ၵူၼ်းဝၢၼ်ႈၶၢႆးႁဵဝ်း ဢွၼ်ၵၼ်ငိူင်ႉဝႄႈပၢႆႈၽေးသိုၵ်း မႃးသွၼ်ႈဝႆႉတီႈ ဝတ်ႉၼွင်ၵေႃႈ ၸႄႈဝဵင်းသီႇပေႃႉ ႁူဝ်ၵူၼ်း 500 ပၢႆ ယွၼ်ႉၸုမ်းယိပ်းၵွင်ႈၶဵင်ႈၶႅင်ၵၢၼ် သိုၵ်းၵၼ်ၼႂ်းပိုၼ်ႉတီႈ။
ဝၼ်းတီႈ 17/12/2018 ယၢမ်းၵၢင်ၶိုၼ်း 10 မူင်းပၢႆ ၵူၼ်းဝၢၼ်ႈၶၢႆးႁဵဝ်း ဢိူင်ႇၵုင်းသေႃႉ ဢွၼ်ၵၼ်ငိူင်ႉဝႄႈပၢႆႈၽေးသိုၵ်း မႃးသွၼ်ႈဝႆႉတီႈ ဝတ်ႉဝိႁၢရ်ၼွင်ၵေႃႈ ဢိူင်ႇၼမ်ႉယၢင်း ၸႄႈဝဵင်းသီႇပေႃႉ ႁူဝ် ၵူၼ်း 500 ပၢႆ ယွၼ်ႉသိုၵ်းၶူဝ်းၶဵဝ် (လုၵ်ႈ ၸုမ်း ၸုမ်းဢူၺ်းလီပွတ်းႁွင်ႇ) တင်း သိုၵ်းၶူဝ်းလၢႆး (RCSS/SSA) ၶဵင်ႈၶႅင်ၵၢၼ်သိုၵ်းတေႃႇၵၼ် တၢင်းပွတ်းဝၢၼ်ႈၶၢႆး ႁဵဝ်း ဝႃႈၼႆ။
ၵူၼ်းပၢႆႈၽေးသိုၵ်း ဢၼ်မႃးသွၼ်ႈဝႆႉတီႈ ဝတ်ႉၼွင်ၵေႃႈ လၢတ်ႈတီႈၽူႈတွႆႇႁွၵ်ႈဝႃႈ “ ပၢင်တိုၵ်းတႄႉပႆႇပဵၼ် သိုၵ်းၶူဝ်း လၢႆးသမ်ႉ ယူႇဝႆႉႁိမ်းၾၢႆႇတၢင်းတူၵ်းဝၢၼ်ႈ၊ သိုၵ်းၶူဝ်းၶဵဝ်သမ်ႉ လုၵ်ႉတၢင်းဝၢၼ်ႈတူၼ်ႈၵႅင်းသေ တေၶဝ်ႈၼႂ်းဝၢၼ်ႈ ၶၢႆးႁဵဝ်း ႁဝ်းၶႃႈလႆႈႁၼ်ၸိူင်ႉၼၼ်သေ ၵူဝ်ပဵၼ်ပၢင်တိုၵ်းၵၼ်လႄႈ ၸင်ႇလႆႈငိူင်ႈဝႄႈဢွၵ်ႇမႃးတၢင်းၶိုၼ်းၶႃႈယဝ်ႉ တင်းမူတ်း တေမီးႁူဝ်ၵူၼ်း မွၵ်ႈ 500 ပၢႆၼႆႉ” ဝႃႈၼႆ။
ၵူၺ်းၵႃႈ ပၢင်တိုၵ်းတႄႉ ဢမ်ႇပဵၼ်လႄႈ ၼႂ်ၼႆႉ ၵမ်ႈၽွင်ႈၵေႃႈ ပွၵ်ႈၶိုၼ်းႁိူၼ်းယဝ်ႉ ဝႃႈၼႆ။
သိုပ်ႇလၢတ်ႈဝႃႈ “ ဝၢႆးႁဝ်းၶႃႈ ဢွၵ်ႇမႃးယဝ်ႉၵေႃႈ ပၢင်တိုၵ်းပႆႇပဵၼ် ထိုင်မိူဝ်ႈၼႆႉ ၵၢင်ၼႂ်ၵေႃႈ ပႆႇပဵၼ်။ တေႃႈလဵဝ် ၵူၼ်း ပၢႆႈၽေးသိုၵ်း ဢၼ်ယူႇဝႆႉတီႈဝတ်ႉၼွင်ၵေႃႈၼႆႉတႄႉ ၵိုတ်းႁူဝ်ၵူၼ်း 266 ၵေႃႉၵူၺ်းၶႃႈ။ လိူဝ်ၼၼ်ႉ ၸိူဝ်းဢၼ် ပၢႆႈ ၵႂႃႇတၢင်းဝဵင်းၵေႃႈမီး ၸိူဝ်းပွၵ်ႈမိူဝ်းတူၺ်းငဝ်းလၢႆး တီႈၼႂ်းဝၢၼ်ႈၶိုၼ်းၵေႃႈမီး။ ဢၼ်ၵိုတ်း ဝႆႉတီႈၼႆႈတႄႉ ပဵၼ်လုၵ်ႈ ဢွၼ်ႇ၊ ၵူၼ်းထဝ်ႈလႄႈ ၼၢင်းယိင်းၵူၺ်းၶႃႈ”။
လိူဝ်ၼၼ်ႉ ၵူၼ်းဝၢၼ်ႈပၢင်ႁႆႈ ၼႂ်းဢိူင်ႇၵုင်းသေႃႉၵေႃႈ လႆႈဢွၼ်ၵၼ်ပၢႆႈမႃးသွၼ်ႈဝႆႉတီႈ ႁိူၼ်းပီႈႁိူၼ်းၼွင်ႉ တီႈ ၼႂ်းဝၢၼ်ႈၼွင်ၵေႃႈ ၵေႃႈမီးၵမ်ႈၽွင်ႈ ဝႃႈၼႆ။
တၢင်းပွတ်းဢိူင်ႇၵုင်းသေႃႉ ၸႄႈဝဵင်းသီႇပေႃႉၼႆႉ မီးသိုၵ်း RCSS၊ သိုၵ်း SSPP လႄႈ သိုၵ်းလူင်ပွင်ၸိုင်ႈမၢၼ်ႈ ၸဵမ် ၸိူဝ်းၼႆႉ ၵႆႉတူင်ႉၼိုင်ၵႂႃႇမႃးယူႇတႃႇသေႇ။ ၼႂ်းႁၢင်ပီၼႆႉၵူၺ်း ၵူၼ်းဝၢၼ်ႈပွတ်းၼႃးမၢၵ်ႇၶေႃ လႆႈပၢႆႈၽေးသိုၵ်းယဝ်ႉ ဢမ်ႇယွမ်း 3 ပွၵ်ႈ ဝႃႈၼႆ။
