သိုၵ်း RCSS/SSA ဢၼ်တူင်ႉၼိုင်ယူႇဝႆႉတၢင်းပွတ်းတွၼ်ႈ ဢိူင်ႇတွင်ၼဝ်ႈ ၸႄႈဝဵင်းလွႆလႅမ်ၼၼ်ႉ ၺႃးၵူၼ်းၸုမ်း ၼိုင်ႈ ဢဵၼ်ႁႅင်း 20 ၵေႃႉ ၶဝ်ႈၾၼ်းၵူၼ်းသိုၵ်း လႆႈမၢတ်ႇၸဵပ်းႁၢဝ်ႈႁႅင်း 2 ၵေႃႉ။ RCSS လႆႈ ၵႅတ်ႇၶႄတူဝ်တုမ်ႉတွပ်ႇ ၶိုၼ်းသေလႄႈ ၵူၼ်းၸုမ်းၼၼ်ႉ လႆႈလူႉတၢႆမၢတ်ႇၸဵပ်းၵႂႃႇ။

ဝၼ်းတီႈ 11/12/2018 ယၢမ်းဝၢႆးဝၼ်း မွၵ်ႈ 3 မူင်းၼၼ်ႉ သိုၵ်းၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/ SSA ဢဵၼ်ႁႅင်းသိုၵ်းမွၵ်ႈ 10 ၵေႃႉ ဢၼ်လုၵ်ႉတီႈပၢင်သဝ်းဝၢၼ်ႈမႆႉသေႃႉသေ ႁွတ်ႈၽႅဝ် တီႈဝၢၼ်ႈသၢႆးငိုၼ်း ဢိူင်ႇ တွင်ၼဝ်ႈ ၸႄႈ ဝဵင်းလွႆလႅမ်ၼၼ်ႉ မီးၵူၼ်းယိပ်းၽႃႉယိပ်းလႅဝ်း ၸုမ်းၼိုင်ႈ ၶဝ်ႈၾၼ်းလႄႈ လႆႈမၢတ်ႇၸဵပ်း 2 ၵေႃႉ ႁၢဝ်ႈႁႅင်း ဝႃႈၼႆ။

ၸဝ်ႈသိုၵ်း ၸၢႆးဢူး ၽူႈၶၢၼ်ပၢၵ်ႇ လုမ်းၵပ်းသၢၼ် RCSS/SSA တီႈတူၼ်ႈတီး လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈ ဢေႃႈ ၵူၼ်းသိုၵ်းႁဝ်း လႆႈမၢတ်ႇၸဵပ်း 2 ၵေႃႉ။ တၢင်ႈၾၢႆႇႁဝ်းၶႃႈသမ်ႉ ၵူၼ်းသိုၵ်းဢေႇဝႆႉ မီးမွၵ်ႈ 9 ၵေႃႉ။ ၵူၼ်းမိူင်း ပဵၼ်ၸၢဝ်းပဢူဝ်း ႁူဝ်ၵူၼ်းမွၵ်ႈ 20 ပၢႆ။ ၶဝ်မႃးၾၼ်းသေ ဢမ်ႇၵႃး သမ်ႉမႃးႁိမ် ဢဝ်ၵွင်ႈတီႈၵူၼ်းသိုၵ်းႁဝ်းထႅင်ႈ လႄႈ ၵူၼ်းသိုၵ်းႁဝ်းလႆႈၵႅတ်ႇၶႄတူဝ်ၶဝ်သေ လႆႈတုမ်ႉတွပ်ႇၶိုၼ်း။ ၶဝ်လႆႈလူႉတၢႆထင်တီႈ 4 ၵေႃႉ။ ဢၼ်လႆႈမၢတ်ႇ ၸဵပ်းၵေႃႈမီးယူႇ” ဝႃႈၼႆ။

ၵူၼ်းမိူင်းဢၼ်လႆႈမၢတ်ႇၸဵပ်းၼၼ်ႉတႄႉ လႆႈသူင်ႇယူတ်းယႃတူဝ်ဝႆႉတီႈႁူင်းယႃၸဝ်ႈၸၢမ်ႇထုၼ်း ၸႄႈ ဝဵင်းတူၼ်ႈ တီးလႄႈ လွႆလႅမ်ဝႆႉယဝ်ႉသေ ၶၢဝ်ႇဢၼ်လႆႈႁူႉလိုၼ်းသုတ်းၼႆႉတႄႉ တၢႆ 5 ၵေႃႉ မၢတ်ႇၸဵပ်း 3 ၵေႃႉ ဝႃႈၼႆ။

ၵူၼ်းသိုၵ်း RCSS 2 ၵေႃႉ ဢၼ်လႆႈမၢတ်ႇၸဵပ်းၼၼ်ႉတႄႉ တိူဝ်ႉၸွမ်းတီႈၵွၵ်းႁူဝ်၊ ၸွမ်းၶႃ၊ ၸွမ်းၶႅၼ် ၸဵမ်ၸိူဝ်းၼႆႉ။

ႁွင်ႈၵၢၼ်ပိုၼ်ၽၢဝ်ႇ RCSS/SSA ဝႅပ်ႊသၢႆႊ တႆးလွတ်ႈလႅဝ်း ဢွၵ်ႇဝႆႉဝႃႈ “ ၵူၼ်းမိူင်းဢၼ် ၶဝ်ႈၾၼ်း သိုၵ်းတႆး RCSS ၼၼ်ႉ ပဵၼ်ၸုမ်းၵူဝ်ႇယိၼ်ႇလေး(မုၼ်ၸဝ်ႈပဢူဝ်း)။ လိူဝ်ၼၼ်ႉ ယူႇတီႈလုမ်းပွင်ၵၢၼ်သိုၵ်း RCSS ၵေႃႈ လႆႈတႅမ်ႈ လိၵ်ႈသူင်ႇထိုင် တီႈၸုမ်းၵူဝ်ႇယိၼ်ႇလေး(မုၼ်ၸဝ်ႈပဢူဝ်း) ဝႆႉယဝ်ႉ” ဝႃႈၼႆ။

ၵဵဝ်ႇလူၺ်ႈလွင်ႈၼႆႉ ၶၢဝ်ႇမၢၼ်ႈလၢႆလၢႆႁွင်ႈၵၢၼ်တႄႉ ဢွၵ်ႇဝႆႉဝႃႈ “ ပဵၼ်ၸုမ်းပျီႇတူႉၸိတ်ႉမၢၵ်ႇၵႅင်းၼႆသေ ၸဝ်ႈသၢႆလႅင်း ၵႅမ်ႁူဝ်ပဝ်ႈ ၸုမ်းပျီႇတူႉၸိတ်ႉမၢၵ်ႇၵႅင်း တွပ်ႇလၢတ်ႈဝႆႉဝႃႈ ဢမ်ႇၸႂ်ႈၼမ်ႉမိုဝ်းပျီႇတူႉၸိတ်ႉမၢၵ်ႇၵႅင်း” ဝႃႈၼႆ။