ၼမ်ႉႁွင်ႈ ဢၼ်လဵင်ႉၼႃးၵူၼ်းမိူင်းယဵၼ်ၼမ်ႉတူႈ 1,700 ဢေႊၶိူဝ်ႊပၢႆၼၼ်ႉ ၺႃးလိၼ်ၵူၼ်ႇတဵင် ဢိုတ်းၶင်လႄႈ ၸဝ်ႈၼႃးႁူပ်ႉတၢင်းယၢပ်ႇ။ ၽူႈတႅၼ်းၸႄႈမိူင်း ၼမ်ႉတူႈ ယွၼ်းၼႂ်းသၽႃးႁႂ်ႈလူင်ပွင်ၸိုင်ႈၸွႆႈသိူဝ်ႇပိုၼ်ႉၶွၼ်ႊၵ ရိတ်ႉပၼ်ၶိုၼ်း။
ဝၼ်းတီႈ 18/12/2018 ၼၢင်းၸၢမ်ႁွမ် ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ 2 ၸႄႈဝဵင်းၼမ်ႉတူႈ တွင်ႈထၢမ် ၼႂ်းသၽႃးၸႄႈမိူင်းတႆး ပွၵ်ႈၵမ်း 2 ၵမ်းထူၼ်ႈ 12 တီႈလုမ်းသၽႃးၸႄႈမိူင်းတႆး ၸႄႈဝဵင်းတူၼ်ႈတီး ၸိုင်ႈတႆးပွတ်း ၸၢၼ်း။ ၸွင်ႇလူင်ပွင်ၸိုင်ႈ တေမီးၽႅၼ်ၵၢၼ် ၵေႃႇသၢင်ႈ သိူဝ်ႇၶွၼ်ႊၵရိတ်ႉပၼ် တီႈၼမ်ႉႁွင်ႈ ဢၼ်လေႃႇ လဵင်ႉ တူင်ႈၼႃး ၵူၼ်းမိူင်း တၢင်းထုင်ႉမိူင်းယဵၼ် တႃႇတူင်ႈၼႃး 1,700 ဢေႊၶိူဝ်ႊပၢႆၼၼ်ႉ ဝႃႈၼႆ။
ၼၢင်းၸၢမ်ႁွမ် ၽူႈတႅၼ်းပႃႇတီႇႁူဝ်သိူဝ် SNLD ၼမ်ႉတူႈ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈႁူဝ်လိူၼ်သႅပ်ႊထႅမ်ႊၿိူဝ်ႊ ၼၼ်ႉ ၾူၼ်တူၵ်းႁႅင်းလႄႈ လိၼ်ၵူၼ်ႇထူမ်ၶင်ၼမ်ႉႁွင်ႈ ဢၼ်လဵင်ႉၼႃးၵူၼ်းမိူင်းယဵၼ် တႃႇ 1,700 ဢေႊၶိူဝ်ႊပၢႆ။ လိၼ်ထူမ်ၶင်ဝႆႉၼၼ်ႉသုင် မွၵ်ႈ 8 ထတ်း(ပေႇ) လႄႈ ၼမ်ႉဢမ်ႇလဵင်ႉထိုင်လႆႈ တူင်ႈၼႃးၵူၼ်းမိူင်း။ သမ်ႉပဵၼ်ၶၢဝ်း ၶဝ်ႈမၢၵ်ႇ။ လူဝ်ႇၼမ်ႉသႂ်ႇၼႃးလႄႈ ႁဵတ်းႁႂ်ႈၸဝ်ႈၼႃး ႁူပ်ႉတၢင်းယၢပ်ႇၽိုတ်ႇယႂ်ႇလူင်” ဝႃႈၼႆ။
လိၼ်ဢၼ်ထူမ်ၶင်ၼမ်ႉႁွင်ႈၼၼ်ႉ သုင်၊ ၼႃႁႅင်းလႄႈ ဢဝ်ႁႅင်းၵူၼ်းၶုတ်းၵေႃႈ ဢမ်ႇၸၢင်ႈ။ တီႈၼမ်ႉတူႈသမ်ႉ ဢမ်ႇမီးႁွင်ႈၵၢၼ်ႁွင်ႈၼမ်ႉလႄႈ ၾၢႆ လႆႈႁွင်ႉလႃႈသဵဝ်ႈမႃး ၸွႆႈၵႄႈလိတ်ႈပၼ်။ ယၢမ်းလဵဝ်တႃႇႁႂ်ႈၼမ်ႉႁွင်ႈလႆၶၢဝ်း ယၢဝ်းၼၼ်ႉ ၸင်ႇလႆႈတွင်ႈထၢမ်တုၵ်းယွၼ်းလူင်ပွင်ၸိုင်ႈႁဵတ်းပၼ် ၼမ်ႉႁွင်ႈသိူဝ်ႇၶွၼ်ႊၵရိတ်ႉ ဝႃႈၼႆ။
ၸၢႆးလူင်ၵျေႃႇ ၽွင်းလူင်ၾၢႆႇၽုၵ်ႇသွမ်ႈလႄႈ ၾၢႆ/ ၼမ်ႉ တွပ်ႇလၢတ်ႈၼႂ်းပၢင်ၵုမ်သၽႃးဝႃႈ “ တေႁဵတ်း ပၼ်သိူဝ်ႇ ပၼ်ၵႂႃႇ။ တေႃႈလဵဝ် ဢၼ်ႁၢင်ႈႁႅၼ်းႁဵတ်းဝႆႉၸူဝ်ႈၶၢဝ်းၼႆႉတႄႉ တႄႇႁဵတ်းၵႂႃႇယဝ်ႉ။ ပီၼႃႈ တေသိုပ်ႇႁဵတ်းပၼ်ၵႂႃႇ ႁႂ်ႈပေႃးယဝ်ႉမူတ်းမူတ်း” ဝႃႈၼႆ။
မိူဝ်ႈႁူဝ်လိူၼ်သႅပ်ႊထႅမ်ႊပိူဝ်ႊ ဝၼ်းတီႈ 01 ၼႆႉမႃး ယွၼ်ႉၾူၼ်တူၵ်းႁၢဝ်ႈႁႅင်းသေ လိၼ်ၵူၼ်ႇသႂ်ႇၼႂ်းၼမ်ႉႁွင်ႈ ဢၼ်လေႃႇလဵင်ႉတူင်ႈၼႃး ၵူၼ်းမိူင်း ပွတ်းထုင်ႉမိူင်းယဵၼ် တႃႇ 1,730 ဢေႊၶိူဝ်ႊၼၼ်ႉသေ ၸဝ်ႈၼႃး ထူပ်းတၢင်း ယၢပ်ႇၽိုတ်ႇ လွင်ႈၼမ်ႉတႃႇတေလဵင်ႉၼႂ်းတူင်ႈၼႃး ဝႃႈၼႆ။
ၼၢင်းၸၢမ်ႁွမ် လၢတ်ႈဝႃႈ “ တွၼ်ႈတႃႇတေလႆႈၾႆးၾႃႉလႅင်း ၼႂ်းထုင်ႉမိူင်းယဵၼ်ၼႆႉၵေႃႈ လႆႈၸႂ်ႉၼမ်ႉႁွင်ႈၼႆႉသေ ပၼ်ႇႁဵတ်းႁႅင်းၾႆးၾႃႉ (ရေအားလျှပ်စစ်) ပၼ်ၵူၼ်းမိူင်းမႃး” ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