ၵူၼ်းဝၢၼ်ႈၼႂ်းဢိူင်ႇၼမ်ႉမႃႉ ၸႄႈဝဵင်းသီႇပေႃႉ တူၵ်းလူင်းလႆႈၸႂ်ပၼ် ၶွမ်ႊပၼီႊငူၺ်ႇယီႇပလႄး ၶုတ်းထၢၼ်ႇႁိၼ် ၵႂႃႇထႅင်ႈ ၼိုင်ႈပီ။

ဝၼ်းတီႈ 13/12/2018 ၶွမ်ႊပၼီႊငူၺ်ႇယီႇပလႄး ႁူပ်ႉထူပ်းသင်ၶၸဝ်ႈလႄႈ ၵူၼ်းဝၢၼ်ႈ တီႈဝတ်ႉၵျွင်းၼမ်ႉမႃႉ ၸႄႈ ဝဵင်းသီႇပေႃႉ ၸိုင်ႈတႆးပွတ်းႁွင်ႇ။ ယူႇတီႈၶွမ်ႊပၼီႊ တုၵ်းယွၼ်းၶုတ်းထၢၼ်ႇႁိၼ်ထႅင်ႈ တႃႇၼိုင်ႈပီ တေႃႇထိုင် လိူၼ်ၻီႊသႅမ်ႊပိူဝ်ႊ 2019 ဝႃႈၼႆ။

ၸၢႆးသႃႇလူႇ ၵူၼ်းၼုမ်ႇၼမ်ႉမႃႉ လၢတ်ႈတီႈၽူႈတွႆႇႁွၵ်ႈဝႃႈ “ ၶွမ်ႊပၼီႊငူၺ်ႇယီႇပလႄးၼႆႉ ၶဝ်လႆႈၶႂၢင်ႉၶုတ်း ထၢၼ်ႇ ႁိၼ်တီႈၼမ်ႉမႃႉၼႆႉ ထိုင် ပီ 2018 ၵူၺ်း။ ၶဝ်တေဢၢၼ်းဢွၵ်ႇမိူဝ်းဝႃႈၼႆသေတႃႉ ၵမ်းၼႆႉသမ်ႉ ထၢၼ်ႇႁိၼ် ဢမ်ႇပႆႇ မူတ်းလႄႈ ၶဝ်တုၵ်းယွၼ်းတီႈၵူၼ်းမိူင်း ႁႂ်ႈၸွႆႈထႅမ်ၶဝ်။ ငူၺ်ႇယီႇပလႄး ယွၼ်းၶုတ်းထၢၼ်ႇထႅင်ႈ ပီၼိုင်ႈၼႆလႄႈ  ႁဝ်းၶႃႈလႆႈၸႂ်တူၵ်းလူင်းၵၼ်သေ ပၼ်ၶႂၢင်ႉ ဢၼုယၢတ်ႈၶႂမ်ႊပၼီႊ ၶုတ်းထႅင်ႈတေႃႇပီ 2019 သဵင်ႈ။ ၵူၺ်းၵႃႈ   ႁဝ်းၶႃႈလႆႈယွၼ်းဝႆႉဝႃႈ ၼီႈၵဝ်ႇ ဢၼ်ၾၢႆႇ ၶွမ်ႊပၼီႊၶဝ် လူဝ်ႇႁဵတ်းပၼ်တႃႇဝၢၼ်ႈဢိူင်ႇႁဝ်းၶႃႈသေ ဢၼ်ပႆႇလႆႈႁဵတ်းယဝ်ႉၼၼ်ႉ ၼႂ်းပီ 2019 တေမႃးၼႆႉ ၼႂ်းၶၢဝ်းတၢင်း 6 လိူၼ် ႁႂ်ႈႁဵတ်းပၼ်ႁႂ်ႈယဝ်ႉတူဝ်ႈလီငၢမ်း။ ပေႃးဢမ်ႇယဝ်ႉၼႂ်းၶၢဝ်းတၢင်း 6 လိူၼ်ၸိုင် တေဢမ်ႇပၼ်သိုပ်ႇၶုတ်းထၢၼ်ႇထႅင်ႈ ၼႆဢေႃႈ။- ဝႃႈၼႆ။

