ၵျွင်းႁေႃးတြႃးၸဝ်ႈသိလ်ထမ်းဝုၼ်းၸုမ်ႉလႄႈ ၵွင်းမူး/ ထၢတ်ႈ ဢၼ်တေၵေႃႇသၢင်ႈၶိုၼ်ႈမႃးသူႇမႂ်ႇ တီႈၼႂ်းဝၢင်းၶုမ် ၵုတ်း (သၢင်းၶႅင်း) ၸဝ်ႈၼရေးသူၼ် တီႈမိူင်းတူၼ်ၼၼ်ႉ ၺႃးၸုမ်းသိုၵ်းဝႃႉ USWA ၶဝ်ႈယႃႉထုပ်ႉလႅဝ်ပႅတ်ႈ ဢမ်ႇ ပၼ် ၶႂၢင်ႉႁဵတ်းသၢင်ႈ လႄႈ ႁုပ်ႈယိုတ်းဢဝ်ၶိုၼ်းပႅတ်ႈမူတ်း ဝႃႈၼႆ။

ဝၼ်းတီႈ 11/12/2018 ယၢမ်းဝၢႆးဝၼ်း 2 မူင်း သိုၵ်းဝႃႉ USWA ပွတ်းၸၢၼ်း 775 ဢၼ်ယၢင်ၵေႃႇၵျူင်း ဢွၼ်ႁူဝ် ၼၼ်ႉ ႁွင်ႉဢဝ် ၵူၼ်းသိုၵ်းဝႃႉ ဢဵၼ်ႁႅင်း 20 ၵေႃႉသေ ၶဝ်ႈယႃႉထုပ်ႉလႅဝ်ပႅတ်ႈ ၵျွင်းႁေႃးတြႃး ၸဝ်ႈသိလ်ထမ်းဝုၼ်း ၸုမ်ႉ၊ သႃလႃးလင်ၼိုင်ႈလႄႈ ၵွင်းမူး/ထၢတ်ႈ ဢၼ် တိုၵ်ႉတေၵေႃႇသၢင်ႈၶိုၼ်ႈမႃးမႂ်ႇ ၸိူဝ်းၼၼ်ႉ ၺႃးထုပ်ႉလႅဝ် ယႃႉၵွႆ လႄႈ ဢဝ်ရူတ်ႉထုၺ်လိၼ် ၵုၺ်ႉထူမ်ၶိုၼ်းတီႈထၢတ်ႈဢၼ် တေၵေႃႇၶိုၼ်ႈမႃးၼၼ်ႉ တီႈၼႂ်းဝၢင်းၶုမ်ၵုတ်း ၸဝ်ႈၼ ရေးသူၼ် ၼႂ်းဢိူင်ႇမိူင်းႁၢင် ၸႄႈဝဵင်းမိူင်းတူၼ် ၸႄႈတွၼ်ႈ မိူင်းသၢတ်ႇ ၸိုင်ႈတႆး ပွတ်းဢွၵ်ႇၶူင်း ဝႃႈၼႆ။

ၽူႈႁၢပ်ႇၵၢၼ်သႃသၼႃ ၸဝ်ႈၼိုင်ႈၵေႃႈထတ်းသၢင် တီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ ၶဝ်ဢမ်ႇထၢမ် ၽႂ်ႁဵတ်းၼၼ် သေ ဢဝ်ၵႃးမႄႈၶူဝ်းမႃးၶုတ်းယႃႉလႅဝ်ပႅတ်ႈ ၵျွင်းဢၼ်ႁဵတ်းဝႆႉပၼ်ၸဝ်ႈၶူးဝႃးဝုၼ်းၸုမ်ႉ ႁေႃးတြႃး ၼၼ်ႉ လင်ၼိုင်ႈ၊ သႃလႃးၼင်ႈဝၢႆႈၽြႃးဢၼ်ၼိုင်ႈလႄႈ ဢွင်ႈတီႈတေၵေႃႇထၢတ်ႈၵွင်းမူးၼၼ်ႉ တီႈၼိုင်ႈ ၶဝ် ဢဝ်ၵႃးမႄႈၶူဝ်းသေ မႃး ၶုတ်းလိၼ်ထုၺ်လိၼ်ထူမ်သႂ်ႇ ႁႂ်ႈမၼ်းပဵင်းၶိုၼ်းမိူၼ်ၵဝ်ႇ။ လွင်ႈၼႆႉ ၶဝ်ဢမ်ႇလီႁဵတ်း ဢၼ် ၸဝ်ႈၶူးဝႃးဝုၼ်းၸုမ်ႉ တေမႃးသၢင်ႈထၢတ်ႈၼႆႉ ဢမ်ႇၸႂ်ႈတႃႇတႆး၊ တႃႇမၢၼ်ႈ၊ တႃႇဝႃႉ မၼ်းပဵၼ်ၵွင်းမူးၽြႃး တႃႇသႃ သၼႃပုတ်ႉထ ၸဝ်ႈၵူၺ်း တွၼ်ႈတႃႇႁဝ်းၶႃႈ တေလႆႈလီလႆႈပဵၼ်ၵႂႃႇမိူဝ်း ၼႃႈၵူၺ်း ၶူးဝႃးပေႃႈတႄႉ ဝူၼ်ႉၸိူင်ႉ ၼႆၵူၺ်း” ဝႃႈၼႆ။

