ဝဵင်းလႃႈသဵဝ်ႈ တႄႇၸတ်းႁဵတ်းပၢင်ပွႆးႁူမ်ၸူမ်းႁပ်ႉတွၼ်ႈ ပီမႂ်ႇတႆး 2113 ၼီႈ ၸတ်းပၢင်တၢၼ်ႈၶႆႈ

သင်ၶၸဝ်ႈ၊ ၽူႈပွင်ၵၢၼ်ပၢင်ပွႆး လႄႈ ၵူၼ်းမိူင်း တီႈၸမ်/ ၵႆ ႁူမ်ႈၵၼ်ပိုတ်ႇပၢင်ပွႆး ႁူမ်ၸူမ်ႁပ်ႉတွၼ်ႈပီမႂ်ႇတႆး 2113 ၼီႈ တီႈႁူင်းႁေႃၵေႃလိၵ်ႈလၢႆး ၸႄႈဝဵင်းလႃႈသဵဝ်ႈ ဝၼ်းႁႅၵ်ႈ တႄႇလူၺ်ႈပၢင်ဢုပ်ႇလၢတ်ႈတၢၼ်ႈၶႆႈ။

Photo by – SHAN/ ပိုတ်ႇပၢင်ပွႆး ႁူမ်ၸူမ်းႁပ်ႉတွၼ်ႈပီမႂ်ႇတႆး 2113 တီႈ တီႈႁူင်းႁေႃၵေႃလိၵ်ႈလၢႆး လႃႈသဵဝ်ႈ

မိူဝ်ႈၼႆႉ ဝၼ်းတီႈ 06/12/2018 ယၢမ်းၵၢင်ၼႂ် 8:30 မူင်း ၵေႃလိၵ်ႈလၢႆးလႄႈ ၾိင်ႈငႄႈတႆး ငဝ်ႈငုၼ်း တင်း လႃႈသဵဝ်ႈ ဢွၼ်ႁူဝ်ၼမ်းၼႃႈသေ ပိုတ်ႇပၢင်ပွႆးႁူမ်ၸူမ်းႁပ်ႉတွၼ်ႈ ပီမႂ်ႇတႆး တီႈႁူင်းႁေႃ ၵေႃလိၵ်ႈလၢႆး ငဝ်ႈငုၼ်းၸႄႈဝဵင်း လႃႈသဵဝ်ႈ ၸိုင်ႈတႆး ပွတ်းႁွင်ႇ ဝႃႈၼႆ။

ၸၢႆးၵျေႃႇထေး ႁူဝ်ပဝ်ႈၵေႃလိၵ်ႈလၢႆးလႄႈ ၾိင်ႈငႄႈတႆး ၸႄႈဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၼႆႉ ၵၢင် ၼႂ် ႁဝ်းၶႃႈ ပိုတ်ႇပၢင်ပွႆး တီႈႁူင်းႁေႃၵေႃလိၵ်ႈလၢႆး။ ပၢင်ပွႆးႁူမ်ၸူမ်းႁပ်ႉတွၼ်ႈပီမႂ်ႇတႆး 2113 ၼီႈ တီႈလႃႈသဵဝ်ႈ ႁဝ်း ၶႃႈၼႆႉ ၸတ်းႁဵတ်းဝႆႉ 3 တီႈ။ တီႈပၢင်သူၼ်မွၵ်ႇၵွၼ်(ၶျႄႇရီႊမႅင်ႇ) တီႈၼိုင်ႈ၊ တီႈႁူင်းႁေႃ ၵေႃလိၵ်ႈလၢႆးတီႈၼိုင်ႈလႄႈ တီႈ ပၢင်လဵၼ်ႈမၢၵ်ႇၼင် ႁူင်းႁေႃလူင် လႃႈသဵဝ်ႈတီႈၼိုင်ႈ။ မိူဝ်ႈၼႆႉ ယၢမ်းႁူဝ်ၶမ်ႈ ႁဝ်းၶႃႈ တေဢွၼ်ၵၼ်ၵႂႃႇပိုတ်ႇ ပၢင်ပွႆးတီႈ ဝၢင်းၵၢင်ပၢင်ႇသူၼ်မွၵ်ႇၵွၼ်” ဝႃႈၼႆ။

