တွၼ်ႈတႃႇ ၵူၼ်းမိူင်းတႆး ပေႃးတေလႆႈမီးဝႂ်တီႈလိၼ် ပဵၼ်တၢင်းၵၢၼ် ယူႇတီႈၽူႈတႅၼ်းသၽႃးၸႄႈမိူင်း ၸႄႈဝဵင်း ၵျွၵ်ႉမႄး တၢင်ႇထိုင် ႁႂ်ႈလူင်ပွင်ၸိုင်ႈ လူင်းႁဵတ်းပၼ် ဝႂ်တီႈလိၼ် (ဢမ်ႇၼၼ်) ဝႂ်ၵရမ်ႇလိၼ် ဝႃႈၼႆ။

ဝၼ်းတီႈ 14/12/2018 ပၢင်ၵုမ်သၽႃးၸႄႈမိူင်းတႆး ပွၵ်ႈၵမ်း 2 ၵမ်းထူၼ်ႈ 12 ဝၼ်းထူၼ်ႈ 3 တီႈလုမ်းသၽႃးၸႄႈ မိူင်း တႆး ၸႄႈဝဵင်းတူၼ်ႈတီႈ ၸိုင်ႈတႆးပွတ်းၸၢၼ်း။ ၸၢႆးထုၼ်းၺၢၼ်ႇ ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ 2 ၸႄႈဝဵင်းၵျွၵ်ႉမႄး လႆႈတၢင်ႇထိုင် လွင်ႈဝႂ်တီႈလိၼ် ႁႂ်ႈလူင်ပွင်ၸိုင်ႈ လူင်းႁဵတ်းပၼ်ၵူၼ်းမိူင်း။ လႆႈဢွင်ႇမၢၼ် လႆႈထုၵ်ႇ မၵ်းမၼ်ႈၼႂ်းသၽႃးၵႂႃႇ ဝႃႈၼႆ။

ၸၢႆးထုၼ်းၺၢၼ်ႇ ၽူႈတႅၼ်းသၽႃးၸႄႈမိူင်းၶဵတ်ႇလိူၵ်ႈတင်ႈ မၢႆ 2 ၸႄႈဝဵင်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “ လွင်ႈဝႂ်တီႈလိၼ်ၼႆႉ မၼ်းလမ်ႇလွင်ႈတႃႇၵူၼ်းမိူင်းႁဝ်းတႄႉတႄႉ။ တေႃႈလဵဝ်ၼႆႉ ပေႃးႁဝ်းယူႇ ၼႂ်းပွၵ်ႉ ၼႂ်းယွမ်ႇ ၼႂ်းဝဵင်းလႂ်ၵေႃႈယဝ်ႉ ပေႃးဝႃႈ ဝၢင်းႁိူၼ်း ဢမ်ႇၼၼ် လွၵ်းလိၼ် မီးၵရမ်ႇတီႈလိၼ်ၸိုင် မၼ်းဢဝ် ဝႂ်တီႈလိၼ်(ၵရမ်ႇ) ၼၼ်ႉ ၵႂႃႇတႅၵ်ႈဝႆႉတီႈ ၼႂ်းယေးငိုၼ်းလူင်ပွင်ၸိုင်ႈလႂ်၊ ယေးငိုၼ်းသုၼ်ႇတူဝ်လႂ် ၸိူဝ်းၼၼ်ႉ မၼ်း မီးသုၼ်ႇၵူႈယိုမ်ငိုၼ်းလႆႈမႃး၊ တေလႆႈပၼ်ငိုၼ်းၶီႈ(အတိုး) ဢေႇ။ ငိုၼ်းဢၼ်ၵူႈယိုမ်မႃးၼၼ်ႉ ဢဝ်မႃး ႁဵတ်းသၢင်ႈ တႃႇၵူၼ်းမိူင်းႁဝ်း ၶိုၼ်ႈယႂ်ႇမႂ်ႇသုင်ၵေႃႈလႆႈ။ ႁဝ်းဝႃႈ ပေႃးမီးဝႂ်ၼၼ်ႉ ၵူႈယိုမ်ငိုၼ်းလႆႈငၢႆႈ” ဝႃႈၼႆ။

