ၸုမ်းယိပ်းၵွင်ႈ ၼႂ်းၸိုင်ႈတႆးပွတ်းႁွင်ႇ ၶဵင်ႈၶႅင်ၵၢၼ်သိုၵ်းတေႃႇၵၼ် ၵူၼ်းမိူင်းၼႂ်းသီႇပေႃႉ လႆႈပၢႆႈသိုၵ်းၼမ်လိူဝ်မႃး ဝၼ်းယဝ်ႉဝၼ်း မိူဝ်ႈၼႆႉ မီးၸမ်ထိုင်ႁဵင်ၵေႃႉယဝ်ႉ ဝႃႈၼႆ။
ဝၼ်းတီႈ 04/12/2018 ယၢမ်းဝၢႆးဝၼ်း 4:30 မူင်းၼၼ်ႉ ၵူၼ်းဝၢၼ်ႈၵုင်းသေႃႉ တင်း ဝၢၼ်ႈၶၢႆးႁဵဝ်း ဢွၼ်ၵၼ်ပၢႆႈ ဢွၵ်ႇ မႃး ႁွတ်ႈၽႅဝ်တီႈဝတ်ႉဝိႁၢရ်ၼွင်ၵေႃႈ ဢိူင်ႇၼမ်ႉလၼ်း ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ။ ယွၼ်ႉၼႂ်းပိုၼ်ႉတီႈ ၸုမ်းယိပ်းၵွင်ႈၵၢင်ႇ ၼင်ႇၵၼ် ပဵၼ်ပၢင်တိုၵ်းၵၼ်လႄႈ ၶဵင်ႇၶႅင်ၵၢၼ်သိုၵ်းတေႃႇၵၼ် ဝၼ်းယဝ်ႉဝၼ်း ဝႃႈၼႆ။
ၽူႈၸွႆႈထႅမ် ၵူၼ်းပၢႆႈၽေးသိုၵ်း သီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈဝႃး ၵူၼ်းဝၢၼ်ႈၵုင်းသေႃႉ တင်း ဝၢၼ်ႈ ၶၢႆးႁဵဝ်း ပၢႆႈဢွၵ်ႇမႃးထႅင်ႈ လင် 15 လင် ႁူဝ်ၵူၼ်း 54 ၵေႃႉ။ တေႃႈလဵဝ် ဢွင်ႈတီႈၵူၼ်းပၢႆႈတိူဝ်းလိူဝ်မႃးထႅင်ႈ တီႈၼိုင်ႈ တီႈဝတ်ႉၼွင်ၵေႃႈ” ဝႃႈၼႆ။
တေႃႈလဵဝ် ဢွင်ႈတီႈၵူၼ်းပၢႆႈၽေးသိုၵ်း ဢၼ်မႃးသွၼ်ႈယူႇသဝ်းသမ်ႉ တီႈဝတ်ႉၶၢႆးႁဵဝ်း လင်ႁိူၼ်း 80 လင်၊ ၸၢႆး 188 ၵေႃႉ၊ ယိင်း 177 ၵေႃႉ ႁူမ်ႈၵၼ် 365 ၵေႃႉ၊ တီႈဝတ်ႉဝၢၼ်ႈၸၢၼ်းသမ်ႉ လင်ႁိူၼ်း 101 လင်၊ ၸၢႆး 173 ၵေႃႉ၊ ယိင်း 226 ၵေႃႉ ႁူမ်ႈၵၼ် 399 ၵေႃႉ၊ တီႈဝတ်ႉဝၢၼ်ႈၸၢၼ်း (ပူႇတႃႇ) လင်ႁိူၼ်း 15 လင်၊ ၸၢႆး 27 ၵေႃႉ၊ ယိင်း 25 ၵေႃႉ ႁူမ်ႈၵၼ် 52 ၵေႃႉ၊ တီႈဝတ်ႉၼွင်ၵေႃႈ သမ်ႉ လင်ႁိူၼ်း 15 လင်၊ ၸၢႆး 18 ၵေႃႉ၊ ယိင်း 36 ၵေႃႉ ႁူမ်ႈၵၼ် 54 ၵေႃႉ ႁူမ်ႈၵၼ် တင်း မူတ်း ႁူဝ်ၵူၼ်း မီး 870 ၵေႃႉ။
တႄႇဢဝ် ႁူဝ်လိူၼ်ၼႆႉမႃး ၵူၼ်းဝၢၼ်ႈဢၼ်လႆႈပၢႆႈၽေးသိုၵ်းဢွၵ်ႇမႃးသမ်ႉ ပဵၼ်ဝၢၼ်ႈၶၢႆးႁဵဝ်း၊ ဝၢၼ်ႈၸၢၼ်း၊ ဝၢၼ်ႈ ၶုမ်ႇ၊ ဝၢၼ်ႈၼႃး၊ ဝၢၼ်ႈၵွင်းဝဵင်း၊ ဝၢၼ်ႈၼႂ်းလူင်လႄႈ ဝၢၼ်ႈသေႃႉ ၸိူဝ်းၼႆႉ။
ၵဵဝ်ႇလူၺ်ႈလွင်ႈၵူၼ်းမိူင်း လႆႈဢွၼ်ၵၼ်ပၢႆႈဢွၵ်ႇမႃးသမ်ႉ ယွၼ်ႉသိုၵ်းၸုမ်းယိပ်းၵွင်ႈၵၢင်ႇၼင်ႇၵၼ် ပဵၼ်ပၢင်တိုၵ်း ၵၼ် သေဢမ်ႇၵႃး တပ်ႉသိုၵ်းလူင်ပွင်ၸိုင်ႈမၢၼ်ႈ ၵေႃႈထႅမ်ႁႅင်းသိုၵ်းတူင်ႉၼိုင် ဢိူမ်ႈၸမ်ၸွမ်း ၸိူဝ်းဢၼ်ပဵၼ်ပၢင် တိုၵ်း ၸွမ်းၼႂ်းၸႄႈဝဵင်းသီႇပေႃႉ ၸိူဝ်းၼၼ်ႉ ၵူၼ်းပိုၼ်ႉတီႈၵေႃႉၼိုင်ႈလၢတ်ႈၼင်ႇၼႆ။
တၢင်းပွတ်းဢိူင်ႇၼႃးမၢၵ်ႇၶေႃ ၸႄႈဝဵင်းသီႇပေႃႉၼႆႉ မီးတပ်ႉသိုၵ်းလူင်ပွင်ၸိုင်ႈမၢၼ်ႈ၊ SSPP လႄႈ သိုၵ်း RCSS တူင်ႉၼိုင်ၵႂႃႇမႃးယူႇတႃႇသေႇ၊ ပေႃးသိုၵ်းတႆးသွင်ၸုမ်း ၶဵင်ႈၵၢၼ်သိုၵ်းၵၼ် ႁၢဝ်ႈႁႅင်း သိုၵ်းလူင်ပွင်ၸိုင်ႈမၢၼ်ႈ ၶႅၼ်း ၽိူမ်ႉထႅမ်ႁႅင်းသိုၵ်းယဝ်ႉ ဝႃႈၼႆ။
