ၽူႈတႅၼ်းပႃႇတီႇႁူဝ်သိူဝ် မိူင်းၼၢႆး တွင်ႈထၢမ် ဢုပ်ႇလၢတ်ႈၼႂ်းပၢင်ၵုမ်သၽႃး တႃႇႁႂ်ႈလူင်ပွင်ၸိုင်ႈ မၵ်းမၼ်ႈပၼ်ဝဵင်း မိူင်းၼၢႆး ၶဝ်ႈပႃးၼႂ်းမိူင်းၵိုၵ်းပိုၼ်း ဢၼ်မီးၶူဝ်းၶွင်ၵဝ်ႇၵႄႇ။

ဝၼ်းတီႈ 17/12/2018 လူင်ပွင်ၸိုင်ႈ တွပ်ႇလၢတ်ႈၼႂ်းပၢင်ၵုမ်သၽႃးၸႄႈမိူင်းတႆး ပွၵ်ႈၵမ်း 2 ၵမ်းထူၼ်ႈ 12 တီႈလုမ်း သၽႃးၸႄႈမိူင်းတႆး ၸႄႈဝဵင်းတူၼ်ႈတီး ၸိုင်ႈတႆးပွတ်းၸၢၼ်းဝႃႈ တွၼ်ႈတႃႇတေထိင်းသိမ်း ၶူဝ်းၶွင်ၵဝ်ႇၵႄႇၼႆႉ ဢမ်ႇမီးပၵ်းပိူင်မၼ်း။ လူဝ်ႇလႆႈႁဵတ်းပၵ်းပိူင်မႂ်ႇၵူၺ်း ဝႃႈၼႆ။

ၸၢႆးမွၼ်းလိူၼ် ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ 1 ၸႄႈဝဵင်းမိူင်းၼၢႆး လၢတ်ႈတီႈၽူႈတွႆႇႁွၵ်ႈဝႃႈ “ ၵွင်း မူးၵဝ်ႇလႄႈသင်၊ ၵျွင်းမုၼ်ၸဝ်ႈလႄႈသင် ၶူဝ်းၶွင်ၵဝ်ႇတင်းမူတ်း လွင်ႈၼႆႉ ၵူၼ်းမိူင်းႁၼ်ထိုင်ၸိူင်ႉႁိုဝ်၊ သင်ၶ ႁၼ် ထိုင်ၸိူင်ႉႁိုဝ်၊ ႁဝ်းႁၼ်ထိုင်ၸိူင်ႉႁိုဝ် ၵပ်းၵၢႆႇလူၺ်ႈလွင်ႈသၽႃႇဝ ၾိင်ႈတိုၼ်းပဵၼ်လႄႈ ၵွင်းမူးလႄႈ ၶူဝ်းၶွင်ၵဝ်ႇ မိူင်းၼၢႆးတင်းမူတ်းၼႆႉ လူဝ်ႇလႆႈၵႅတ်ႇၶႄႁႄႉၵၢင်ႈယဝ်ႉ၊ ပေႃးဢမ်ႇၵႅတ်ႇၶႄႁႄႉၵင်ႈၼႆႉ မၼ်းတေလူႉတေၵွႆၵႂႃႇယူႇ တိၵ်းတိၵ်း ၵမ်းၼႆႉႁဝ်းၵေႃႈ တၢင်ႇထိုင်တီႈလူင်ပွင်ၸိုင်ႈ ႁႂ်ႈၵႅတ်ႇၶႄႁႄႉၵင်ႈပၼ်။ လွင်ႈဝႃႈ ၵွင်းမူး မီးၼႂ်းဝၢင်း ႁိူၼ်း ၵူၼ်းလႄႈသင်၊ ၵျွင်းမုၼ်ၸဝ်ႈလႄႈသင်ၼႆ ႁႂ်ႈလူင်ပွင်ၸိုင်ႈၶဝ် ၸွႆႈထႅမ်ပၼ် ႁႂ်ႈမၼ်းလွတ်ႈပႃးၶွၼ်ႇ(အခွန်လွတ် ဂရမ်) ၶႃႈႁဝ်းလႆႈတုၵ်းယွၼ်းပႃးႁဵတ်းၼႆ” ဝႃႈၼႆ။

ၵွင်းမူးၵဝ်ႇၵႄႇမၢင်သူၼႆႉ ယူႇဝႆႉၼႂ်းဝၢင်းႁိူၼ်း ၵူၼ်းဝၢၼ်ႈလႄႈ ၽွင်းမိူဝ်ႈၵူၼ်ႇပင်းလူႉၵွႆၵေႃႈ ဢမ်ႇၸၢင်ႈၶဝ်ႈမႄး ၵုမ်းလုမ်းလႃး ဢမ်ႇၸၢင်ႈၵႅတ်ႇၶႄႁႄႉၵင်ႈ ၼင်ႇႁိုဝ် တေဢမ်ႇထုၵ်ႇယႃႉၵွႆၸိူဝ်းၼႆႉ ဝႃၼႆ။