သိုပ်ႇလၢတ်ႈဝႃႈ “ ၼႂ်းလူင်ပွင်ၸိုင်ႈၼႆႉ 2017-18 ၵေႃႈယဝ်ႉ၊ 2018 – 19 ၵေႃႈယဝ်ႉ ၶဝ်မၵ်းမၼ်ႈဝႆႉ ၶဝ်ၶႂ်ႈၸွႆႈ ထႅမ် တႃႇၵူၼ်းႁဵတ်းၼႂ်းမိူင်းတႆးၼႆႉ ၶိုၼ်ႈယႂ်ႇမႂ်ႇသုင် ၶႂ်ႈၸွႆႈထႅမ်ပၼ်ငိုၼ်းတိုၼ်းလၢင်းၼႆၵေႃႈ ၶဝ်မီးဝႆႉသေႇသေႇ ဢၼ် ၼၼ်ႉ ႁွင်ႉဝႃႈ SME ။ လုမ်းၵေႃႈ ၶဝ်ပိုတ်ႇဝႆႉယူႇ မိူၼ်ၸိူင်ႉၼင်ႇ တၢင်းလႃႈသဵဝ်ႈ ၵူၺ်းၵႃႈ ပေႃးဢမ်ႇ မီးဝႂ်ၵရမ်ႇ ဝႂ်တီႈလိၼ်ၼႆႉ ၶဝ်ဢမ်ႇပၼ်ၵူႈယိုမ်ငိုၼ်း။ ၵွပ်ႈၼၼ်လႄႈ တႃႇၵၢၼ်ငၢၼ်းတေၶိုၼ်ႈယႂ်ႇမႂ်ႇသုင်ၼႆႉ မိူင်းပိူၼ်ႈၵေႃႈ ယၢမ်ႈယွၼ်းတၢင်းၸွႆႈထႅမ် တီႈလူင်ပွင်ၸိုင်ႈမႃး ၼႆၵေႃႈၶဝ်ၶႂ်ႈႁဵတ်းယူႇ။ ၵူၺ်းၵႃႈ ပေႃးဢမ်ႇမီးဝႂ်ၵရမ်ႇၼႆ မၼ်းဢမ်ႇ ၸၢင်ႈႁဵတ်းၶႃႈ” ဝႃႈၼႆ။

ၵဵဝ်ႇၵပ်းလွင်ႈၼႆႉ ယူႇတီႈၽွင်းလူင်ၾၢႆႇၽုၵ်ႇသွမ်ႈလႄႈ လဵင်ႉလူတူဝ်သတ်း တွပ်ႇလၢတ်ႈၼႂ်းသၽႃးဝႃႈ “ တွၼ်ႈတႃႇ တေပၼ် ဝႂ်တီႈလိၼ် (ၵရမ်ႇ) ၼႆႉ ယူႇတီႈလူင်ပွင်ၸိုင်ႈၵေႃႈ တိုၵ်ႉၶပ်းၶိုင်ႁဵတ်းသၢင်ႈယူႇ” ဝႃႈၼႆ။

ပၢင်ၵုမ်သၽႃးၸႄႈမိူင်းတႆး ဝၼ်းထူၼ်ႈ 3 ၼႆႉ တင်းမူတ်း ၽူႈတႅၼ်းၶဝ်ႈႁူမ်ႈပၢင်ၵုမ် မီး 116 ၵေႃႉ။ ၽူႈတႅၼ်းဢၼ် ၵမ်ႉထႅမ် တီႈဝႂ်တီႈလိၼ် (ၵရမ်ႇ) ၼႆႉ မီး 64 ၵေႃႉ၊ ဢၼ်သၢၼ်ၶတ်း မီး 47 ၵေႃႉ၊ ဢၼ်ယူႇၵၢင် မီး 3 ၵေႃႉ။ ဢၼ် ဢမ်ႇပၼ်သင် သမ်ႉမီး 2 ၵေႃႉ ဝႃႈၼႆ။

ၸၢႆးထုၼ်းၺၢၼ်ႇ သိုပ်ႇလၢတ်ႈဝႃႈ “ ဝႂ်တီႈလိၼ်(ၵရမ်ႇ) ၼႆႉ မၼ်းပွင်ႇသင်ၼႆ ပေႃးႁဝ်းမီးၼင်လိၼ်ၼိုင်ႈလွၵ်း မၼ်းႁူမ်ႇလူမ်ႈတႃႇၼႂ်းၸႂ် ၵူၼ်းမိူင်းႁဝ်း ၽႂ်ဢမ်ႇမႃးၵဝ်းလႆႈ ဢမ်ႇမႃးႁိမ်လႆႈ မၼ်းလမ်ႇလွင်ႈတႃႇၵူၼ်းမိူင်းပိုၼ်ႉတီႈ ႁဝ်း။ ၵွပ်ႈၼႆလႄႈ ႁဝ်းလႆႈတၢင်ႇထိုင် ၼႂ်းသၽႃး” ဝႃႈၼႆ။