ၼႂ်းမိူင်းႁူမ်ႈတုမ် ပတ်းပိုၼ်ႉ ၸုမ်းယိပ်းၵွင်ႈၵၢင်ႇၼင်ႇၵၼ် ပဵၼ်ပၢင်တိုၵ်းၵၼ်ၶိုၼ်း တိူဝ်းၼမ်မႃး ဝႃႈၼႆ။
ႁွင်ႈၵၢၼ်ၾၢႆႇႁူမ်ႇလူမ်ႈလႄႈ လွင်ႈ ငမ်းယဵၼ် မိူင်းမၢၼ်ႈ ( Myanmar Institute of Peace and Security – MIPS) ပိုၼ်ၽၢဝ်ႇဢွၵ်ႇဝႆႉဝႃႈ ပူၼ်ႉမႃး မိူဝ်ႈလိူၼ်ၼူဝ်ႊဝႅမ်ႊၿိူဝ်ႊၼၼ်ႉ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၼင်ႇၵၼ် ပဵၼ်ပၢင် တိုၵ်းၵၼ် တင်းမူတ်း 13 ပွၵ်ႈ။ တပ်ႉသိုၵ်းလူင်ပွင်ၸိုင်ႈမၢၼ်ႈ တင်း ၸုမ်းယိပ်းၵွင်ႈၵၢင်ႇၸၢဝ်း ၶိူဝ်း လႆႈပဵၼ်ပၢင်တိုၵ်း ၵၼ် 21 ပွၵ်ႈ တင်းမူတ်း ပဵၼ် 44 ပွၵ်ႈ ဢၼ်ၸႂ်ႉမၢၵ်ႇသမ်ႉ မီးမွၵ်ႈ 10 ပွၵ်ႈ။
ဢူးမိၼ်းသေႃႇဢူး ၽူႈပွင်ၵၢၼ် ၾၢႆႇၸတ်းၵၢၼ် MIPS လၢတ်ႈဝႃႈ “ ပၢင်တိုၵ်းၼႆႉ ပဵၼ်ၶိုၼ်ႈမႃးႁၢဝ်ႈႁႅင်း ၵူၺ်းၵႃႈ ဢမ်ႇၸႂ်ႈၸွမ်းတပ်ႉသိုၵ်းမၢၼ်ႈ။ ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်းၼင်ႇၵၼ်ၶိုၼ်းၵူၺ်း ပဵၼ်ပၢင်တိုၵ်းၵၼ် ၶိုၼ်ႈမႃး ၼမ်” ဝႃႈၼႆ။
မိူဝ်ႈလိူၼ်ဢွၵ်ႊထူဝ်ႊၿိူဝ်ႊၼၼ်ႉၵေႃႈ တပ်ႉသိုၵ်းလူင်ပွင်ၸိုင်ႈမၢၼ်ႈ တင်း ၸုမ်းယိပ်းၵွင်ႈၵၢင်ႇၸၢဝ်းၶိူဝ်း လႆႈပဵၼ် ပၢင်တိုၵ်းၵၼ် 16 ပွၵ်ႈ၊ ၸုမ်းယိပ်းၵွင်ႈၵၢင်ႇၸၢဝ်းၶိူဝ်းၼင်ႇၵၼ် လႆႈပဵၼ်ပၢင်တိုၵ်းၵၼ် 12 ပွၵ်ႈ။ ၵူၺ်းၵႃႈ ဢၼ်ၸႂ်ႉ တိုဝ်းမၢၵ်ႇ ၼႂ်းပၢင်တိုၵ်းၼၼ်ႉ မီး 17 ပွၵ်ႈ ဝႃႈၼႆ။
ဢွင်ႈတီႈဢၼ်လႆႈပဵၼ်ပၢင်တိုၵ်းၵၼ်သမ်ႉ ၵမ်ႈၼမ် ပဵၼ်ၼႂ်းပိုၼ်ႉတီႈၸၢဝ်းၶိူဝ်း တင်းမူတ်း 20 ၸႄႈဝဵင်း။ ၼႂ်း 20 ၸႄႈ ဝဵင်းၼၼ်ႉ တႃႇ 11 ၸႄႈဝဵင်း ပဵၼ်ပၢင်တိုၵ်းၵၼ် 1 ၸႄႈဝဵင်း 1 ပွၵ်ႈ။ ၼႂ်းမိူင်းတႆးသမ်ႉ ၸႄႈဝဵင်းၼမ်ႉတူႈ 7 ပွၵ်ႈ၊ ၸႄႈဝဵင်းသီႇပေႃႉ၊ ၵျွၵ်ႉမႄးလႄႈ ၵူတ်ႉၶၢႆ ၸိူဝ်းၼႆႉသမ်ႉ 1 ၸႄႈဝဵင်းလႂ် ပဵၼ် 4 ပွၵ်ႈ။ လိူဝ်ၼၼ်ႉ ၼႂ်းၸႄႈမိူင်းၶျၢင်း ထႅင်ႈ ဝႃႈၼႆ။
ၼႂ်းလိၵ်ႈၽိုၼ်ၽၢဝ်ႇၼၼ်ႉ ဢွၵ်ႇဝႆႉဝႃႈ ၸုမ်းယိပ်းၵွင်ႈၵၢင်ႇ ဢၼ်ပဵၼ်ပၢင်တိုၵ်းၵၼ် ၼမ်လိူဝ်တီႈသုတ်းသမ်ႉ RCSS တင်း (သိုၵ်းဢူၺ်းလီပွတ်းႁွင်ႇ ဢၼ် TNLA ႁူမ်ႈတင်း SSPP ႁူမ်ႈၵၼ်) ဝႃႈၼႆ။
လိူဝ်ၼၼ်ႉ ဢၼ်ပဵၼ်ပၢင်တိုၵ်းၵၼ်ၼမ်သုတ်းသမ်ႉ ပဵၼ်ၼႂ်းလိူၼ်မၢတ်ႊၶျ် 2018 တပ်ႉသိုၵ်းလူင်ပွင်ၸိုင်ႈမၢၼ်ႈ တင်း ၸုမ်းယိပ်းၵွင်ႈၵၢင်ႇၸၢဝ်းၶိူဝ်း တင်းမူတ်း လႆႈပဵၼ်ပၢင်တိုၵ်းၵၼ် 89 ပွၵ်ႈ။ ၸုမ်းၸၢဝ်းၶိူဝ်းၼင်ႇၵၼ် ပဵၼ်ပၢင် တိုၵ်း ၵၼ် 3 ပွၵ်ႈ။ လိူဝ်ၼၼ်ႉ ဢၼ်ၸႂ်ႉမၢၵ်ႇလူင်သေ ယိုဝ်းၼၼ်ႉ မီး 18 ပွၵ်ႈ ယူႇတီႈ MIPS ပိုၼ်ၽၢဝ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