ၽူႈတႅၼ်းသၽႃးၸႄႈမိူင်း မိူင်းၵိုင် ဢုပ်ႇလၢတ်ႈတွင်ႈထၢမ် လွင်ႈၾၢႆၽွင်းမိူင်း မိူင်းၵိုင်လူႉၵွႆ။ ၽူႈမီးပုၼ်ႈၽွၼ်းတွပ်ႇ လၢတ်ႈဝႃႈ ႁဵတ်းႁႂ်ႈၾၢႆၼၼ်ႉ ၶဝ်ႈပႃးၼႂ်းၶူင်းၵၢၼ်ငဝ်ႈငုၼ်း ၸႄႈမိူင်းတႆးၵွၼ်ႇ ဝႃႈၼႆ။

လုင်းၸၢႆးလူင် ၽူႈတႅၼ်းမိူင်းၵိုင် တွင်ႈထၢမ်လွင်ႈၼႆႉ တီႈၼႂ်းပၢင်ၵုမ်သၽႃးမိူင်းတႆး ပွၵ်ႈၵမ်း 2 ဢၼ်ၸတ်းႁဵတ်း တီႈဝဵင်းတူၼ်ႈတီး မိူဝ်ႈဝၼ်းတီႈ 12/12/2018။

လုင်းၸၢႆးလူင် ၽူႈတႅၼ်းပႃႇတီႇႁူဝ်သိူဝ် လၢတ်ႈတီႈၽူႈတွႆႇႁွၵ်ႈဝႃႈ “ ဢွၼ်တၢင်းသုတ်းတႄႉ တွင်ႈထၢမ်လွင်ႈၾၢႆ၊ ၾၢႆၼႆႉ မိူဝ်ႈၾူၼ်မႃး ၼႂ်းႁိုဝ်ႉၼၼ်ႉ မၼ်းၵွႆၵႂႃႇမူတ်းယဝ်ႉ။ တေႃႈလဵဝ်ၼႆႉ ဢမ်ႇၵိုတ်းသေဢိတ်းယဝ်ႉ မိူဝ်ႈပူၼ်ႉ မႃးၼၼ်ႉၵေႃႈ ယူႇတီႈၾၢႆႇၸဝ်ႈၼႃႈတီႈၾၢႆၶဝ် လူင်းထတ်းတူၺ်းသေ တၢင်ႇၶိုၼ်ႈဝႆႉ ယဝ်ႉသမ်ႉဢမ်ႇႁဵတ်းပၼ် ၼႆလႄႈ ႁဝ်းလႆႈထၢမ်တူၺ်းၶိုၼ်း တေႁဵတ်းပၼ်မိူဝ်ႈလႂ် ၸဵမ်ၸိူဝ်းၼႆႉ။ ၾၢႆဢၼ်လူႉ ၵွႆၵႂႃႇၼၼ်ႉ ပဵၼ်ၾၢႆ တီႈဝၢၼ်ႈ ၽွင်းမိူင်း ၼႂ်းၸႄႈဝဵင်းမိူင်းၵိုင်” ။

“ လွင်ႈဢၼ်ႁဝ်းထၢမ်ၵႂႃႇလွင်ႈၾၢႆၼၼ်ႉ ၶဝ်သမ်ႉတွပ်ႇလၢတ်ႈၼႂ်းသၽႃး လူဝ်ႇႁႂ်ႈပဵၼ်ၶူင်းၵၢၼ်ငဝ်ႈငုၼ်းၵွၼ်ႇ ၸင်ႇ တေၸၢင်ႈဝူၼ်ႉပၼ်တႃႇၵႄႈလိတ်ႈ။ တီႈတႄႉမၼ်းတႄႉ ပႃးတၢင်းငဝ်ႈငုၼ်း၊ ပႃးတၢင်းၽူႈၵွၼ်းၸႄႈဝဵင်းၶဝ် လႄႈ ႁွင်ႈၵၢၼ် လူင်ပွင်ၸိုင်ႈ လူင်းပိုၼ်ႉတီႈၵူတ်ႇထတ်းယဝ်ႉ။ ဝႃႈလႃႈၵေႃႈ ၶူင်းၵၢၼ်ၸႄႈဝဵင်း ဢမ်ႇသူင်ႇသဵၼ်ႈမၢႆၶဝ်ႈ ၼႂ်းငဝ်ႈငုၼ်းႁိုဝ်ၵေႃႈ ဢမ်ႇႁူႉ လွင်ႈၼႆႉၵေႃႈ ပဵၼ်လွင်ႈယူပ်ႈယွမ်းဢၼ်ၼိုင်ႈ” ဝႃႈၼႆ။

ၾၢႆၼမ်ႉ ဢၼ်မီးတီႈဝၢၼ်ႈၽွင်းမိူင်းၼႆႉ  လဵင်ႉၼမ်ႉသူၼ်ႁႆႈၼႃးၵူၼ်းမိူင်း  ဝၢၼ်ႈၽွင်းမိူင်း၊ ဝၢၼ်ႈၼွင်မူၼ်း၊ ဝၢၼ်ႈဝဵင်းငိုၼ်းၸိူဝ်းၼႆႉ တူင်ႈၼႃးတင်းမူတ်း 400 ဢေႊၶိူဝ်ႊပၢႆဝႃႈၼႆ။