ဝၼ်းႁႅင်းၵၢၼ်ယၢၼ်မိူင်းလုမ်ႈၾႃႉ ၸုမ်းတူင်ႉၼိုင်လႄႈႁႅင်းၵၢၼ်ႁူပ်ႉၵၼ် ႁႃတၢင်းၵႄႈပၼ်ႁႃၵႃႈၸၢင်ႈလႄႈသုၼ်ႇလႆႈ

ၸုမ်းတူင်ႉၼိုင်လွင်ႈႁႅင်းၵၢၼ် ႁူမ်ႈၵၼ်ၸတ်းႁဵတ်းပၢင်ႁူပ်ႉထူပ်းဢုပ်ႇဢူဝ်းလွင်ႈပၼ်ႁႃႁႅင်းၵၢၼ်ယၢၼ်မိူင်းတီႈၵဵင်းမႆႇ ၽူႈၶဝ်ႈႁူမ်ႈ 70 ပၢႆ ဢုပ်ႇဢူဝ်းလွင်ႈၵႃႈၸၢင်ႈလႄႈ လွင်ႈသုၼ်ႇလႆႈႁႅင်းၵၢၼ်။

ဝၼ်းတီႈ 18 /12/2018 ၸုမ်းတူင်ႉၼိုင်ၾၢႆႇႁႅင်းၵၢၼ်ယၢၼ်မိူင်း မိူၼ်ၼင်ႇ ၸုမ်းၶူင်းၵၢၼ်ပၢႆးယူႇလီလႄႈ ပၼ်တၢင်းႁူႉၸၢဝ်းၶိူဝ်း Map Foundation ၊ ၵဝ်ႉငဝ်ႈပူၵ်းပွင်သုၼ်ႇလႆႈၵူၼ်း HRDF ၊ ၊ ႁူမ်ႈတုမ်ႁႅင်းၵၢၼ်ယၢၼ်မိူင်း MWF ၊ မူလ်ၼိထိ FES ၸိူဝ်းၼႆႉ ႁူမ်ႈၵၼ်ၸတ်းႁဵတ်းဝၼ်းႁႅင်းၵၢၼ်ယၢၼ်မိူင်းလုမ်ႈၾႃႉ မီးၽူႈမီးပုၼ်ႈၽွၼ်း ၸၼ့်ၸွမ်ၵဵင်းမႆႇ၊ ၾၢႆႇႁပ်ႉႁွင်းၸွႆႈထႅမ်တူင်ႇဝူင်းၵူၼ်း၊ ၸဝ်ႈၼႃႈတီႈၾၢႆႇတူၺ်းထိုင်ႁႅင်းၵၢၼ် ဢိၵ်ႇၽူႈသူၼ်ၸႂ်လႄႈ ပီႈၼွင်ႉႁႅင်းၵၢၼ်ယၢၼ်မိူင်း ၶဝ်ႈႁူမ်ႈ 70 ၵေႃႉပၢႆ။ ၸတ်းႁဵတ်းတီႈႁူင်းႁႅမ်းထႃႊရိၼ်ႊ ၵဵင်းမႆႇ ၸိုင်ႈထႆး။

ၸၢႆးပိူင်း ၸဝ်ႈၼႃႈတီႈၾၢႆႇမၢႆမီႈ HRDF လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ၼႂ်းပီ 2018 ၼႆ့ၵေႃႈ ၵမ်ႈၼမ်ႁႅင်းၵၢၼ်ယၢၼ်မိူင်းႁူပ့်ထူပ်းပၼ်ႁႃယူႇၼႆ့တႄ့ ပဵၼ်လွင်ႈႁဵတ်းၵၢၼ်ဢမ်ႇလႆႈႁပ့်ၵႃႈၸၢင်ႈ၊ ဢမ်ႇလႆႈႁပ့်ၵႃႈၸၢင်ႈ ၸွမ်းၼင်ႇဢၼ်ပၵ်းပိူင်မၢႆမီႈတမ်းဝၢင်းဝႆ့ၸိူဝ်းၼႆ့ ၊ ဢဝ်ပၼ်ႁႃၸိူဝ်းၼႆ့ မႃးဢုပ်ႇဢူဝ်းၵၼ်သေ ဢဝ်တၢင်ႇထိုင် ၾၢႆႇလူင်ပွင်ၸိုင်ႈၵႂႃႇဢေႃႈ ” ဝႃႈၼႆ။

ဝၼ်းႁႅင်းၵၢၼ်ယၢၼ်မိူင်း ပီ 2018 ၼႆႉ ႁူမ်ႈၵၼ်တႅမ်ႈလိၵ်ႈထိုင်ႁွင်ႈၵၢၼ်လူင်ပွင်ၸိုင်ႈထႆးလႄႈ လုမ်းၽွင်းတၢင်မၢၼ်ႈဢၼ်ပၵ်းၼႂ်းမိူင်းထႆး ၼႂ်းၽိုၼ်လိၵ်ႈၼၼ်ႉပႃးဝႆ့ဝႃႈ- ႁႂ်ႈလူင်ပွင်ၸိုင်ႈမၢၼ်ႈဢွၵ်ႇပၼ်ဝႂ်ႁပ့်ႁွင်းၵၢၼ်တႄႇၼႃႈႁိူၼ်းပၼ်ႁႅင်းၵၢၼ်ၼႂ်းမိူင်းထႆး၊ ႁႂ်ႈႁႅင်းၵၢၼ်လႆႈႁပ့်ၵႃႈၸၢင်ႈ ၸွမ်းၼင်ႇမၢႆမီႈ၊ႁႂ်ႈၵူၼ်းႁဵတ်းၵၢၼ်ႁိူၼ်း (မႄႈဝၢၼ်ႈ)၊ မီးသုၼ်ႇလႆႈၸွမ်းၼင်ႇမၢႆမီႈ၊ ႁႂ်ႈႁႅင်းၵၢၼ်မီး သုၼ်ႇလႆႈၶဝ်ႈထိုင်ၵၢၼ်တူၺ်းလွမ်ပၢႆးယူႇလီၸိူဝ်းၼႆ့။

ႁႅင်းၵၢၼ်ၼႆႉ ၶဝ်ႈပႃးၼႂ်းၽူႈၸွႆႈပူၵ်းပွင် ပၢႆးမၢၵ်ႈမီးၼႂ်းမိူင်းၼႆသေ ၸဵမ်မိူဝ်ႈပီ 1990 ၸၢတ်ႈၸိုင်ႈလုမ်ႈၾႃႉ လႆႈမၵ်းမၼ်ႈဝႃႈဝၼ်းတီႈ 18 လိူၼ်ၻီႊသႅမ်ႊၿိူဝ်ႊ ပဵၼ်ဝၼ်းႁႅင်းၵၢၼ်ယၢၼ်မိူင်းလုမ်ႈ ၾႃႉ (International Migrant Day ) ။ ပိူဝ်ႈႁႂ်ႈႁႅင်းၵၢၼ်ယၢၼ်မိူင်းလႆႈယူႇတႂ်ႈပၵ်းပိူင်မၢႆမီႈ ၸိုင်ႈမိူင်း လႂ်ၸိုင်ႈမိူင်းၼၼ်ႉ ။ မိူင်းၸိုင်ႈထႆးၼႆႉၵေႃႈ ပဵၼ်မိူင်းဢၼ်မီးႁႅင်းၵၢၼ်ယၢၼ်မိူင်း ၶဝ်ႈမႃးႁဵတ်း ၵၢၼ်ၼမ်တီႈသုတ်းမိူင်းၼိုင်ႈ ။