်ႈ ဢၼ်မီးၸဝ်ႈသိုၵ်းလူင်ၶျႃႊတရီႊ သငူၼ်ႊထမ်ႊ ၾၢႆႇထႆး ။ ၸဝ်ႈသိုၵ်းလူင် ဢွင်ႇလိၼ်းဢူး ၾၢႆႇမၢၼ်ႈ ဢွၼ်ဢဝ်ၶွမ်ႊမတီႊလႅၼ်လိၼ်တင်းသွင်ၾၢႆႇႁူပ့်ဢုပ်ႇၵၼ် တီႈႁွင်ႈပၢင်ၵုမ်တူၼ်ႈတီး  ႁူင်းႁႅမ်းမႄႈၶူင် Delta  ။

ၼႂ်းပၢင်ၵုမ်ၼၼ့် ဢုပ်ႇဢူဝ်းၵၼ်လၢႆလွင်ႈမိူၼ်ၼင်ႇ ၸွမ်းၶႆႈႁႃတူဝ်ၵူၼ်းဢၼ်ႁဵတ်းၽိတ်း ၼႂ်းမိူင်းထႆးသေပၢႆႈၶဝ်ႈမိူင်းႁူမ်ႈတုမ်၊ ႁူမ်ႈၵၼ်ၸတ်းႁဵတ်းပၢင်ပွႆးႁူမ်ၸူမ်းႁပ့်တွၼ်ႈပီမႂ်ႇ တီႈၶူဝ်မိုတ်ႈၵိုဝ်းမၢႆ 1 မႄႈသၢႆ – တႃႈၶီႈလဵၵ်း ၾၢႆႇမိူင်းထႆး ၊ တႃႇႁူမ်ႈၵၼ်ႁႃလၢႆးတၢင်းႁႄ့ၵင်ႈၾႆးပႃႇ ၸိူဝ်းၼႆ ။

မိူဝ်ႈဝၼ်းတီႈ 17/08/2018 ၶွမ်ႊမတီႊလႅၼ်လိၼ်ထႆး – မၢၼ်ႈ ၸတ်းႁဵတ်းပၢင်ႁူပ့်ထူပ်း ဢုပ်ႇဢူဝ်းၵၼ်ပွၵ်ႈၵမ်း 93 တီႈႁွင်ႈပၢင်ၵုမ် သၢၼ်ႊမုၼ်ႊဢႃႊၶႃႊ ဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇ ဢုပ်ႇဢူဝ်းၵၼ်တႃႇႁူမ်ႈ ၵၼ်ၵႄႈလိတ်ႈပၼ်ႁႃလႄႈ ပူၵ်းပွင်ၸွမ်းလႅၼ်လိၼ် ။