ဢၢႆႈယၢဝ်ႊ ၽူႈမီးၸၼ်ႉ ၼႂ်းၸုမ်းသိုၵ်းဝႃႉ မိူင်းတူၼ်လၢတ်ႈဝႃႈ – တၢင်းၼိူဝ်ၸီႉသင်ႇမႃးလႄႈ ႁဝ်းႁဵတ်းၵူၺ်း၊ တီႈလိၼ်ၼႆႉၵေႃႈ ပဵၼ်တီႈလိၼ်ဝႃႉ မႃးၸဵမ်လႂ်ယဝ်ႉ၊ ၵူၼ်းလူင် ႁႂ်ႈတူၺ်းလူၶိုၼ်း ၸိူင်ႉၼၼ်ၵူၺ်း – ဝႃႈၼႆ။

သိုပ်ႇလၢတ်ႈဝႃႈ ဢွင်ႈတီႈၼႆႈ မၼ်းပဵၼ်တီႈဝၢင်းၶုမ်ၵုတ်း သၢင်းၶႅင်း ၸဝ်ႈၼရေးသူၼ်၊ ပူၼ်ႉမႃး မွၵ်ႈပီသွင်ပီ ၸဝ်ႈပေႃႈသိလ်ထမ်းဝုၼ်းၸုမ်ႉ ယွၼ်းလူႇၶၢမ်ႇတီႈလိၼ်ၼႆႉ ၵမ်းၼႆႉ ယူႇတီႈၶိင်းယၢင်ၵေႃႇၵျူင်းၼႆႉၵမ်းလဵဝ်ယဝ်ႉ ၵေႃႉမႃးလူႇ တၢၼ်း၊ ယၢတ်ႇၼမ်ႉ။ ၵမ်းၼႆႉ ဢၼ်မႃးယႃႉၵေႃႈ ပဵၼ် မၼ်းၵူၺ်းၼင်ႇၵဝ်ႇ။ မိူဝ်ႈၼၼ်ႉ တီႈလိၼ်ၼႆႉ မၼ်းယုၵ်ႉ လူႇတၢၼ်းပၼ် 50 ဢေႊၶိူဝ်ႊ ယဝ်ႉၵေႃႈ ယၢတ်ႇၼမ်ႉ ၵမ်းလဵဝ် လွင်ႈၼႆႉ ၸဵမ်ၵူၼ်း၊ ၸဵမ်ၽီ ႁူႉႁၼ် ၸွမ်းၶႃႈယဝ်ႉ။ ၵမ်းၼႆႉ မႃးယိုတ်းၶိုၼ်း ၸွင်ႇထုၵ်ႇလီပဵၼ် ၼင်ႇလိၼ်ၼႆႉမၼ်းဢမ်ႇၸႂ်ႈတႃႇၽႂ် မၼ်းပဵၼ် ၼင်လိၼ် တႃႇသႃ သၼႃၵူၺ်း။ ၵူၺ်းၵႃႈ ၶုမ်ၵုတ်းၸဝ်ႈၼရေးသူၼ် ဢၼ်မီးဝႆႉႁိမ်းၼၼ်ႉတႄႉ ၶဝ်ဢမ်ႇယႃႉ” ဝႃႈၼႆ။

ဢွင်ႈတီႈ ၼႂ်းဝၢင်းၶုမ်ၵုတ်းၸဝ်ႈၼရေးသူၼ်ၼႆႉ ၸဝ်ႈသိလ်ထမ်းဝုၼ်းၸုမ်ႉ တေဢၢၼ်းၵေႃႇသၢင်ႈထၢတ်ႈႁိမ်းၶၢင်ႈ ၶုမ်ၵုတ်းၸဝ်ႈၼရေးသူၼ် သူႇၼိုင်ႈၶိုၼ်ႈမႃး တေႃႈလဵဝ် တၵ်ႉၵႃႇသတ်ႉထႃး ပေႃးႁၢင်ႈႁႅၼ်း သိုဝ်ႉဝႆႉလဵၵ်း၊ မႆႉလႄႈ မၢၵ်ႇႁိၼ်၊ မၢၵ်ႇသၢႆး ၸိူဝ်းၼႆႉဝႆႉယဝ်ႉ။

