သိုၵ်း RCSS ဢၼ်ၺႃးသိုၵ်းပဢူဝ်းလမ်းၾၼ်း မိူဝ်ႈဝၼ်းတီႈ 11 ၼၼ်ႉ လႆႈမၢတ်ႇၸဵပ်းႁၢဝ်ႈႁႅင်း 2 ၵေႃႉ။ ၼႂ်း 2 ၵေႃႉ ၼၼ်ႉ လႆႈလူႉ တၢႆ ၵေႃႉၼိုင်ႈ ဝႃႈၼႆ။

ဝၼ်းတီႈ 13/12/2018 ယၢမ်းႁူဝ်ၶမ်ႈ 6 မူင်းပၢႆ ၵေႃႉသိုၵ်း RCSS ၸိုဝ်ႈႁွင်ႉ ၸၢႆးသႅင် လႆႈမၢတ်ႇၸဵပ်းႁၢဝ်ႈႁႅင်းသေ လႆႈ လူႉတၢႆၵႂႃႇတီႈၼႂ်းၸႄႈ ဝဵင်းၼမ်ႉၸၢင် ၸိုင်ႈတႆးပွတ်းၸၢၼ်း။ ၺႃးၾၼ်းမၢတ်ႇၸဵပ်းႁၢဝ်ႈႁႅင်း ၸွမ်းၵွၵ်းႁူဝ်၊ ၸွမ်း ၶႅၼ်၊ ၸွမ်းၶႃလႄႈ ၸွမ်းတူဝ် ဝႃႈၼႆ။

ႁွင်ႈၵၢၼ်ပိုၼ်ၽၢဝ်ႇ တႆးလွတ်ႈလႅဝ်း ၶွင် RCSS/SSA ဢွၵ်ႇဝႆႉဝႃႈ “ ယူႇတီႈၾၢႆႇမေႃယႃ တပ်ႉသိုၵ်းၸိုင်ႈတႆး RCSS လႆႈ ၶတ်းၸႂ် ယူတ်းယႃပၼ် တီႈႁွႆးၸဵပ်း ၵေႃႉသိုၵ်းယူႇသေတႃႉ ယွၼ်ႉဝႃႈ တိူဝ်ႉမၢတ်ႇၸဵပ်းႁၢဝ်ႈႁႅင်းသေ လႆႈလူႇ ၼိူဝ်ႉ လိူတ်ႈသၢႆၸႂ် သဵင်ႈၵၢမ်ႇၵႂႃႇ တီႈၸႄႈဝဵင်းၼမ်ႉၸၢင် မိူဝ်ႈဝၼ်းတီႈ 13 ယၢမ်းၵၢင်ၶမ်ႈ 6 မူင်း” ဝႃႈၼႆ။

လိူဝ်ၼၼ်ႉ ဢွၵ်ႇဝႆႉဝႃႈ “ ၸုမ်းဢၼ်ဢဝ်ၽႃႉမႃးၾၼ်းသႂ်ႇ ၵေႃႉသိုၵ်း RCSS ၼၼ်ႉ မီးဢဵၼ်ႁႅင်း 20 ပၢႆ ပဵၼ်ၸုမ်း ၵူဝ်ႇယိၼ်ႇလေး (မုၼ်ၸဝ်ႈပဢူဝ်း) ၸုမ်းၶဝ် ၶဝ်ႈႁိမ်ၵွင်ႈၸုမ်း RCSS လႄႈ ၸင်ႇလႆႈၵႅတ်ႇၶႄတူဝ် တုမ်ႉတွပ်ႇယိုဝ်း ၶိုၼ်းသေသိုၵ်းၸုမ်းၼၼ်ႉ လူႉတၢႆထင်တီႈ 4 ၵေႃႉ။ ၵေႃႉသိုၵ်း RCSS သမ်ႉ လႆႈမၢတ်ႇၸဵပ်း 2 ၵေႃႉ” ဝႃႈၼႆ။

ၵဵဝ်ႇလူၺ်ႈလွင်ႈၼႆႉ ယူႇတီႈၽူႈတွႆႇႁွၵ်ႈ လႆႈၵပ်းသိုပ်ႇတိတ်းတေႃႇႁႃ တၢင်းၽူႈၶၢၼ်ပၢၵ်ႇ RCSS တီႈလုမ်းၵပ်းသၢၼ် ဝဵင်းတူၼ်ႈတီးၵေႃႈဢမ်ႇလႆႈ၊ ၵပ်းသိုပ်ႇႁႃ ၽူႈၶၢၼ်ပၢၵ်ႇ တီႈၸဝ်ႈသိုၵ်း ၸၢႆးမိူင်းၵေႃႈ ဢမ်ႇလႆႈ။

တီႈသိုဝ်ႇၶၢဝ်ႇ RFA တႄႉ ဢွၵ်ႇဝႆႉဝႃႈ “ မိူဝ်ႈဝၼ်းတီႈ 11 ၼၼ်ႉ သိုၵ်း RCSS တီႉၺွပ်းႁွင်ႉဢဝ် ၽူႈၵွၼ်းဝၢၼ်ႈ ၼမ်ႉ ႁူး လႄႈ ၵူၼ်းဝၢၼ်ႈ 3 ၵေႃႉ ၵႂႃႇ ၵူၼ်းဝၢၼ်ႈၵႂႃႇတုၵ်းယွၼ်းႁႂ်ႈပွႆႇပၼ်ၶိုၼ်းလႄႈ လႆႈပဵၼ်ပၼ်ႁႃၵၼ် ၽိတ်းမေႃး ၵၼ်။ တၢင်းၾၢႆႇၸၢဝ်းပဢူဝ်း လႆႈလူႉတၢႆ 5 ၵေႃႉ၊ မၢတ်ႇၸဵပ်း 3 ၵေႃႉ” ဝႃႈၼႆ။

ၾၢႆႇ RCSS/SSA တႄႉ ပိုၼ်ၽၢဝ်ႇဝႃႈ ဝၼ်းတီႈ 11/12/2018 ၼၼ်ႉ သိုၵ်း RCSS/SSA ဢၼ်တူင်ႉၼိုင်တၢင်းဢိူင်ႇ တွင်ၼဝ်ႈ ၸႄႈဝဵင်းလွႆ လႅမ်ၼၼ်ႉ ၺႃးၸၢဝ်းပဢူဝ်း ဢဵၼ်ႁႅင်း 20 ပၢႆ ဢဝ်ၽႃႉၾၼ်းသႂ်ႇ ၵေႃႉသိုၵ်း RCSS သေ ၶိုင် ဢၢၼ်းႁိမ်ၵွင်ႈ။ ယူႇတီႈၾၢႆႇၵေႃႉသိုၵ်း RCSS သမ်ႉ မီးဢဵၼ်ႁႅင်း မွၵ်ႈ 10 ၵေႃႉသေ လႆႈၵႅတ်ႇၶႄတူဝ် ၶိုၼ်းလႄႈ လႆႈတုမ်ႉတွပ်ႇ ယိုဝ်းၶိုၼ်း ၵူၼ်းၸၢဝ်းပဢူဝ်း တင်းမူတ်း လႆႈလူႉတၢႆ 5 ၵေႃႉ မၢတ်ႇၸဵပ်း 3 ၵေႃႉ ဝႃႈၼႆ။