ၵေႃၵမ်ၵၢၼ် ပွင်ပဵၼ်ပၢင်ပွႆး ၸႄႈဝဵင်းၵဵင်းတုင် ၸတ်းႁဵတ်းပၢင်ဢုပ်ႇၶႆႈ ၼႂ်းလိူၼ်ၸဵင်ႇမႂ်ႇ 1 ၶမ်ႈ လၢႆလၢႆၸဝ်ႈမႃး ဢုပ်ႇၶႆႈ ၵဵဝ်ႇလူၺ်ႈ ၾိင်ႈထုင်းပိုၼ်းၶိူဝ်းတႆး မိူင်းတႆး ဝႃႈၼႆ။

ဝၼ်းတီႈ 08/12/2018 ယၢမ်းဝၢႆးဝၼ်း 1 မူင်း ထိုင် 6 မူင်းႁူဝ်ၶမ်ႈ ၵေႃၵမ်ၵၢၼ် ပွင်ပဵၼ်ပၢင်ပွႆးပီမႂ်ႇတႆး ဢွၼ်ႁူဝ်သေ ၸတ်းႁဵတ်းပၢင်ဢုပ်ႇၶႆႈ လွင်ႈၾိင်ႈထုင်းပိုၼ်းၶိူဝ်းတႆး မိူင်းတႆး တီႈဝတ်ႉဝိႁၢရ်မွၵ်ႇမႆႇ(ၵွင်းမူးၶမ်း) ၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း မီးၽူႈလဵပ်ႈႁဵၼ်းထွမ်ႇငိၼ်းၶဝ်ႈႁူမ်ႈတင်းၼမ်လၢႆ။

ၼၢင်းၼူၼ်းမူဝ် (တူၼ်ႈတီး) ၶဝ်ႈႁူမ်ႈ ဢုပ်ႇၶႆႈ တီႈၵဵင်းတုင်ၼၼ်ႉ လၢတ်ႈတီႈၽူႈတွႆႇ ႁွၵ်ႈ ဝႃႈ “ ယူႇတီႈၶႃႈႁဝ်းလႆႈ မႃးဢုပ်ႇၶႆႈတႄႉ ပဵၼ်ႁူဝ်ၶေႃႈဢၼ်ဝႃႈ ႁၵ်ႉသႃသိင်ႇဝႅတ်ႉလွမ်ႉၼႆၶႃႈ။ ယိူင်းဢၢၼ်းဢၼ် မႃးဢုပ်ႇၶႆႈၼႆႉ ၶႂ်ႈႁႂ်ႈပီႈ ၼွင်ႉၵူၼ်းမိူင်းႁဝ်းၵူႈၵေႃႉ ႁႂ်ႈမေႃသိမ်းပႅင်းႁၵ်ႉသႃ၊ ႁႂ်ႈမေႃၵႅတ်ႇၶႄသိင်ႇဝႅတ်ႉလွမ်ႉႁဝ်း။ ပေႃး ႁဝ်းဝႃႈ လွင်ႈသိင်ႇ ဝႅတ်ႉလွမ်ႉၼႆ မၼ်းၵေႃႈတေၵဵဝ်ႇၵပ်းၸွမ်းလွင်ႈႁဝ်းပႅတ်ႈ ႁဝ်းၵဵပ်းယုၵ်းယၵ်း ယဝ်ႉၵေႃႈ တေၵဵဝ်ႇ လူၺ်ႈလွင်ႈပႃႇမႆႉ ပႃႇထိူၼ်ႇႁဝ်း လႄႈ ၵဵဝ်ႇလူၺ်ႈပႃးမႄႈၼမ်ႉဢၼ်ပဵၼ်သၢႆၸႂ်ၼႂ်းဝၢၼ်ႈႁဝ်း ၼႂ်းဝဵင်းႁဝ်း ၼႂ်းမိူင်း ႁဝ်း ၸဵမ်ၸိူဝ်းၼႆႉ မၼ်းတေပဵၼ်ဝႆႉ 3 တွၼ်ႈ” ဝႃႈၼႆ။

ပၢင်ဢုပ်ႇၶႆႈ ၾိင်ႈထုင်းပိုၼ်းၶိူဝ်းတႆး မိူင်းတႆး တီႈၵဵင်းတုင်ၼႆႉ မီးၽူႈလူင်ႉလႅၼ်ႇ လၢႆလၢႆၵေႃႉ မႃးဢုပ်ႇၶႆႈၼႄ မိူၼ် ၼင်ႇ ၻွၵ်ႊတိူဝ်ႊ ၸၢႆးၼေႃႇၶိူဝ်း(ဝဵင်းလိူဝ်ႇ)၊ ၻွၵ်ႊတိူဝ်ႊ ၸၢႆးယွတ်ႈႁွင် (ၵဵင်းတုင်)၊ ၼၢင်းၼူၼ်းမူဝ် (တူၼ်ႈတီး)၊ ၻွၵ်ႊတိူဝ်ႊ သႅင်တိပ်ႉ (ၵဵင်းတုင်) လႄႈ ၶူးသႅင်ၶမ်း (ၵဵင်းတုင်) ၸဵမ်ၸိူဝ်းၼႆႉ။

ပၢင်ပွႆးႁူမ်ၸူမ်းႁပ်ႉတွၼ်ႈပီမႂ်ႇတႆး ၵမ်းထူၼ်ႈ 23 ပီ ပီတႆး 2113 ၼီႈ တီႈဝဵင်းၵဵင်းတုင်ၼႆႉ တႄႇၸတ်းႁဵတ်း ၼႂ်း ဝၼ်းတီႈ 3-8/12/2018 ဢွင်ႈတီႈၸတ်းႁဵတ်းသမ်ႉ ပဵၼ်တီႈၶူင်ႇၵႂၢႆးၸူၼ်း ဝႃႈၼႆ။