ပေႃးမႄႈပီႈၼွင့်ၵူၼ်းမိူင်းတႆးလႄႈ လၢႆလၢႆၸၢဝ်းၶိူဝ်း ဢွၼ်ၵၼ်ႁူမ်ၸူမ်းႁပ့်တွၼ်ႈ ၸဝ်ႈလႅင်းသႂ်ႁိူင်း ၽူႈၼမ်း ၸုမ်းသိုၵ်းၵူၼ်းမိူင်းထုင့်ပၢင်ႇလႅင်းသႂ် ၼႂ်းတိုဝ့်တၢင်းလႆႈႁပ့်သူးၽူႈပိုၼ်ၽႄႈ သႃသၼႃႁႂ်ႈႁိူဝ်ႈႁိူင်း တီႈမိူင်းထႆးသေပွၵ်ႈမိူင်းတႆး။
ဝၼ်းတီႈ 13/12/2018 ၵေႃလိၵ်ႈလၢႆးလႄႈ ၾိင်ႈငႄႈတႆး ဝဵင်းလူင်တူၼ်ႈတီး ၊ ပီႈၼွင့်ၵူၼ်းမိူင်း လၢႆၸၢဝ်းၶိူဝ်း ႁူမ်ႈပႃးထိုင် သိုၵ်းၵူၼ်းမိူင်းဢွၼ်ၵၼ်ႁူမ်ၸူမ်းႁပ့်တွၼ်ႈ ၸဝ်ႈလႅင်းသႂ်ႁိူင်း ၽူႈၼမ်းတပ့်သိုၵ်းၵူၼ်းမိူင်းထုင့်ပၢင်ႇလႅင်းသႂ် ( မၢၵ်ႇၵႅင်း) ၽူႈလႆႈႁပ့်သူး ၽူႈပဵၼ်တူဝ်ယၢင်ႇလီလႄႈ ပိုၼ်ၽႄႈသႃသၼႃသေ ပွၵ်ႈၶိုၼ်း။
ၸၢႆးသႅၼ်ႁၵ့်တႆး လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ မၼ်းၸဝ်ႈပဵၼ်တႆးသေ လႆႈၵႂႃႇႁပ့်သူး တီႈမိူင်းထႆးပဵၼ်ဢၼ်လီၸူမ်းသိူဝ်းတႄ့ၶႃႈဢေႃႈ။ မၼ်းၸဝ်ႈၶိုၼ်းပွၵ်ႈမႃးၼႆ့ၵေႃႈ တေလႆႈႁၼ်ဝႃႈ ၵူၼ်းဝၢၼ်ႈၵူၼ်းမိူင်း ဢမ်ႇဝႃႈတႆးလႄႈ လၢႆလၢႆၸၢဝ်းၶိူဝ်းဢွၼ်ၵၼ်ႁူမ်ၸူမ်းႁပ့်တွၼ်ႈမၼ်းၸဝ်ႈ တေလႆႈဝႃႈ မၼ်းၸဝ်ႈၼႆ့ ပဵၼ်ၽူႈၼမ်းတူဝ်ယၢင်ႇလီၼႂ်းတႆးၸဝ်ႈၼိုင်ႈဢေႃႈ ” ဝႃႈၼႆ။
မိူဝ်ႈဝၼ်းတီႈ 08/12/2018 ၼၼ့် ၾၢႆႇႁဵတ်းၵၢၼ်သႃသၼႃလုမ်ႈၾႃ့၊ ၾၢႆႇပူၵ်းပွင်ၵူၼ်းၼုမ်ႇလႄႈ ၾၢႆႇသိုဝ်ႇၶၢဝ်ႇထႆး ႁူမ်ႈၵၼ်ၸတ်းႁဵတ်းပၢင်မွပ်ႈယိုၼ်ႈသူးရၢင်းဝလ်း Naga Award ပၼ်ၽူႈၵူၼ်းလီ ဢၼ်ႁဵတ်းသၢင်ႈ ပူၵ်းပွင်တူင်ႇဝူင်းၵူၼ်း ၊ ပၢႆးပၺ်ၺႃ၊ ပၢႆးသႃသၼႃၸိူဝ်းၼႆ့ ၽူႈဢၼ်လႆႈႁပ့်သူး ဢၢၼ်ႇႁူဝ်ပၢၵ်ႇၼၼ့် ပႃးတႆး 3 ၵေႃ့ မိူၼ်ၼင်ႇၸဝ်ႈတူၼ်ၶူး Dr.ၼေႃႇၶမ်းလႃ့ ထမ်မသႃမိ ၶူးပူင် သွၼ်ၸၼ့်ၸွမ်ပုတ့်ထ မိူင်းတႆး ဝဵင်းလူင်တူၼ်ႈတီး၊ ၸဝ်ႈလႅင်းသႂ်ႁိူင်း ၽူႈၼမ်းသိုၵ်းၵူၼ်းမိူင်း ထုင့်ပၢင်ႇလႅင်းသႂ် ၸႄႈဝဵင်းၼမ့်ၸၢင်၊ ၼၢင်းၸၢမ်လႅင်း ၸဝ်ႈၶွင် ႁၢၼ့်ၶၢႆၶူဝ်းတႆး ငူၺ်ႇၸၢၼ်ႇဢဵင်ႇ ဝဵင်းလူင်တူၼ်ႈတီး ၸိူဝ်းၼႆ့။
