ပီႈၼွင်ႉၸၢဝ်းၶိူဝ်းထၼု ႁူမ်ႈၵၼ်ၸတ်းႁဵတ်းဝၼ်းၸိူဝ်ႉၸၢတ်ႈထၼု ပဵၼ်ပွၵ်ႈၵမ်းႁႅၵ်ႈ တီႈၸႄႈဝဵင်းယႂႃႇငၢၼ်ႇ ၼႃႈ လိၼ်ၽွင်းငမ်းတူဝ်ၵဝ်ႇထၼု မီးၵူၼ်း မိူင်းၶဝ်ႈႁူမ်ႈ မွၵ်ႈ 2 မိုၼ်ႇပၢႆ။
ဝၼ်းတီႈ 13-14/12/2018 ပီႈၼွင်ႉၸၢဝ်းထၼု ႁူမ်ႈၵၼ်သေ ၸတ်းႁဵတ်းဝၼ်းၸိူဝ်ႉၸၢတ်ႈ တီႈဝတ်ႉၽြႃးသူၺ်ႇပုၼ်ႉ လိၼ်း(ရွှေပွင့် လင်းစေတီ ဘုရား) ၸႄႈဝဵင်းယႂႃႇငၢၼ်ႇ ၸိုင်ႈတႆးပွတ်းၸၢၼ်း။ ယိူင်းဢၢၼ်း တႃႇႁၵ်ႉသႃသိမ်းပႅင်း ၾိင်ႈထုင်းၸၢဝ်းၶိူဝ်းထၼု၊ ႁႂ်ႈပီႈၼွင်ႉထၼု ၽွမ်ႉႁူမ်ႈၵၼ်လႄႈ ႁႂ်ႈၸိူဝ်ႉၸၢတ်ႈထၼု ၶိုၼ်ႈယႂ်ႇမႂ်ႇသုင် ၸိူဝ်းၼႆႉသေ ၸင်ႇႁူမ်ႈၵၼ် တႅပ်းတတ်း ၸတ်းႁဵတ်းမႃး ဝၼ်းၸိူဝ်ႉၸၢတ်ႈ ဝႃႈၼႆ။
ဢူးဝၢႆးပူဝ်ႇ ၽူႈၼမ်းၼႂ်း ငဝ်ႈငုၼ်းၸၢဝ်းၶိူဝ်းထၼု လၢတ်ႈတီႈ သိုဝ်ႇ 7 Day ဝႃႈ “ တွၼ်ႈတႃႇ တေၸတ်းႁဵတ်း ပၢင်ပွႆး ၼႆႉ ႁဝ်းၶႃႈ လႆႈၶၢဝ်းယၢမ်း 1 လိူၼ်ၵူၺ်း။ လႆႈႁႃငိုၼ်းၵွင်ၵၢင်ၵေႃႈ လႆႈၶၢဝ်းယၢမ်း 15 ဝၼ်းၵႃႈၼႆႉၵူၺ်း။ ဢမ်ႇထၢင်ႇ သေဢိတ်းဝႃႈ ၵူၼ်းတေၵိုၼ်းၶွၼ်ႈပဵၼ်တၢၼ်ႇၼႆႉ။ ၵူၼ်းမိူင်း ဢၼ်မႃးၶဝ်ႈႁူမ်ႈ တေမီးမွၵ်ႈ 2 မိုၼ်ႇပၢႆ တေလႆႈဝႃႈ ပဵၼ်ဢၼ်ၸူမ်းၸွမ်းတႄႉ” ဝႃႈၼႆ။
တွၼ်ႈတႃႇ ဝၼ်းၸိူဝ်ႉၸၢတ်ႈ ပီႈၼွင်ႉၸၢဝ်းၶိူဝ်းထၼုၼႆႉ တူၵ်းလူင်းလႆႈၸႂ်ၵၼ် တေပၼ်ႇပုတ်ႈၵၼ်သေ ၸတ်း ႁဵတ်းၵႂႃႇ မိူၼ်ၼင်ႇ ၸႄႈဝဵင်းယႂႃႇငၢၼ်ႇ၊ ပၢင်းတရႃႉ၊ ၵၢတ်ႇလေႃႉ၊ လွၵ်းၸွၵ်ႇ၊ ၼွင်ၶဵဝ်၊ တူၼ်ႈတီး၊ ၵျွၵ်ႉမႄးလႄႈ တႃႈၵုင်ႈ ၸိူဝ်းၼႆႉ။
ပီႈၼွင်ႉၸၢဝ်းထၼု ဢၼ်ယူႇသဝ်းၼမ်တီႈသုတ်းသမ်ႉ ပဵၼ်ၼႂ်းၸႄႈဝဵင်းယႂႃႇငၢၼ်ႇတင်း ပၢင်းတရႃႉ ၸိူဝ်းၼႆႉ။
တွၼ်ႈတႃႇတေပဵၼ်မႃး ဝၼ်းၸိူဝ်ႉၸၢတ်ႈ ၸၢဝ်းထၼုၼႆႉ ယူႇတီႈပီႈၼွင်ႉထၼု 8 ၸႄႈဝဵင်း ႁူမ်ႈၵၼ်သေ လႆႈတွတ်ႈ ၶႅပ်းၵၢင်ၸႂ် မိူဝ်ႈလိူၼ်ၼူဝ်ႊဝႅမ်ႊၿိူဝ်ႊ 2017 ပေႃးထိုင်မႃး လိူၼ် ၸဵင်မႂ်ႇ 8 ၶမ်ႈၸိုင် မၵ်းမၼ်ႈပဵၼ် ဝၼ်းၸိူဝ်ႉၸၢတ်ႈ ထၼု ဝႃႈၼႆ။
ၶေႃႈမုလ်း – 7 Day
