ပႃႇတီႇႁူဝ်သိူဝ် ၸႄႈဝဵင်းသီႇပေႃႉ မွပ်ႈယိုၼ်ႈ ဝႂ်ယွင်ႈယေႃး ပၼ်ၸုမ်းၸိူဝ်းၸွႆႈထႅမ် ဢၼ်သွၵ်ႈႁႃ တူဝ်ၼၢင်းၵဝ်ႊရီႊ (ၵူဝ်ႊရီႊယိူဝ်ႊ) ဢၼ်ၸူမ်ၼမ်ႉႁၢႆၵႂႃႇ မိူဝ်ႈဝၼ်းတီႈ 23/11/2018 ၼႂ်းၼမ်ႉတူႈၼၼ်ႉ။
ဝၼ်းတီႈ 18/12/2018 ယၢမ်းဝၢႆးဝၼ်း ပႃႇတီႇႁူဝ်သိူဝ် ၸႄႈဝဵင်းသီႇပေႃႉ SNLD ၸတ်းႁဵတ်းပၢင်မွပ်ႈယိုၼ်ႈသူး ဝႂ်ယွင်ႈ ယေႃး ပၼ် ၸုမ်းၾၢႆႇၸွႆႈထႅမ် ဝဵင်းမၼ်းတလေး၊ ဝူၺ်ႇလူႉၵျေႃႇၽွင်ႊၻေႊသျိၼ်ႊ၊ ၸုမ်းၼေႇသီးမၶျႃး ပရႁိတ၊ ၸုမ်းၵူၼ်းၼုမ်ႇၾၢႆႇၸွႆႈထႅမ် သီႇပေႃႉ ဢွင်ႈတီႈလုမ်းပႃႇတီႇႁူဝ်သိူဝ် ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ ဝႃႈၼႆ။
ၸၢႆးလၢဝ်သႅင် ၽူႈၼမ်းၼႂ်း ပႃႇတီႇႁူဝ်သိူဝ် ၸႄႈဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ ယူႇတီႈပႃႇတီႇႁူဝ်သိူဝ် ႁဝ်း ၶႃႈ တီႈသီႇပေႃႉ ယွၼ်းတၢင်းၸွႆႈထႅမ်ၵႂႃႇတီႈၸုမ်းမၢၼ်ႈၶဝ်လႄႈ ၸုမ်းၸွႆႈထႅမ် ၵူၼ်းထူပ်းၽေး တီႈသီႇပေႃႉသေ ၶဝ် ၵေႃႈမႃးႁႃပၼ်၊ ၸွမ်းသူင်ႇပၼ်။ ဢမ်ႇဢဝ် ငိုၼ်းသေပျႃး။ ၶဝ်ၵေႃႈ ၶတ်းၸႂ် တဵမ်ထူၼ်ႈၵၼ်ၶႃႈယဝ်ႉ သွၵ်ႈႁႃ လမ်ၼမ်ႉ ၸဵမ်ၸိူဝ်းၼႆႉ။ တင်းဝူၺ်ႇလူႉၵျေႃႇ ၽွင်ႊၻေႊသျိၼ်ႊသေ တင်းၵူဝ်ႇလၢႆႇမဵဝ်းဢူးသေ လႆႈၶတ်းၸႂ်လမ် ၼမ်ႉႁႃတႄႉတႄႉဝႃႈဝႃႈ ႁဝ်းၶႃႈၵေႃႈ ယိၼ်းၸူမ်းၶွပ်ႈၸႂ်သေယႂ်ႇၼမ်သေ ယူႇတီႈပႃႇတီႇႁဝ်း လႆႈတွၼ်ႈပၼ် ဝႂ်ယွင်ႈ ယေႃးၵႂႃႇ” ဝႃႈၼႆ။
Miss Houng Young Heo ဢႃယု 40 ပီပၢႆၼႆႉ ပဵၼ်ၸၢဝ်းၶိူဝ်း ၵဝ်ႊရီႊ မႃးဢႅဝ်ႇယဵမ်ႈ ဝဵင်းသီႇပေႃႉ၊ လူင်းလဵၼ်ႈ ၼမ်ႉတူႈသေ လႆႈၸူမ်ၼမ်ႉၵႂႃႇ မိူဝ်ႈဝၼ်းတီႈ 23/11/2018 တေႃႇထိုင်ယၢမ်းလဵဝ် ဢမ်ႇႁၼ်တူဝ်တၢႆ လိပ်း ဝႃႈၼႆ။
ၸၢႆးလၢဝ်သႅင် လၢတ်ႈဝႃႈ “ ယူႇတီႈၸုမ်းပႃႇတီႇႁဝ်းၶႃႈ တေပႆႇၸၢင်ႈသိုပ်ႇႁႃထႅင်ႈၶႃႈတႄႉ တေၵိုတ်းဝႆႉၵမ်းၼိုင်ႈၵွၼ်ႇ။ ၵူၼ်းဢၼ်ႁၢႆၵႂႃႇၼၼ်ႉ ဢမ်ႇၸႂ်ႈႁၢႆၸွမ်းၵွင်း /လွႆ၊ ၸွမ်းၵုင်းၼႃႇၼေႃႈ ပေႃးႁၢႆၸိူင်ႉၼၼ်တႄႉ တေဢွၼ်ၵၼ်ႁႃၵၼ် ငၢႆႈယူႇ။ သမ်ႉၸူမ်ၼမ်ႉႁၢႆၼႆ ၵူႈၵေႃႉႁႃဢမ်ႇ လႆႈ လူဝ်ႇလႆႈႁႃၵူၼ်း ဢၼ်လမ်ၼမ်ႉၵတ်ႉၶႅၼ်ႇၵွၼ်ႇ ၸင်ႇတေလႆႈ” ဝႃႈၼႆ။
ၵဵဝ်ႇလူၺ်ႈလွင်ႈၼႆႉ တွၼ်ႈတႃႇတေထူပ်းႁၼ်တူဝ်မၼ်းၼၢင်းၼႆႉ ယူႇတီႈၾၢႆႇၸဝ်ႈၼႃႈတီႈၼႂ်းၸႄႈဝဵင်းသီႇပေႃႉ၊ ၾၢႆႇၽွင်းတၢင် မိူင်းၵူဝ်ႊရီႊယိူဝ်ႊ လႄႈ ၽူႈလမ်ၼမ်ႉၵတ်ႉၶႅၼ်ႇလၢႆလၢႆၵေႃႉၵေႃႈ လႆႈၶတ်းၸႂ် လမ်းႁႃ သွၵ်ႈႁႃ ၸွမ်း ၼႂ်းၼမ်ႉတူႈ တီႈလိုၵ်ႉ တီႈၶူင်ႈ ၸဵမ်ၸိူဝ်းၼႆႉ။
ၼၢင်းယိင်း ၵဝ်ႊရီႊ ဢၼ်ၸူမ်ႁၢႆ ၼႂ်းၼမ်ႉတူႈၼႆႉ မၼ်းၼၢင်းပဵၼ်ဢိၼ်ႊၵျိၼ်ႊၼီႊယိူဝ်ႊ ႁွင်ႈၵၢၼ်ၾၢႆႇ မႄးၶိူင်ႈ ဝိၼ် ဝႃႈၼႆ။
