ပႃႇတီႇႁူဝ်သိူဝ် ႁူပ်ႉထူပ်းၵူၼ်းမိူင်းတႆး သပ်းလႅင်းၼႄ လွင်ႈမၢႆမီႈမႂ်ႇ တီႈလိၼ်ဢၼ်လူင်ပွင်ၸိုင်ႈပိုၼ်ၽၢဝ်ႇ မိူဝ်ႈ ဝၼ်းတီႈ 30/10/2018 ၼၼ်ႉ ဝႃႈၼႆ။

ဝၼ်းတီႈ 05/12/2018 ၽူႈတႅၼ်းသၽႃးလႄႈ ပႃႇတီႇႁူဝ်သိူဝ် ၸႄႈဝဵင်းတၢင်ႉယၢၼ်း ႁူပ်ႉထူပ်းၵူၼ်းမိူင်းသပ်းလႅင်း လွင်ႈ မၢႆမီႈတီလိၼ် ဢၼ်လူင်ပွင်ၸိုင်ႈပိုၼ်ၽၢဝ်ႇဝႆႉ မႂ်ႇမႂ်ႇၼၼ်ႉ ၶႆႈၼႄၽွၼ်းလီ/ ၸႃႉ ၸူးပေႃႈမႄႈၵူၼ်းမိူင်း။ တီႈ ဢိူင်ႇမိူင်းတွမ်း ၸႄႈဝဵင်းတၢင်ႉယၢၼ်း ၸႄႈတွၼ်ႈလႃႈ သဵဝ်ႈ ၸိုင်ႈတႆးပွတ်းႁွင်ႇ မီးၵူၼ်းမိူင်းၶဝ်ႈႁူမ်ႈထွမ်ႇငိၼ်း 200 ပၢႆ ဝႃႈၼႆ။

ၸၢႆးပႃႉ ၽူႈပွင်ၵၢၼ် ပႃႇတီႇႁူဝ်သိူဝ် ၸႄႈဝဵင်းတၢင်ႉယၢၼ်း လၢတ်ႈတီႈၽူႈတွႆႇႁွၵ်ႈဝႃႈ “ ပႃႇတီႇႁဝ်း လူင်းသပ်းလႅင်း ၼႄ ၵဵဝ်ႇၵပ်းပၵ်းပိူင် ၸႂ်ႉတီႈလိၼ် ဢၼ်ၶဝ်မၵ်းမၼ်ႈ တီႈလိၼ်ပဝ်ႇ လိၼ်လၢပ်ႈ လိၼ်မိူင်း ၸွမ်းၼင်ႇမၢႆမီႈ 2012 ၼၼ်ႉ။ ၵမ်းၼႆႉ ၶဝ်ၶိုၼ်းမႃးမႄးသေ မၵ်းမၼ်ႈဝႆႉ မၢႆမီႈဢၼ်ပႃးတူတ်ႈတၢမ်ႇၸွမ်း သင်ဝႃႈ ၵူၼ်းမိူင်းႁဝ်း ဢမ်ႇတၢင်ႇ ယွၼ်းသေ ႁဵတ်းၵိၼ်ၵႂႃႇၸွမ်းပၵ်းၵဝ်ႇပိူင်ၵဝ်ႇၸိုင် တီႈလိၼ်ႁဝ်းၸၢင်ႈၶဝ်ႈသၢႆမၢႆ လိၼ်ပဝ်ႇ လိၼ်လၢပ်ႈ လိၼ်မိူင်း သေ ၸၢင်ႈၺႃးတၢမ်ႇၶွၵ်ႈ 2 ပီ၊ တၢမ်ႇငိုၼ်း 5 သႅၼ်ပျႃး။ ယွၼ်ႉၼၼ်လႄႈ ၼင်ႇႁိုဝ် ပေႃႈမႄးၵူၼ်းမိူင်း ႁဝ်းလႆႈႁပ်ႉ ႁူႉၵၼ်သေ ႁႂ်ႈၵူၼ်းမိူင်းႁဝ်းထုၵ်ႇလီႁဵတ်းၸိူင်ႉႁိုဝ် ၸဵမ်ၸိူဝ်းၼႆႉ” ဝႃႈၼႆ။

ပၵ်းပိူင်တီလိၼ်ပဝ်ႇ လိၼ်လၢပ်ႈ လိၼ်မိူင်းၼႆႉ ယူႇတီႈလူင်ပွင်ၸိုင်ႈမိူင်းႁူမ်ႈတုမ် မၵ်းမၼ်ႈ မိူဝ်ႈဝၼ်းတီႈ 11/09/2018 ထိုင်မႃး ဝၼ်းတီႈ 30/10/2018 သမ်ႉ လူင်ပွင်ၸိုင်ႈပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်မႃး ဝႃႈၼႆ။

