လူင်ပွင်ၸိုင်ႈမိူင်းထႆး ႁွင်ႈၵၢၼ်ၾၢႆႇၵၢၼ်တေႃ့သူင်ႇ မီးၽႅၼ်ၵၢၼ် ႁႂ်ႈၵူၼ်းမိူင်းၸိူဝ်းၵႂႃႇတႃႈပႆတၢင်းၼၼ့် ၸႂ့်လၢႆးသႅၼ်းဝႂ်ၶပ်းၶီႇသႂ်ႇၼႂ်း Appplication ၼႂ်းၾူၼ်း ဢမ်ႇလူဝ်ႇဢဝ်ဝႂ်ႁေႃႈရူတ့်ၵႃးၸပ်းတူဝ်ၵေႃႈလႆႈ။

ဝၼ်းတီႈ 16/12/2018 သိုဝ်ႇၶၢဝ်ႇ Thairath ပိုၼ်ၽၢဝ်ႇဝႃႈ ၸၢႆးၽိရႃႊၽူၼ်ႊ ထႃႊဝွၼ်ႊသူႊၽၸရိူၼ်ႊ ၽူႈပွင်ၵၢၼ်ၾၢႆႇၵၢၼ်တေႃ့သူင်ႇ လၢတ်ႈဝႃႈ ႁွင်ႈၵၢၼ်ၾၢႆႇၵၢၼ်တေႃ့သူင်ႇႁၢင်ႈႁႅၼ်းတေ ဢဝ်ဝႂ်လၢႆႊသိၼ်ႊ ႁေႃႈရူတ့် ၵႃးသႂ်ႇၼႂ်း Appplication ဝႆ့ၼႂ်းၾူၼ်း (မိုဝ်းထိုဝ်) သေၵႂႃႇလႂ်မႃးလႂ်ဢမ်ႇဢဝ်ဝႂ်ၸပ်းတူဝ်ၵေႃႈလႆႈ ။

ၸၢႆးၽိရႃႊၽူၼ်ႊ လၢတ်ႈတီႈသိုဝ်ႇၶၢဝ်ႇ Thairath ဝႃႈ “ မိူဝ်းၼႃႈမႃးၼႆ့ ၵူၼ်းမိူင်းထႆးဢမ်ႇလူဝ်ႇဢဝ်ဝႂ် ၶပ်းၶီႇရူတ့်ၸပ်းတူဝ်ၵေႃႈလႆႈ ပေႃးၺႃးၵူတ်ႇထတ်းၵေႃႈပိုတ်ႇ APP ၼႂ်းမိုဝ်းထိုဝ်ၼႄၵေႃႈလႆႈယဝ့် ၶၢတ်ႈလၢမ်းဝႃႈတေတႄႇၸႂ့်ၵၢၼ်လႆႈၵႂႃႇ ၼႂ်းလိူၼ်ၵျႅၼ်ႊၼိဝ်ႊရီႊ 2019 ၼႆ့ၵႂႃႇ ” ဝႃႈၼႆ။

ၸၢႆးပိူင်း ၸဝ်ႈၼႃႈတီႈၾၢႆႇမၢႆမီႈႁႅင်းၵၢၼ် HRDF လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ လွင်ႈၼႆ့ပေႃးပိူၼ်ႈ ပိုၼ်ၽၢဝ်ႇၸႂ့်မႃးတႄ့ မၼ်းၵေႃႈလႅပ်ႈပႃးႁႅင်းၵၢၼ်ယၢၼ်မိူင်းယူႇဢၼ်မီးသုၼ်ႇၸႂ့် ၵူၺ်းၵႃႈမၢႆၼပ့် ဝတ်းၵူၼ်း ထႆးၶဝ်လႄႈ ႁႅင်းၵၢၼ်ႁဝ်းသမ့်ဢမ်ႇမိူၼ်ၵၼ်လႄႈ ဢၼ်ၼႆ့ၵေႃႈပဵၼ်လွင်ႈၶွင့်ၶမ်ၸႂ် ၵူၺ်းၵႃႈပိူၼ်ႈၵေႃႈ တေမီးလၢႆးမၼ်းယူႇ ” ဝႃႈၼႆ။

Appplication ဢၼ်တေႁဵတ်းဢွၵ်ႇမႃးၼႆ့ ယင်းမီးတူဝ်ၾၢင့်တိူၼ်ဝၼ်းဢၼ်ဝႂ်ၶပ်းၶီႇမူတ်းဢႃယု လႄႈ တူၺ်းဝႂ်သင်ႇ ပၼ်တၢမ်ႇ ဢၼ်ၺႃးၸဝ်ႈၼႃႈတီႈၶဝ်ပၼ် ၽွင်းဢမ်ႇၸွမ်းပၵ်းပိူင်ၵၢၼ်ႁေႃႈရူတ့်ၵႃး လိူဝ်ၼၼ့် ယင်းၼႄပၼ်ပႃး ၽႅၼ်တီႈ မိူဝ်ႈၽွင်းၺႃးၽေးၵိုင့်ၵၢင့်လႄႈ လူဝ်ႇလွင်ႈတၢင်းၸွႆႈထႅမ် ၼႆယဝ့်။

ယိူင်းဢၢၼ်းဢၼ်တေႁဵတ်းဢွၵ်ႇ Appplication ဝႂ်ၶပ်းၶီႇၼႂ်းၾူၼ်း (မိုဝ်ထိုဝ်) ၼႆ့ ပိူဝ်ႈႁႂ်ႈၵူၼ်းဝၢၼ်ႈ ၵူၼ်းမိူင်း မီးလွင်ႈငၢႆႈလူမ်ၸႂ်လႄႈ ႁႂ်ႈမီးလွင်ႈၶိုတ်းၸၼ့်ၶိုတ်းၵၢပ်ႈပၢၼ်ဝၢၼ်ႈမိူင်းၼႆယဝ့်။