ၵူၼ်းမိူင်းဝဵင်းၼမ့်ၶမ်း တေႁူမ်ႈၵၼ်ၸတ်းႁဵတ်း ပၢင်ပွႆးႁူမ်ၸူမ်းဝၼ်းၸိူဝ့်ၸၢတ်ႈၸိုင်ႈတႆး ၶိုၵ့်ယႂ်ႇလူင် ပိူဝ်ႈပူၵ်းတိုၼ်ႇၼမ့်ၸႂ်ၵူၼ်းမိူင်းတႆး ႁူ့ၶိုၼ်းပိုၼ်းဝၼ်းလင်။

ဝၼ်းတီႈ 7/02/2019 ၼႂ်းတိုဝ့်တၢင်းဝၼ်းၸိူဝ့်ၸၢတ်ႈၸိုင်ႈၶွပ်ႈတဵမ် 72 ပီၼႆ့ ယူႇတီႈၵေႃပွင်ပဵၼ်ပၢင်ပွႆးဝၼ်း ၸိူဝ့်ၸၢတ်ႈလႄႈ ၵူၼ်းမိူင်းၼမ့်ၶမ်း တေႁူမ်ႈၵၼ်ၸတ်းႁဵတ်းပၢင်ပွႆးႁူမ်ၸူမ်းဝၼ်းၸိူဝ့်ၸၢတ်ႈ ၸိုင်ႈတႆးၶိုၵ့်ယႂ်ႇလူင် ပိူဝ်ႈႁႂ်ႈၵူၼ်းၼုမ်ႇၵူၼ်းမိူင်းႁူ့ၶိုၼ်းပိုၼ်းၸဝ်ႈၵဝ်ႇလႄႈ မီးၸႂ်ႁၵ့်ၸိူဝ့်ၶိူဝ်းၸဝ်ႈၵဝ်ႇၼႆယဝ့်။

လုင်းၸၢႆးမွၵ်ႇသႂ် ၵႅမ်ႁူဝ်ပဝ်ႈၵေႃပွင်ပဵၼ်ပၢင်ပွႆး လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “  ႁဝ်းၶႃႈၵူၼ်းဝၢၼ်ႈၵူၼ်း မိူင်းတေႁူမ်ႈၵၼ်သေ ၸတ်းႁဵတ်းပီၼႆ့ တေႁဵတ်းပႃးႁွင်ႈၼႄၶူဝ်းၶွင်ဢၼ်ဢွၵ်ႇၼႂ်းဝဵင်းၼမ့်ၶမ်း တေၸတ်း ပႃးပၢင်တၢၼ်ႈၶႆႈ ပိူဝ်ႈႁႂ်ႈၵူၼ်းၼုမ်ႇၵူၼ်းဝၢၼ်ႈၵူၼ်းမိူင်းလႆႈႁဵၼ်းႁူ့ပိုၼ်းမိူင်းၸဝ်ႈၵဝ်ႇသေ မေႃမီးၸႂ်ႁၵ့်ၸိူဝ့်ၶိူဝ်း  တူဝ်ၵဝ်ႇမႃး ၊ လွင်ႈဢၼ်ႁွင့်ဝၼ်းၸိူဝ့်ၸၢတ်ႈဢမ်ႇမိူၼ်ၵၼ်ၼၼ့်ၵေႃႈ ၽႂ်ၶႂ်ၸႂ်ႈၸိူင့်ႁိုဝ်ၵေႃႈၸႂ့်ၵႂႃႇ ဢမ်ႇလူဝ်ႇ  ထႅင်မေႃးၵၼ်ယူႇယဝ့်  ” ဝႃႈၼႆ။

မိူဝ်ႈ 1947/2/6 ၽူႈၼမ်းတႆး၊ ၶျၢင်း တင်း ၶၢင် ႁူပ်ႉဢုပ်ႇၵၼ် တီႈဝဵင်းပၢင်လူင် – ဢုပ်ႇလၢတ်ႈတႃႇဢဝ်လွင်ႈလွတ်ႈလႅဝ်းၵွၼ်းၶေႃ ။ တႃႇလွင်ႈၽဵင်ႇပဵင်း။ ဝၼ်းတီႈ 7/2/1947 ၽူႈတႅၼ်း ၸဝ်ႈၾႃ့ 7 ၸဝ်ႈ၊ တူဝ်တႅၼ်းၵူၼ်းမိူင်း 7 ၵေႃ့ – ႁူမ်ႈၵၼ်ၶွတ်ႇၽွတ်ႈ ၶွင်ႊသီႊၸိုင်ႈတႆး ။ ဝၼ်းတီႈ 8/2/1947 ၸွမ်သိုၵ်းဢွင်ႇသၢၼ်းႁွတ်ႈၽႅဝ်မႃးဝဵင်းပၢင်လူင်။ ထိုင်မႃး ဝၼ်းတီႈ 11/2/1947 ၸင်ႇမႃး တႅပ်းတတ်းသၢမ်ယၢင်ႇ သၢမ်ပိူင် မၵ်းမၢႆဝၼ်းဢၼ်ၸဝ်ႈ ၾႃ့တင်း ၵူၼ်းမိူင်းလႆႈၸႂ် ၶွတ်ႇၽွတ်ႈၶွင်ႊသီႊၸိုင်ႈတႆး ဝၼ်းတီႈ 7/2/1947 ၼၼ်ႉ ပဵၼ်ဝၼ်းၸိူဝ်ႉၸၢတ်ႈ   ၸိုင်ႈတႆး၊ မၵ်းမၼ်ႈပႃးတုင်း(ၸွမ်ပိဝ်) ၸိူဝ်ႉၸၢတ်ႈၸိုင်ႈတႆး၊ ၽဵင်းၵႂၢမ်းတၢင်ႇတုင်း(ၸွမ်ပိဝ်) ၸိူဝ်ႉၸၢတ်ႈၸိုင်ႈတႆး။ ပၢင်ၵုမ်ၸိူဝ်းၼႆ့ ပဵၼ်မႃးၶပ်ႉၶပ်ႉတၢမ်းတၢမ်း ၵၼ်သေ ဝၼ်းတီႈ 12/2/1947 ၸင်ႇတႅပ်းတတ်းလႆႈလိၵ်ႈ  ႁူမ်ႈမၢႆပၢင်လူင်သေ ၸင်ႇပဵၼ်မႃး ဝၼ်းမိူင်းႁူမ်ႈတုမ်။