ဢိင်ၼိူဝ်ငဝ်းလၢႆး ၼႂ်းပိုၼ်ႉတီႈ မီးပၼ်ႁႃ လွင်ႈသိုၵ်းၸုမ်းယိပ်းၵွင်ႈၵၢင်ႇ ၸၢဝ်းၶိူဝ်းၼင်ႇၵၼ် ၶဵင်ႈၶႅင်ၵၢၼ်သိုၵ်း တေႃႇၵၼ်သေ ၵူၼ်းမိူင်း 200 ပၢႆ ဢၼ်လႆႈပၢႆႈမႃးသွၼ်ႈဝႆႉတီႈဝတ်ႉၼွင်ၵေႃႈ ၸႄႈဝဵင်းသီႇပေႃႉၼၼ်ႉ ၶိုၼ်းဢွၼ် ၵၼ် ပွၵ်ႈႁိူၼ်းယေးၽႂ်မၼ်းမူတ်းယဝ်ႉ ဝႃႈၼႆ။

မိူဝ်ႈၼႆႉ ဝၼ်းတီႈ 19/12/2018 ယၢမ်းၵၢင်ၼႂ် 9 မူင်းပၢႆၼႆႉ ၵူၼ်းဝၢၼ်ႈၶၢႆးႁဵဝ်း ဢိူင်ႇၵုင်းသေႃႉ ဢၼ်မႃးသွၼ်ႈဝႆႉတီႈ ဝတ်ႉဝိႁၢရ်ၼွင်ၵေႃႈ ဢိူင်ႇၼမ်ႉယၢင်း ၼႂ်းၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ ႁူဝ်ၵူၼ်း 266 ၵေႃႉၼၼ်ႉ ၶိုၼ်းဢွၼ် ၵၼ်ပွၵ်ႈႁိူၼ်းယေးၵၼ်ယဝ်ႉ။

ၵူၼ်းပၢႆႈၽေးသိုၵ်း ဝၢၼ်ႈၶၢႆးႁဵဝ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈ တိုၵ်ႉဢွၼ်ၵၼ်ပွၵ်ႈတေႃႈလဵဝ်ၼႆႉၶႃႈ တင်းၵူဝ်တင်းပွၵ်ႈၶႃႈဢေႃႈ။ တေလႆႈဝႃႈ ငဝ်းလၢႆးၼႂ်းပိုၼ်ႉတီႈၼိမ်သဝ်းယဝ်ႉႁႃႉ ဢၼ်ဝႃႈၼၼ်ႉ ပႆႇယဵၼ်။ ၵူၺ်းၵႃႈ ဢွၼ်ၵၼ် မႆႈၸႂ် သူၼ်ႁႆႈၼႃးလႄႈ ႁိူၼ်းယေးၶႃႈဢေႃႈ။ လႆႈငိၼ်းဝႃႈ သိုၵ်းၶူဝ်းလၢႆးတႄႉ ထွၼ်ဢွၵ်ႇၵႂႃႇတၢင်း ၾၢႆႇတူၵ်း ၼမ်ႉတူႈယဝ်ႉၼႆဝႃႇ လႅပ်ႈၵၢၼ်ၶဵင်ႈၶႅင်ၵၼ် တင်းသွင်ၾၢႆႇတႄႉ လူတ်းလူင်းယူႇၶႃႈယူဝ်ႉ” ဝႃႈၼႆ။

မိူဝ်ႈၶမ်ႈ ဝၼ်းတီႈ 17/12/2018 ၼၼ်ႉ ၵူၼ်းဝၢၼ်ႈၶၢႆးႁဵဝ်း တင်း ဝၢၼ်ႈပၢင်ႁႆႈ ၼႂ်းဢိူင်ႇၵုင်းသေႃႉ လႆႈဢွၼ်ၵၼ်ပၢႆႈမႃး တင်းၶိုၼ်း ႁူဝ်ၵူၼ်း 500 ပၢႆ မႃးသွၼ်ႈဝႆႉတီႈ ႁိူၼ်းပီႈၼွင်ႉၽႂ်မၼ်း ဝၢၼ်ႈၼွင်ၵေႃႈ ၵမ်ႈၽွင်ႈလႄႈ တီႈဝတ်ႉဝိႁၢရ် ၼွင်ၵေႃႈ ၵမ်ႈၽွင်ႈ။ ထိုင်မႃး ဝၼ်းတီႈ 18 ယၢမ်းၵၢင်ၼႂ်သမ်ႉ မၢင်ၸိူဝ်းပၢႆႈၵႂႃႇၸူး ႁိူၼ်းပီႈၼွင်ႉ ၸွမ်းၼႂ်းဝဵင်းသီႇပေႃႉ ၵေႃႈမီး။ မၢင်ၸိူဝ်း ဢွၼ်ၵၼ်ပွၵ်ႈမိူဝ်းတူၺ်းငဝ်းလၢႆး ၼႂ်းပိုၼ်ႉတီႈသေ မူၵ်းယူႇဝႆႉၸွမ်းၼႂ်းဝၢၼ်ႈၶိုၼ်းၵေႃႈမီး ဝႃႈၼႆ။

မိူဝ်ႈဝၼ်းတီႈ 17/12/2018 ယၢမ်းႁူဝ်ၶမ်ႈၼၼ်ႉ ယွၼ်ႉသိုၵ်း ၶူဝ်းၶဵဝ် တင်း ၶူဝ်းလၢႆး ၶဵင်ႈၶႅင်ၵၢၼ်သိုၵ်းတေႃႇၵၼ် ႁိမ်းဝၢၼ်ႈၶၢႆးႁဵဝ်းသေ ၵူၼ်းဝၢၼ်ႈၵူဝ်ပဵၼ်ပၢင်တိုၵ်း ဢွၼ်ၵၼ်ငိူင်ႉဝႄႈ ပၢႆႈဢွၵ်ႇမႃး ဝႃႈၼႆ။