ၼၢင်းယိင်း ၵဝ်ႊရီႊ(Korea) ဢၼ်မႃးဢႅဝ်ႇယဵမ်ႈ တီႈသီႇပေႃႉၼၼ်ႉ လႆႈၸူမ်ၼမ်ႉၵႂႃႇသေ ထိုင်မႃး ႁိမ်း 20 ဝၼ်းယဝ်ႉ ယင်း ပႆႇထူပ်းႁၼ်တူဝ်တၢႆ တူဝ်လိပ်းသင် ဝႃႈၼႆ။
ၼၢင်းယိင်း ၵဝ်ႊရီႊ ၸိုဝ်ႈႁွင်ႉ Miss Houng Young Heo ဢႃယု 45 ပီၼၼ်ႉ လူင်းလဵၼ်ႈၼမ်ႉ ၼႂ်းၼမ်ႉတူႈသေ ၸူမ် ႁၢႆၵႂႃႇ မိူဝ်ႈဝၼ်းတီႈ 23/11/2018။ တေႃႇထိုင် ဝၼ်းတီႈ 10/12/2018 ၼႆႉ မီးၶၢဝ်းတၢင်း 18 ဝၼ်းယဝ်ႉ ၸဝ်ႈၼႃႈတီႈ ၸွမ်းႁႃၵူႈဝၼ်း ယင်းပႆႇႁၼ်တူဝ် ဝႃႈၼႆ။
လုင်းၸၢႆးၶမ်းဢွင်ႇ ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 2 ၸႄႈဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ တေႃႇထိုင်တေႃႈလဵဝ် ပႆႇႁၼ်တူဝ်မၼ်းၼၢင်း။ ယူႇတီႈၾၢႆႇၸဝ်ႈၼႃႈတီႈၵူႈပႃႈၵူႈၾၢႆႇၵေႃႈ တိုၵ်ႉဢွၼ်ၵၼ်ၶတ်း ၸႂ်ႁႃယူႇ။ တီႈဢၼ် မၼ်းၼၢင်းတူၵ်းၼၼ်ႉ သမ်ႉပဵၼ်တီႈၼမ်ႉၸႅဝ်ႈဝႆႉၶႃႈၼေႈ” ဝႃႈၼႆ။
ၵဵဝ်ႇလူၺ်ႈလွင်ႈၼႆႉ ယူႇတီႈလုမ်းၽွင်းတၢင် ၵဝ်ႊရီႊ သူင်ႇၵူၼ်းၵတ်ႉၶႅၼ်ႇ ၾၢႆႇလမ် ၼမ်ႉ လုၺ်းၼမ်ႉ ဢၼ်ယူႇ တၢင်းၸႄႈမိူင်းရၶႅင်ႇပုၼ်ႉ မႃးလမ်ႁႃၸွႆႈၵၼ်ယူႇ။ လိူဝ်ၼၼ်ႉ ပၢႆပိုၼ်ၽၢဝ်ႇ ဝႃႈ သင်ၽႂ်ထူပ်းႁၼ် ၼၢင်း Houng Young Heo ၸိုင် တေတွၼ်ႈပၼ် ငိုၼ်းသူး 5,000 ၻေႃႊလိူဝ်ႊ ဝႃႈၼႆလူးၵွၼ်ႇ။
ၼၢင်းယိင်း ၵဝ်ႊရီႊ ဢၼ်ၸူမ်ႁၢႆ ၼႂ်းၼမ်ႉတူႈၼႆႉ မၼ်းၼၢင်းပဵၼ်ဢိၼ်ႊၵျိၼ်ႊၼီႊယိူဝ်ႊ ႁွင်ႈၵၢၼ်ၾၢႆႇ မႄးၶိူင်ႈ ဝိၼ် ဝႃႈၼႆ။
မိူဝ်ႈဝၼ်းတီႈ 23/11/2018 ၼၼ်ႉ ၼၢင်း Miss Houng Young Heo တင်း ၵူၼ်းၼွၵ်ႈမိူင်း 5 ၵေႃႉ လူင်းလဵၼ်ႈ ၼမ်ႉ တူႈ ၸွမ်းၵၼ်သေ မၼ်းၼၢင်းလႆႈလႆလွင်ႈၸွမ်းၼမ်ႉတူႈၵႂႃႇ တေႃႇထိုင်ယၢမ်းလဵဝ် ပႆႇႁၼ်တူဝ် တၢႆႁိုဝ် လိပ်းႁိုဝ် မီးတီႈလႂ် ယင်းပႆႇႁူႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