ၾၢႆႇလူင်ပွင်ၸိုင်ႈ တင်းသၽႃး တွပ်ႇလၢတ်ႈၶိုၼ်းဝႃႈ “ ၵပ်းၵၢႆႇလူၺ်ႈၶူဝ်းၶွင်ၵဝ်ႇၵႄႇၼႆႉ တွၼ်ႈတႃႇတေမႅတ်ႇပႅင်းပႂ်ႉ ပႃး(ထိင်းသိမ်း) ၶူဝ်းၶွင်ၵဝ်ႇသၽႃႇဝၾိင်ႈတိုၼ်းပဵၼ်ၼႆႉ ဢမ်ႇမီးပၵ်းပိူင်မၼ်း။ လူဝ်ႇလႆႈမႄးႁဵတ်းပၵ်းပိူင်မၼ်း၊ တွၼ်ႈတႃႇတေ ထိင်းသိမ်းသၽႃႇဝ ၾိင်ႈတိုၼ်းပဵၼ်ၼႆႉၵေႃႈ ငိုၼ်းၵွင်ၵၢင်(ပၢတ်ႉၵျႅတ်ႉ) ၵေႃႈဢမ်ႇမီး။ ၵပ်းၵၢႆႇလူၺ်ႈ လွင်ႈၵရမ်ႇ ၼႆႉၵေႃႈ လႆႈဢဝ်ၶၢဝ်းယၢမ်းသေ တေႁဵတ်းၵႂႃႇ” ဝႃႈၼႆ။

ၸၢႆးမွၼ်းလိူၼ် လၢတ်ႈဝႃႈ “ ၵဵဝ်ႇလူၺ်ႈလွင်ႈၵွင်းမူးၵူၼ်ႇၼၼ်ႉၵေႃႈ ယူႇတီႈလူင်ပွင်ၸိုင်ႈ ဢမ်ႇတွပ်ႇလၢတ်ႈၼႄ လွင်ႈၸႅင်ႈလႅင်းသင် ႁဝ်းၶႃႈ ထၢမ်ၵူၼ်းမိူင်းဝႃႈ ႁႂ်ႈဢဝ်လိူင်ႈၼၵ်းၼၵ်းၼႃၼႃၼႆ ၶဝ်ဢမ်ႇႁတ်းဢဝ်လိူင်ႈသင် လၢတ်ႈၵေႃႈ ၶဝ်ဢမ်ႇလၢတ်ႈ ဢဝ်ၵႂၢႆးယဵပ်ႇၼႅၼ်ႈဝူဝ်းယဵပ်ႇႁၢႆ ၸိူင်ႉၼၼ်ပႅတ်ႈ။ ပေႃးႁဵတ်းၸိူင်ႉၼၼ်မႃး ႁဝ်းၶႃႈ ဝႃႈ ပေႃးဝႃႈလူင်ပွင်ၸိုင်ႈႁဵတ်းၸိူင်ႉၼႆတိၵ်းတိၵ်းတႄႉ ၵူၼ်းမိူင်းၵေႃႈ တေယုမ်ႇယမ်သူဢေႇသေဢမ်ႇၵႃး ဢၼ်ႁဝ်း ဢမ်ႇယိုၼ်းထိုင်လႆႈ ပၼ်ႁႃမၼ်းတေၸၢင်ႈၵိူတ်ႇၶိုၼ်းမႃး” ဝႃႈၼႆ။

ၸၢႆးမွၼ်းလိူၼ် သိုပ်ႇလၢတ်ႈဝႃႈ “ ၸူဝ်ႈလူင်ပွင်ၸိုင်ႈပႆႇႁဵတ်းပၼ်သင်လႆႈၼႆႉ ၵူၼ်းမိူင်းၵေႃႈ ထုၵ်ႇလႆႈႁၵ်ႉ သႃၶူဝ်း ၶွင်ၵဝ်ႇၵႄႇဝဵင်းမိူင်းၼၢႆးႁင်းၽႂ်မၼ်း” ဝႃႈၼႆ။

ၵဵဝ်ႇလူၺ်ႈလွင်ႈၶူဝ်းၶွင်ၵဝ်ႇႁဝ်းၶႃႈၼႆႉ ၶႂ်ႈႁႂ်ႈၵူၼ်းမိူင်းႁဝ်းတင်းမူတ်း ႁႂ်ႈလႆႈထိင်းသိမ်း ယႃႇပေယႃႉ ယႃႇပေၵဝ်း ဢၼ်မီးယူႇၼၼ်ႉၵေႃႈ ႁႂ်ႈမၵ်းမၼ်ႈပၼ်ၶိုၼ်းသေ၊ ႁႂ်ႈထိင်းသိမ်းၵၼ်သေ ယူႇတီႈလူင်ပွင် ၸိုင်ႈၼႆၵေႃႈ ႁႂ်ႈမၵ်း မၼ်ႈပၼ် ႁႂ်ႈမၼ်းလွတ်ႈၶွၼ်ႇ၊ ပေႃးႁဵတ်းၼႆမႃး ၶူဝ်းၶွင်ၵဝ်ႇၵႄႇႁဝ်း၊ သၽႃႇဝ ၾိင်ႈတိုၼ်းပဵၼ် ႁဝ်း ႁဝ်းၶႃႈ ၸၢင်ႈ ၵႅတ်ႇၶႄႁႄႉၵင်ႈၵၼ်ၵႂႃႇ” ဝႃႈၼႆ။

ၽူႈတႅၼ်းသၽႃးၸႄႈမိူင်းတႆးၼႆႉ တင်းမူတ်းမီး 141 ၵေႃႉ၊ ၼႂ်းဝၼ်းတီႈ 17/12/2018 ဢၼ်မႃးၶဝ်ႈပၢင်ၵုမ်သမ်ႉ 116 ၵေႃႉ၊ ၶၢတ်ႇယွၼ်းၶႂၢင်ႉ 25 ၵေႃႉ။