ၶေႃႈတူၵ်းလူင်းတႃႇသိုပ်ႇၶုတ်းထႅင်ႈ ၶၢဝ်းတၢင်းၼိုင်ႈပီၼၼ်ႉသမ်ႉ ၵူၼ်းဢိူင်ႇၼမ်ႉမႃႉ ယွၼ်းဝႆႉ ၸၢၵ်ႈၾႆး 1 လုၵ်ႈလႄႈ ငိုၼ်းၵွင်ၵၢင်တႃႇၵူၼ်းဝၢၼ်ႈ 100 သႅၼ်ပျႃး။ လိူဝ်ၼၼ်ႉ ဝၢၼ်ႈ 7 ဝၢၼ်ႈ ဢၼ်ပႃးၼႂ်းဢိူင်ႇ ၼမ်ႉမႃႉၼၼ်ႉၵေႃႈ ယွၼ်းဝႆႉ သဵၼ်ႈတၢင်း၊ ႁူင်းႁေႃး ၸဵမ်ၸိူဝ်းၼႆႉႁင်းၽႂ်မၼ်း ဝႃႈၼႆ။

ၸၢႆးသႃႇလူႇ သိုပ်ႇလၢတ်ႈဝႃႈ “ ပေႃးယူႇတီႈၶွမ်ႊပၼီႊၶဝ်တူၺ်းတႄႉ တေဝႃႈတုၵ်းယွၼ်းမဵဝ်းၼိုင်ႈယဝ်ႉ မဵဝ်း ၼိုင်ႈ ပဵၼ်ဢၼ်ၼမ်ယူႇ ၼႆသေတႃႉ ပေႃးၾၢႆႇဢၼ်ၶဝ်ၸွႆႈထႅမ်ၵူၼ်းမိူင်းႁဝ်းၶႃႈတႄႉတႄႉ ႁႂ်ႈဝႃႈတဵမ်ႁူဝ်ပၢၵ်ႇ ပိူဝ်ႊသႅၼ်ႊ100 % တႄႉယဝ်ႉ ႁႃႉ ဢၼ်ဝႃႈၼၼ်ႉ ပႆႇတဵမ်။ မၼ်းဢမ်ႇမိူၼ်ၼင်ႇၵၢင်ၸႂ် ၵူၼ်းမိူင်းႁဝ်းတုၵ်းယွၼ်း။ ႁဵတ်း တႄႉၶဝ်ႁဵတ်း ပၼ်ယူႇ ၵူၺ်း တၢၼ်ႇယဝ်ႉၼိုင်ႈလိူၼ် ၶဝ်သမ်ႉႁဵတ်းၵႂႃႇ 4 လိူၼ် ဢမ်ႇၼၼ် 6 လိူၼ်ႁိုဝ် ၶဝ်ၸၼ်ၶၢဝ်း ယၢမ်းလႄႈ ႁႂ်ႈပေႃး မိူၼ်ၼင်ႇၵၢင်ၸႂ်ၵူၼ်းမိူင်းၼၼ်ႉဢမ်ႇပဵၼ်မႃး” ဝႃႈၼႆ။

ၶွမ်ႊပၼီႊငူၺ်ႇယီႇပလႄးၼႆႉ လႆႈၶႂၢင်ႉၶုတ်းထၢၼ်ႇႁိၼ်တီႈၼမ်ႉမႃႉ ၸဵမ်မိူဝ်ႈပီ 2004 သေ လႆႈၶႂၢင်ႉၶုတ်းတေႃႇထိုင် ၼႂ်းပီ 2018 ၼႆႉ ဝႃႈၼႆ။