တပ်ႉသိုၵ်းလူင်ပွင်ၸိုင်ႈမၢၼ်ႈ ၶိုၼ်ႈလေႃႇယိုဝ်း ၸုမ်းယိပ်းၵွင်ႈၵၢင်ႇၸၢဝ်းၶိူဝ်း တီႈၼႂ်းဢိူင်ႇၼႃးမၢၵ်ႇၶေႃ ၸႄႈ ဝဵင်းသီႇပေႃႉ ၵူၼ်းဝၢၼ်ႈ လႆႈဢွၼ်ၵၼ်ပၢႆႈယၢၼ်ႁိူၼ်းယေး 337 ၵေႃႉ။

မိူဝ်ႈၼႆႉ ဝၼ်းတီႈ 10/12/2018 ယၢမ်းၵၢင်ၼႂ် မွၵ်ႈ 8:45 မူင်း သိုၵ်းလူင်ပွင်ၸိုင်ႈမၢၼ်ႈ လုၵ်ႉတၢင်းဝၢၼ်ႈႁူဝ်ၼႃးသေ ၶိုၼ်ႈလေႃႇယိုဝ်းၸုမ်းယိပ်းၵွင်ႈၵၢင်ႇ ၸၢဝ်းၶိူဝ်းၸုမ်းၼိုင်ႈ တီႈတၢင်းၾၢႆႇဢွၵ်ႇဝၢၼ်ႈႁူဝ်ၼႃး ယၢၼ်ၵႆဝၢၼ်ႈမွၵ်ႈ 2 လၵ်း ၼႂ်းဢိူင်ႇၼႃးမၢၵ်ႇၶေႃ ၸႄႈဝဵင်းသီႇပေႃႉ ၸိုင်ႈတႆး ပွတ်းႁွင်ႇ။

ၵူၼ်းဝၢၼ်ႈႁူဝ်ၼႃး ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းတေႃႇႁဝ်းယိုဝ်းၵၼ်တႄႉ ဢမ်ႇၸႂ်ႈ ပဵၼ်သိုၵ်းမၢၼ်ႈ တင်းၸုမ်းလႂ်တႄႉ ဢမ်ႇႁူႉလီၶႃႈ။ ဢၼ်လႆႈငိၼ်းမႃးတႄႉ ၶူဝ်းၶဵဝ်(SSPP) ဝႃႈ ပဵၼ်သိုၵ်းမၢၼ်ႈ တင်း ၶူဝ်းလၢႆး (RCSS) ဝႃႇ။ ၶူဝ်းလၢႆးသမ်ႉ ဝႃႈ ပဵၼ်သိုၵ်းမၢၼ်ႈ တင်း ၶူဝ်းၶဵဝ် ၼႆဝႃႇ လွင်ႈၶဝ်ပတ်ႉၵၼ်ၼၼ်ႉတႄႉ ဢမ်ႇလႆႈႁူႉ ၸွမ်းလီလီၶႃႈ ၽႂ်ပတ်ႉၽႂ် ဢၼ် ဝႃႈၼၼ်ႉ။ တေႃႈလဵဝ် ၵူၼ်းပၢႆႈၽေးသိုၵ်းႁဝ်းၶႃႈတႄႉ ႁွတ်ႈၽႅဝ်ဝႆႉတီႈ ဝၢၼ်ႈၼႃး မၢၵ်ႇၶေႃ မီးၵႂႃႇ 300 ပၢႆယဝ်ႉ။ ဢၼ် တိုၵ်ႉမႃး ပႆႇထိုင်ၵေႃႈ တိုၵ်ႉမီးယူႇ” ဝႃႈၼႆ။

ၵဵဝ်ႇလူၺ်ႈလွင်ႈၼႆႉ တပ်ႉသိုၵ်းလူင်ပွင်ၸိုင်ႈမၢၼ်ႈၼႆႉ ၸႅၵ်ႇပဵၼ် 3 ငႃးသေ ၶဝ်ႈတူင်ႉၼိုင်ၼႂ်းဢိူင်ႇၼႃးမၢၵ်ႇၶေႃမႃး မီးၶၢဝ်းတၢင်းႁိုင်ယဝ်ႉ ဝႃႈၼႆ။