မိူဝ်ႈၼႆႉ ယၢမ်းၵၢင်ၼႂ် ပိုတ်ႇပၢင်ပွႆးတီႈႁူင်းႁေႃၵေႃလိၵ်ႈလၢႆးယဝ်ႉ ယုၵ်ႉယွင်ႈၽူႈလူင်ႉလႅၼ်ႇ ပိုၼ်း၊ ပၢႆးမွၼ်း၊ လိၵ်ႈ လၢႆး သၢမ်ၸဝ်ႈ မိူၼ်ၼင်ႇ – သြႃႇၸၢႆးဢွင်ႇထုၼ်း၊ ၸၢႆးၶမ်းလဵၵ်းလႄႈ လုင်းၸၢႆးၾႃႉ ၸိူဝ်းၼႆႉ။ တွၼ်ႈဝၢႆးဝၼ်းသမ်ႉ ၸတ်းႁဵတ်းပၢင်ဢုပ်ႇၶႆႈ ၵဵဝ်ႇလူၺ်ႈ ပၢင်ဢုပ်ႇၶႆႈလိၵ်ႈလၢႆးပၢႆးႁၼ် ၽူႈလူင်ႉလႅၼ်ႇ ဢၼ်မႃးဢုပ်ႇၶႆႈၼႄသမ်ႉ ၶူးမေႃ ယႃလူင်ၸၢႆး ၶမ်းလဵၵ်း၊ ၶူးၶိူဝ်းသႅၼ်၊ ၸရေးၵေႃႇမိူင်းလႄႈ ၸၢႆးသႅင်မိူင်း (ၶမ်းၵူႇ) ၸိူဝ်းၼႆႉ ဝႃႈၼႆ။

Photo by – SHAN/ ပၢင်ယွင်ႈယေႃး ၽူႈလူင်ႉလႅၼ်ႇ လိၵ်ႈလၢႆး၊ ပိုၼ်း၊ ပၢႆးမွၼ်း တီႈႁူင်းႁေႃ ၵေႃလိၵ်ႈလၢႆး လႃႈသဵဝ်ႈ

ပေႃးထိုင်မႃး ယၢမ်းဝၢႆးဝၼ်း 3 မူင်းၸိုင် ယူႇတီႈၵေႃလိၵ်ႈလၢႆးလႄႈ ၾိင်ႈငႄႈတႆး လႃႈသဵဝ်ႈ တေဢဝ်တုင်းၸိူဝ်ႉ ၸၢတ်ႈယုၵ်ႉၶိုၼ်ႈပူၵ်းတၢင်ႇ ပိုတ်ႇပၢင်ပွႆး 2113 ၼီႈ တီႈၵၢင်ပၢင်ႇသူၼ်မွၵ်ႇၵွၼ် လႃႈသဵဝ်ႈ ဝႃႈၼႆ။

ပၢင်ပွႆးႁူမ်ၸူမ်းႁပ်ႉတွၼ်ႈပီမႂ်ႇတႆး 2113 ၼီႈ ၶိုၵ်ႉယႂ်ႇလူင် တီႈလႃႈသဵဝ်ႈၼႆႉ တႄႇၸတ်းႁဵတ်း ၼႂ်းဝၼ်းတီႈ 06-09/ 12/2018 ဝႃႈၼႆ။

ပၢင်ပွႆးႁူမ်ၸူမ်းႁပ်ႉတွၼ်ႈ ပီမႂ်ႇတႆး ဢၼ်ႁူမ်ႈၵၼ်ၸတ်းႁဵတ်း ၶိုၵ်ႉယႂ်ႇလူင်ၼႆႉ ပွၵ်ႈၵမ်းႁႅၵ်ႈ ၸတ်းႁဵတ်းတီႈ ၸႄႈ ဝဵင်းၵဵင်းတုင် မိူဝ်ႈပီ 2012 (ပီတႆး 2107)။ ပွၵ်ႈၵမ်းသွင်သမ်ႉ ၸတ်းႁဵတ်းတီႈတူၼ်ႈတီး မိူဝ်ႈပီ 2014 (ပီတႆး 2109)။ ပွၵ်ႈၵမ်းသၢမ် ပီ 2018 (ပီတႆး 2112) ၼႆႉသမ်ႉ တေၸတ်းႁဵတ်းတီႈဝဵင်းလႃႈသဵဝ်ႈ။

SHARE

LEAVE A REPLY

Please enter your comment!
Please enter your name here