သိုၵ်းဝႃႉ UWSA ပွတ်းၸၢၼ်း ၶိုၼ်းဢွၼ်ၵၼ် ယွမ်းၼွမ်းၵၼ်ႇတေႃးသေ ၵၢပ်ႈသွမ်းသင်ၶၸဝ်ႈ ၼႂ်းၸႄႈဝဵင်းမိူင်း တူၼ် ၵဵဝ်ႇလွင်ႈဢၼ်လႆႈယႃႉ ၵျွင်းသိလ်ထမ်းပေႃႈ ၸဝ်ႈဝုၼ်းၸုမ်ႉ ဝႃႈၼႆ။

မိူဝ်ႈၼႆႉ ဝၼ်းတီႈ 13/12/2018 ယၢမ်းၵၢင်ၼႂ် သိုၵ်းဝႃႉ UWSA ပွတ်းၸၢၼ်း ဢၼ်ယၢင်ၵေႃႇၵျူင်း ဢွၼ်ႁူဝ်ၼၼ်ႉ ၶိုၼ်းယွမ်းၼွမ်း ၵၼ်ႇတေႃး လႄႈ ၵၢပ်ႈသွမ်းသင်ၶၸဝ်ႈ မိူင်းတူၼ်။ ယွၼ်ႉဝႃႈ လႆႈယႃႉလႅဝ် ပႅတ်ႈၵျွင်းႁေႃးထမ်း/တြႃး ၸဝ်ႈသိလ်ထမ်းဝုၼ်းၸုမ်ႉ၊ သႃလႃး လႄႈ ဢွင်ႈတီႈ တေတႄႇၵွင်းမူး မိူဝ်ႈဝၼ်းတီႈ 11 ၼၼ်ႉ။ ဢွင်ႈတီႈၼႆႉမီး ၼႂ်း ဢိူင်ႇမိူင်းႁၢင် ၸႄႈဝဵင်းမိူင်းတူၼ် ၸႄႈတွၼ်ႈမိူင်းသၢတ်ႇ ၸိုင်ႈတႆးပွတ်းဢွၵ်ႇၶူင်း ဝႃႈၼႆ။

ၽူႈႁၢပ်ႇၵၢၼ်သႃသၼႃ ၸဝ်ႈၼိုင်ႈ ၼႂ်းၸႄႈဝဵင်းမိူင်းတူၼ် လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၼႆႉ သင်ၶၸဝ်ႈ၊ ၽူႈယႂ်ႇ ၵူၼ်းလူင်(ပေႃးပၵ)လႄႈ ၾၢႆႇသိုၵ်းဝႃႉၶဝ် လႆႈမႃးဢုပ်ႇဢူဝ်းၵၼ် ၶဝ်ၵေႃႈ ယွမ်းၼွမ်းသေ ၵၼ်ႇတေႃး ယဝ်ႉၵေႃႈ ၵၢပ်ႈ သွမ်းသင်ၶၸဝ်ႈ။ ၵမ်းၼႆႉ ၶဝ်ၵေႃႈ ၶဝ်ႈၸႂ်ၵၼ် မူတ်းယဝ်ႉ။ တီႈဢၼ်ၶဝ်မႃးထူမ်လိၼ်သႂ်ႇၸိူဝ်းၼၼ်ႉၵေႃႈ ၶဝ်ၶိုၼ်း မႃးမႄးမူတ်း တေၶုတ်း ႁဵတ်းမိူၼ်ၵဝ်ႇမူတ်း၊ ႁေႃၸဝ်ႈၶူးဝႃးပေႃႈၵေႃႈ တေၶိုၼ်းႁဵတ်းပၼ်မူတ်းမူတ်း” ဝႃႈၼႆ။

ဢွင်ႈတီႈလိၼ်ၼၼ်ႉ မၼ်းပဵၼ်ၼႃႈတီႈသိုၵ်းဝႃႉၵုမ်းၵမ်ဝႆႉဝႃႈၼႆသေတႃႉ မိူဝ်ႈပူၼ်ႉမႃး ၶၢဝ်းတၢင်း 1 ပီ 2 ပီၼၼ်ႉ ၸဝ်ႈ သိလ်ထမ်းဝုၼ်းၸုမ်ႉ မႃးလူႇၶၢမ်ႇဢဝ်သေ ယူႇတီႈႁူဝ်ၼႃႈသိုၵ်းဝႃႉ ယၢင်ၵေႃႇၵျူင်း ယုၵ်ႉလူႇတၢၼ်းပၼ် တႃႇ 50 ဢေႊၶိူဝ်ႊသေ ယၢတ်ႇၼမ်ႉ လူႇတၢၼ်းဝႆႉယဝ်ႉ ဝႃႈၼႆ။

မၼ်းၸဝ်ႈ သိုပ်ႇလၢတ်ႈဝႃႈ “ တီႈဢၼ်ၶဝ်မႃးယႃႉၼၼ်ႉ ၶဝ်ၵေႃႈဝႃႈ ၶဝ်ဢမ်ႇႁူႉ ဢမ်ႇပွင်ႇလီ။ တီႈဢၼ် ၶဝ်ပၼ် ႁဵတ်းၼၼ်ႉ ပဵၼ်ၵျွင်းႁေႃးတြႃးၵူၺ်း။ ၵမ်းၼႆႉ ႁဝ်းမႃးၶုတ်း ႁဝ်းသၢင်ႈ ၶဝ် သမ်ႉ ဢမ်ႇလႆႈႁူႉ ဢမ်ႇလႆႈႁၼ်ၸွမ်း မၼ်းပဵၼ်တီႈၶဝ် ဢၼ်ၶဝ်ဝႃႈၼၼ်ႉၵေႃႈ သမ်ႉၸႂ်ႈယူႇ။ ၵမ်းၼႆႉ တီႈတၢင်းၼိူဝ်ၶဝ် ၵေႃႈပွင်ႇလူင်းမႃးသေ ၶဝ်ၵေႃႈဝႃႈ ႁဝ်းတေလႆႈၸွႆႈၵၼ်ၼႆသေ တေႃႈလဵဝ် ၶဝ်မႃးထုၺ်လိၼ် မႃးႁဵတ်းပၼ်မူတ်းယဝ်ႉ။ ထၢတ်ႈၵေႃႈ ၶဝ်တေၵေႃႇပၼ် ႁႂ်ႈ ယဝ်ႉ” ဝႃႈၼႆ။

ၵူၼ်းမိူင်းပိုၼ်ႉတီႈ ၸႄႈဝဵင်းမိူင်းတူၼ် ၵေႃႉၼိုင်ႈလၢတ်ႈဝႃႈ “ ဢွင်ႈတီႈၼၼ်ႉ မၼ်းပဵၼ်ဢွင်ႈတီႈ ၶုမ်ၵုတ်းၸဝ်ႈၼ ရေးသူၼ်။ ၵွင်းမူး ဢၼ်ၶဝ်တေၵေႃႇသၢင်ႈၼၼ်ႉၵေႃႈ တေပဵၼ်တီႈၼႂ်းဝၢင်းၼၼ်ႉၵမ်းလဵဝ်ယၢၼ်ၶုမ် ၵုတ်းၸဝ်ႈ ၼရေးသူၼ် မွၵ်ႈ 10 ဝႃး၊ ၾၢႆၸၢၼ်းၶုမ်ၵုတ်း” ဝႃႈၼႆ။