ၵူၼ်းဝၢၼ်ႈႁူဝ်ၼႃး သိုပ်ႇလၢတ်ႈဝႃႈ “ သိုၵ်းမၢၼ်ႈၼႆႉ လႆႈႁူႉဝႃႈၶဝ်လုၵ်ႉတၢင်းမိူင်းယႆမႃး ၶဝ်မႃးပၼ်ႇလဵပ်ႈၸွမ်း ၼႂ်းဢိူင်ႇ ၼႃးမၢၵ်ႇၶေႃၼႆႉ ႁိုင်ၼႃႇယဝ်ႉ၊ သိုၵ်းၶဝ် တေယူႇဝႆႉ တီႈဝၢၼ်ႈႁူဝ်ၼႃးၵေႃႈမီး၊ တီႈဝၢၼ်ႈတႃႈလူင်ၵေႃႈမီး၊ တီႈဝၢၼ်ႈ ႁူမ်ႈၵေႃႈမီး ႁဵတ်းၼႆဝႆႉၶႃႈ။ ဢၼ်ပဵၼ်ပၢင်တိုၵ်းၵၼ်ၼႆႉတႄႉ သိုၵ်းမၢၼ်ႈဢၼ်ယူႇတီႈဝၢၼ်ႈႁူဝ်ၼႃး ၽိူမ်ႉႁႅင်းသိုၵ်း ၶိုၼ်ႈ ယိုဝ်းၶဝ်ဝႃႈ မီးၸုမ်းယိပ်းၵွင်ႈၵၢင်ႇၸုမ်းၼိုင်ႈပႂ်ႉယိုဝ်းၶဝ်ၼႆဝႃႇ လွင်ႈၼႆႉ ႁဝ်းၶႃႈၵေႃႈ ဢမ်ႇယိုၼ်ယၼ်လႆႈ” ဝႃႈၼႆ။

ယူႇတီႈသိုၵ်းလူင်ပွင်ၸိုင်ႈ ဢၼ်ၶိုၼ်ႈယိုဝ်း ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း တီႈၼႂ်းဢိူင်ႇၼႃးမၢၵ်ႇၶေႃၼၼ်ႉ ၶဝ်တဵၵ်း ၶၢၼ်းႁွင်ႉဢဝ်ထူဝ်ႈလႃႈၵျီႈ ၵူၼ်းဝၢၼ်ႈႁူဝ်ၼႃး 3 လမ်းသေ တေႃႉသူင်ႇႁႅင်းသိုၵ်းၶဝ် မုင်ႈၸူး တၢင်းၾၢႆႇဢွၵ်ႇဝၢၼ်ႈ ႁူဝ်ၼႃး ဝႃႈၼႆ။

“ထူဝ်ႈၺႃးယိုဝ်းလမ်းၼိုင်ႈၼႆဝႃႇ။ တေႃႈလဵဝ် ၵူၼ်းႁေႃႈထူဝ်ႈ ႁၢႆဝႆႉ မၢတ်ႇႁိုဝ် တၢႆႁိုဝ် ပႆႇႁူႉ။ လိူဝ်ၼၼ်ႉ လႆႈႁူႉ သိုၵ်းမၢၼ်ႈ မၢတ်ႇၸဵပ်း 2 ၵေႃႉၼႆဢေႃႈ ႁဝ်းၶႃႈ လႆႈငိၼ်းႁဵတ်းၼၼ်ၵူၺ်း” ဝႃႈၼႆ။

ႁွင်ႈၵၢၼ်ၶၢဝ်ႇၶွင် RCSS/SSA တႆးလွတ်ႈလႅဝ်ႈ ဢွၵ်ႇၶၢဝ်ႇဝႆႉဝႃႈ “ ပဵၼ်သိုၵ်းမၢၼ်ႈလႄႈ SSPP/SSA ယိုဝ်းၵၼ်” ဝႃႈၼႆ။

ၵူၺ်းၵႃႈ တိတ်းတေႃႇၵပ်းသိုပ်ႇတၢင်း SSPP/SSA ဢမ်ႇလႆႈ ယူႇတီႈၸုမ်းၽူႈတွႆႇႁွၵ်ႈတႄႉ ဢမ်ႇၸၢင်ႈယိုၼ်ယၼ်။

တင်ႈဢဝ်မိူဝ်ႈႁၢင်လိူၼ်ၼူဝ်ႊဝႅမ်ႊၿိူဝ်ႊ မႃးသိုၵ်းတႆး သွင်ၸုမ်း ပိုတ်းယိုဝ်းၵၼ် ၶဵင်ႈၶႅင်ၵၢၼ်သိုၵ်းၵၼ် ၼႂ်းဢိူင်ႇ ၼႃးမၢၵ်ႇၶေႃလႄႈ ၵူၼ်းမိူင်းပၢႆႈၽေးသိုၵ်း ႁွတ်ႈၽႅဝ် ၵျွင်းမုၼ်ၸဝ်ႈ 800 ပၢႆ တိုၵ်ႉလႆႈပွၵ်ႈၶိုၼ်းႁိူၼ်းယေး ၽႂ်မၼ်း မိူဝ်ႈဝႃးၵူၺ်း။