ပၢင်ပွႆးႁူမ်ၸူမ်းႁပ်ႉတွၼ်ႈ ပီမႂ်ႇတႆး 2113 ၼီႈ တီႈငဝ်ႈၸိုင်ႈလွႆတႆးလႅင်း ၸတ်းပႃးပၢင်မွပ်ႈယိုၼ်ႈသူးရၢင်းဝလ်းလႄႈ ဝႂ်ယုၵ်ႉယွင်ႈ ၽူႈၵတ်ႉၶႅၼ်ႇ ၸဝ်ႈပၢႆးမွၼ်းတႆး 7 ၵေႃႉ ပၢင်ယိုၼ်ႈသူး ပၼ်ၽူႈႁွင့်ၵႂၢမ်း၊ ၸဝ်ႈပၢႆးမွၼ်းၵမ်း ၼႆ့ ၸတ်းပဵၼ်ပွၵ်ႈၵမ်း 3 – ဝႃႈၼႆ။
ဝၼ်းတီႈ 08/12/2018 ပၢင်ပွႆးပီမႂ်ႇတႆး 2113 ၼီႈ တီႈငဝ်ႈၸိုင်ႈလွႆတႆးလႅင်း ၸွမ်သိုၵ်းလူင် ယွတ်ႈသိုၵ်း ႁူဝ်ပဝ်ႈ ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA မွပ်ႈယိုၼ်ႈသူးရၢင်းဝလ်းလႄႈ ဝႂ်ယုၵ်ႉယွင်ႈၽူႈၵတ်ႉၶႅၼ်ႇ မိူၼ်ၼင်ႇ ၼၢင်းၶမ်းၶိၼ်ႇ၊ ၼၢင်းမူဝ်မူဝ်ၶမ်းဢေး၊ ၼၢင်းသႃႇရႃႇ၊ ၼၢင်းသႅင်လိုၼ်းၶမ်း၊ ၼၢင်းၼူၼ်းသီလၢဝ်၊ ၸၢႆးသႅၼ်ႁၵ့်၊ ၸၢႆးႁၢၼ်ၾႃ့ ၸိူဝ်းၼႆ့။
“ ၼႂ်းပၢင်ပွႆးပီမႂ်ႇတႆး 2113 ၼီႈပီၼႆႉ ယူႇတီႈၸွမ်သိုၵ်းလူင် ယွတ်ႈသိုၵ်းသေ မွပ်ႈယိုၼ်ႈပၼ် ၽူႈၵတ်ႉ ၶႅၼ်ႇပၢႆးမွၼ်းတႆး ၽူႈဢၼ်ႁွင့်ၵႂၢမ်းမႃးပီယၢဝ်းၶၢဝ်းႁိုင်လႄႈ ၽူႈႁွင့်ၵႂၢမ်းပၢၼ်မႂ်ႇၸိူဝ်းၼႆ့ ပီၼႆ့ဢၢၼ်း မွပ်ႈတႃႇ 10 ၵေႃ့ ၵူၺ်းၵႃႈမၢင်ၵေႃ့မီးၼႃႈၵၢၼ်ဝႆ့တၢင်ႇတီႈလႄႈ လႆႈမွပ်ႈၵႂႃႇတႃႇ 7 ၵေႃ့ ။ ဢၼ်လႆႈ မွပ်ႈယိုၼ်ႈပၼ်တႄ့ပဵၼ် ၶႅပ်းၶမ်း (ၼမ်ႉၼၵ်း 1 ၵျၢပ်ႈ) တႃႇပဵၼ်တီႈမၢႆတွင်းလႄႈ ၽိုၼ်ဝႂ်ယုၵ်ႉယွင်ႈ ၸဵမ်ၸိူဝ်းၼႆႉ” ၽူႈမီးၸၼ်ႉငဝ်ႈၸိုင်ႈလွႆတႆးလႅင်း ၸဝ်ႈၼိုင်ႈလၢတ်ႈ။
ၸဝ်ႈပၢႆးမွၼ်း 3 ၵေႃ့ဢၼ်ဢမ်ႇၸၢင်ႈမႃးႁပ့်သူးၼၼ့်တႄ့ပဵၼ်ၸၢႆးသၢႆမၢဝ်း၊ ၸၢႆးႁၢၼ်လႅင်းလႄႈ ၸၢႆးသႅင်ၸွမ်ၾႃ့ – ဝႃႈၼႆ။
ၼၢင်းမူဝ်မူဝ်ၶမ်းဢေး လၢတ်ႈၼႄတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ဢၼ်လႆႈႁပ့်သူးရၢင်းဝလ်းၼႆ့ၵေႃႈ ပဵၼ်ဢၼ် ၸူမ်းသိူဝ်းတႄ့တႄ့ၶႃႈဢေႃႈ မိူဝ်းၼႃႈမႃးၵဵဝ်ႇလူၺ်ႈလွင်ႈပၢႆးမွၼ်းတႆးၼႆ့ ၼင်ႇဢၼ် ပွင်ပဵၼ်လႆႈၼၼ့် တေသိုပ်ႇ ၶတ်းၸႂ်ၵႂႃႇယူႇၶႃႈ ” ဝႃႈၼႆ။
မိူဝ်ႈဝၼ်းတီႈ 18-19/11/2017 ပၢင်ပွႆးပီမႂ်ႇတႆး 2113 ၼီႈ ၼၼ့်ၵေႃႈ ၸွမ်သိုၵ်းလူင် ယွတ်ႈသိုၵ်း ႁူဝ်ပဝ်ႈ ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA မွပ်ႈယိုၼ်ႈသူးရၢင်းဝလ်းလႄႈ ဝႂ်ယုၵ်ႉယွင်ႈ ၽူႈၵတ်ႉ ၶႅၼ်ႇ ပၢႆးမွၼ်းတႆး ပၢၼ်ၵဝ်ႇလႄႈ ပၢၼ်မႂ်ႇ။ ဢၼ်ထုၵ်ႇယုၵ်ႉယွင်ႈၼၼ်ႉ မေႃႁွင်ႉၵႂၢမ်း/ ၽူႈတႅမ်ႈၵႂၢမ်း ပၢၼ်မႂ်ႇ ၸၢႆးလၢဝ်သႂ်၊ မေႃႁွင်ႉၵႂၢမ်း ၼၢင်းၼၢင်း၊ ၸၢႆးသႅၼ်ၾႃႉ၊ ၼၢင်းႁွမ်ၼုတ်း၊ မေႃႁွင်ႉၵႂၢမ်းပၢၼ်ၵဝ်ႇ ၸၢႆးၶိူဝ်းသုင်၊ ၼၢင်းၸၢမ် ၶမ်းလႄႈ ၼၢင်းႁိူၼ်းၶမ်း ၸဵမ် ၸိူဝ်းၼႆႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