ၸၢႆးပႃႉ သိုပ်ႇလၢတ်ႈဝႃႈ “ ဢၼ်ဝႃႈ ႁႂ်ႈၵူၼ်းမိူင်းႁဵတ်းဝႂ်တီႈလိၼ် ဢမ်ႇႁဵတ်းႁႃႉဢၼ်ဝႃႈၼၼ်ႉ မၼ်းယူႇတီႈၵၢင်ၸႂ် ၵူၼ်းမိူင်းႁဝ်းၵူၺ်းၶႃႈ ပေႃးႁဝ်းႁဵတ်း ၽိုၼ်ဝႂ် 7 (ပုံစံ ၇) ၼႆႉ ႁဝ်းမီးသုၼ်ႇၸိူင်ႉႁိုဝ် (မိူၼ်ၼင်ႇ ႁဝ်းမီးသုၼ်ႇပဵၼ် ၸဝ်ႈၶွင်လိၼ် လႆႈၸိူင်ႉႁိုဝ်၊ ၵမ်ႉလႆႈ၊ ၶၢႆလႆႈ ဢၼ်ၼိုင်ႈ မၼ်းမီးၽွၼ်းလီၸိူင်ႉႁိုဝ်)။ ပေႃးႁဝ်းဢမ်ႇႁဵတ်း ႁဝ်းၸၢင်ႈမီးတၢမ်ႇၸိူင်ႉ ႁိုဝ် ဢၼ်ၼႆႉတႄႉ မိူၼ်ၸိူင်ႉၼင်ႇဝႃႈ ၸိူဝ်းႁဵတ်းလႆႈ ဢမ်ႇႁဵတ်းလႆႈၼၼ်ႉတႄႉ မၼ်းယူႇတီႈၵၢင်ၸႂ်ၵူၼ်းမိူင်းႁဝ်း ဢမ်ႇၸၢင်ႈလၢတ်ႈၽႂ်လႆႈ ႁဵတ်းဢမ်ႇႁဵတ်း ဢၼ်ဝႃႈၼၼ်ႉ ႁဝ်းတမ်းၼႄ ၽွၼ်းလီၽွၼ်းၸႃႉမၼ်း” ဝႃႈၼႆ။

“ထႅင်ႈလွင်ႈၼိုင်ႈ ယူႇတီႈငဝ်ႈငုၼ်းႁဝ်း ပႃႇတီႇႁူဝ်သိူဝ် ပၼ်လူင်းမႃး တႃႇၵဵပ်းၶေႃႈမုလ်း မိူၼ်ၼင်ႇ လိၼ်ႁႆႈ မီးၵႃႈႁိုဝ်၊ လိၼ်ၼႃး မီးၵႃႈႁိုဝ်၊ ဢၼ်ႁဝ်းႁဵတ်းၵိၼ်ၼႆႉ ၸွင်ႇႁဝ်းမီး (ပုံစံ ၇)၊ ၸွင်ႇမီးဝႂ်ၵမ်ႉထႅမ်သင်၊ ထႅင်ႈလွင်ႈၼိုင်ႈသမ်ႉ ၵဵဝ်ႇ လူၺ်ႈ ဢၼ်လူင်ပွင်ၸိုင်ႈမၵ်းမၼ်ႈၵႂႃႇ တီႈလိၼ် 2018 ၼႆႉ ၸွင်ႇၵူၼ်းမိူင်းႁဝ်းၶႃႈ လႆႈၸႂ်ႁႃႉ၊ ဢမ်ႇလႆႈၸႂ်ႁႃႉ ပဵၼ် ၸိူင်ႉႁိုဝ် ၸဵမ်ၸိူဝ်းၼႆႉ” ဝႃႈၼႆ။

ပႃႇတီႇႁူဝ်သိူဝ် ၸႄႈဝဵင်းတၢင်ႉယၢၼ်းၼႆႉ တႄႇႁူပ်ႉထူပ်းၵူၼ်းမိူင်း သပ်းလႅင်းၼႄ မၢႆမီႈတီႈလိၼ် ဢွၵ်ႇမႂ်ႇ ၼႆႉ ၼႄ ၵူၼ်းမိူင်းမႃး တႄႇဢဝ် ႁူဝ်လိူၼ်ၻီႊသႅမ်ႊၿိူဝ်ႊမႃး တႃႇၶၢဝ်းတၢင်း 1 လိူၼ်။ လိူဝ်ၼၼ်ႉဢမ်ႇၵႃး ၼႂ်းၸိုင်ႈ တႆးပတ်း ပိုၼ်ႉၵေႃႈ ယူႇတီႈပႃႇတီႇႁူဝ်သိူဝ်သေ တေလူင်းသပ်းလႅင်းၼႄ ၵူၼ်းမိူင်းၵႂႃႇၵူႈၸႄႈဝဵင်း ဝႃႈၼႆ။

လွင်ႈမၢႆမီႈတီႈလိၼ် 2018 ဢွၵ်ႇမႂ်ႇၼႆႉ ယူႇတီႈတၢင်းၾၢႆႇလူင်ပွင်ၸိုင်ႈ ပိုၼ်ၽၢဝ်ႇဝႆႉ ၼႂ်းၶၢဝ်းတၢင်း 6 လိူၼ် ႁႂ်ႈ ဢွၼ် ၵၼ်ၵႂႃႇတၢင်ႇႁႂ်ႈယဝ်ႉ ဝႃႈၼႆ။