ၵူၼ်းမိူင်းတူၼ် ဢၼ်ဢမ်ႇၶႂ်ႈဢွၵ်ႇၸိုဝ်ႈ ၵေႃႉၼိုင်ႈၵေႃႈလၢတ်ႈဝႃႈ “ ထၢတ်ႈၼႆႉ ႁဝ်းၶႃႈ ပေႃးၶုတ်း ပူပိုၼ်ႉဝႆႉယဝ်ႉ လူဝ်ႇႁဵတ်းၵႂႃႇၵူၺ်း ၶဝ်သမ်ႉမႃးထုၺ်ထူမ်ပဵင်းၵႂႃႇပႅတ်ႈတင်းမူတ်း။ ၶူဝ်းၶွင် မႆႉၶႃး လဵၵ်းမုင်း ဢၼ်ၶဝ်ယႃႉလူင်း ပႅတ်ႈၸိူဝ်းၼၼ်ႉ ႁဝ်းၶႃႈ ဢမ်ႇပႆႇ ဢဝ်ၵႂႃႇဝႆႉတၢင်းလႂ် တိုၵ်ႉဢဝ်ဝႆႉယူႇတီႈၼင်ႈၵူၺ်း ဢၼ်ၸၢင်ႈ ဢဝ်မႃးၵေႃႈ ယုၵ်ႉဢဝ်မႃးၵမ်ႈၽွင်ႈၵႃႈၼၼ်ႉ ၵူၺ်း။ ယၢပ်ႇဝႆႉၶႃႈဢေႃႈ ပေႃးမီးသိုၵ်းၼမ်ၼႆႉ တေႃႈလဵဝ် သူၼ်ႁႆႈ ၼႃးၼႆႉ ၶႂ်ႈဝႃႈပဵၼ်ၶွင်ဝႃႉမူတ်းယဝ်ႉ။ တီႈလႂ်ၵေႃႈ ဝႃႈ ပဵၼ်လိၼ်ၶဝ် တီႈယူႇၶဝ်ၼႆယူႇတိၵ်းတိၵ်း” ဝႃႈၼႆ။

ဢွင်ႈတီႈ ဢၼ်ၵူၼ်းမိူင်းတူၼ် ၼႃးၵွင်းမူး ႁူမ်ႈၵၼ်ဢၢၼ်း ၵေႃႇထၢတ်ႈ(ႁဵတ်းၵွင်းမူး) ႁဵတ်းဝိႁၢရ်လူင်ၼႆႉ ပဵၼ်ၼႂ်းဝၢင်းသၢင်းၶႅင်း ၸဝ်ႈမုၼ်ယႂ်ႇၶုၼ်ႁေႃၶမ်းထႆး ၸဝ်ႈၼရေးသူၼ် ၊ တႄႇပူၼ်ႉမႃး 10 ပီပၢႆ ၸုမ်းသိုၵ်းဝႃႉ ၶဝ်ယိုတ်းဢဝ်သေ ႁဵတ်းသူၼ်ၶဝ်ႈၵၢပ်ႇ၊ ဝၢႆးမႃး ဢိင်ၼိူဝ်ၵူၼ်းမိူင်းတုၵ်းယွၼ်းသေ ၾၢႆႇၸုမ်းသိုၵ်းဝႃႉ ဝွင်ႇပၼ် တီလိၼ် ဢွင်ႇႁိမ်းႁွမ်းၼၼ်ႉလွၵ်းၼိုင်ႈ သေ လႆႈလတ်းသူၼ်ၶဝ်ႈၵၢပ်ႇသေ ၶဝ်ႈၵႂႃႇၸူးၸင်ႇလႆႈ။ ပူၼ်ႉမႃး မွၵ်ႈသွင် ပီ ၽူႈၼမ်းၸုမ်းသိုၵ်းဝႃႉ ပွတ်းၸၢၼ်း ယွင်ႈတၢၼ်းယၢတ်ႇၼမ်ႉပၼ်ယဝ်ႉလီငၢမ်းသေတႃႉ ၶိုၼ်းၽိုတ်ႉႁိမ်ဢဝ်ၶိုၼ်း။