လုၵ်ႈမေး လုင်းမူၼ်း (ၽူႈတႅၼ်းၵဝ်ႇ) ယုၵ်ႉတီႈလိၼ်လူႇ တႃႇသၢင်ႈႁူင်းႁဵၼ်း

လုၵ်ႈမေး မုင်ႉႁေႃႁိူၼ်း လုင်းၸၢႆးမူၼ်း ၽူႈတႅၼ်းသၽႃးၵူၼ်းမိူင်းၵေႃႉၵဝ်ႇ (ဢၼ်လူႉသဵင်ႈၵႂႃႇ 5/12/2018 ၼၼ်ႉ) ယုၵ်ႉတီႈလိၼ် 4 ဢေႊၶိူဝ်ႊ မွပ်ႈလူႇ တၢၼ်းတႃႇၵေႃႇသၢင်ႈႁူင်းႁဵၼ်းတူင်ႇၵူၼ်းတႆး မၢႆတွင်းဝၼ်းလုင်းမူၼ်း လူႉ သဵင်ႈတဵမ်ပီ။

ဝၼ်းတီႈ 05/12/2018 မုင်ႇႁေႃႁိူၼ်း လႄႈ ပီႈၼွင်ႉ ၼႂ်းဝဵင်းလၢႆးၶႃႈ ႁူမ်ႈၵၼ် လူႇတၢၼ်း ၵၢပ်ႇသွမ်းသင်ၶၸဝ်ႈ တီႈ ႁိူၼ်းလုင်းမူၼ်း ၸႄႈဝဵင်းလၢႆးၶႃႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း။ လိူဝ်ၼၼ်ႉ တႃႇမၢႆတွင်းဝၼ်းလုင်း မူၼ်းလူႉသဵင်ႈ ၶွပ်ႈတဵမ်ၼိုင်ႈပီသေ ယုၵ်ႉဢဝ်တီႈလိၼ် တႃႇ 4 ဢေႊၶိူဝ်ႊမွပ်ႇလူႇတၢၼ်းပၼ် တီႈၵေႃႇမတီႇ ႁူင်း ႁဵၼ်း တူင်ႇၵူၼ်းတႆး ဝႃႈၼႆ။

ၸၢႆးလႅင်းႁိူင်း ၽူႈပွင်ၵၢၼ် ၼႂ်းၵေႃႇမတီႇႁူင်းႁဵၼ်းတူင်ႇၵူၼ်းတႆး ဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၼႆႉ ပဵၼ်ဝၼ်း လုင်းမူၼ်း ၶွပ်ႈတဵမ် လူႉသဵင်ႈ ၼိုင်ႈပီ ယူႇတီႈမုင်းႁေႃႁိူၼ်း လုင်းမူၼ်း ၵၢပ်ႈသွမ်းသင်ၶၸဝ်ႈ။ ယဝ်ႉၵေႃႈ မွပ်ႈယိုၼ်ႈပၼ်တီႈလိၼ် တႃႇ 4 ဢေႊၶိူဝ်ႊ တီႈၵေႃႇမတီႇႁူင်းႁဵၼ်းတူင်ႇၵူၼ်းတႆးႁဝ်းၶႃႈ။ ႁဝ်းၶႃႈ လႆႈလၢတ်ႈဝႆႉ တီႈ ၾၢႆႇတႅၵ်ႈၼႃႈလိၼ်ၶဝ် ႁႂ်ႈမႃးတႅၵ်ႈပၼ် ႁႂ်ႈပေႃးႁၼ်ၶွပ်ႇလႅၼ်တီႈလိၼ်၊ ၵူၺ်းၵႃႈ တေပဵၼ်တႅၵ်ႈမိူဝ်ႈလႂ် ပႆႇႁူႉ။ မိူဝ်ႈ ၼႆႉတႄႉ ႁဝ်းဢွၼ်ၵၼ်ၵႂႃႇတီႇၽဵဝ်ႈလုမ်းလႃး တီႈၶုမ်လုင်းမူၼ်းႁဵတ်းၼၼ်” ဝႃႈၼႆ။

တီႈလိၼ်ၼႆႉ တၢင်းၵႂၢင်ႈ လႄႈ တၢင်းယၢဝ်း ပၼ်ႇမူၼ်း တေမီး 14 ဢေႊၶိူဝ်ႊ ပဵၼ်တီႈၶွင်လုင်းမူၼ်း ၽူႈတႅၼ်း သၽႃးၵူၼ်း မိူင်းၵေႃႉၵဝ်ႇ။ ယူႇတီႈလုၵ်ႈမေးလုင်းမူၼ်း လႆႈယုၵ်ႉလူႇတႃႇမၢႆတွင်းလုင်းမူၼ်း လူႉသဵင်ႈၶွပ်ႈတဵမ် 1 ပီ တႃႇတီႈလိၼ် 4 ဢေႊၶိူဝ်ႊ။ တွၼ်ႈတႃႇ တီႈလိၼ်ထႅင်ႈ 10 ဢေႊၶိူဝ်ႊၼၼ်ႉ ယူႇတီႈၵေႃႇမတီႇႁူင်းႁဵၼ်း တူင်ႇၵူၼ်း တႆးတေသိုဝ်ႉဢဝ်။

တီႈလိၼ်ၼႆႉ မီးတၢင်းၾၢႆႇၸၢၼ်းဝဵင်းလၢႆးၶႃႈ တီႈပွၵ်ႉ 4 တိတ်းၸပ်း ၾင်ႇၼမ်ႉတွင်း။ 1 ဢေႊၶိူဝ်ႊလႂ် လႆႈသိုဝ်ႉ 10 သႅၼ်ပျႃး တေႃႈလဵဝ် ယူႇတီႈၵေႃႇမတီႇႁူင်းႁဵၼ်း လႆႈပၼ်ဝႆႉငိုၼ်း မိူဝ်ႈဝၼ်းတီႈ 2 လိူၼ်ၼႆႉ 20 သႅၼ်ပျႃးၵူၺ်း ၵိုတ်း ထႅင်ႈ 80 သႅၼ်ပျႃး ဢၼ်လူဝ်ႇလႆႈပၼ်ထႅင်ႈ ဝႃႈၼႆ။

ၸၢႆးၵျေႃႇၸေႇယ ၽူႈတႅၼ်းသၽႃးၸႄႈမိူင်း ဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈ တေသိုဝ်ႉတီႈလိၼ် ဢွၼ်တၢင်း ယဝ်ႉၵေႃႈ တေလွမ်ႉႁူဝ်ႉ ႁဵတ်းႁူဝ်ႉၵွၼ်ႇ တင်းမူတ်း ပေႃးသွၼ်ႇပႃး ၵႃႈသိုဝ်ႉတီႈလိၼ် ႁဵတ်းႁူဝ်ႉၼႆႉ ႁဝ်းၶႃႈလူဝ်ႇငိုၼ်း 130-140 သႅၼ်ပျႃး မွၵ်ႈၵႃႈၼႆႉ။ ဢၼ်ၼႆႉတႄႉ ပဵၼ်တႃႇသိုဝ်ႉတီႈလိၼ်ၵူၺ်း တႃႇၵေႃႇၵၢႆႇ ႁဵတ်း ႁူင်းႁဵၼ်းတႄႉ ပႆႇပႃး။ တေလႆႈဝႃႈတေႃႈလဵဝ်ၼႆႉ ႁဝ်းၶႃႈၶၢတ်ႇဝႆႉလွင်ႈငိုၼ်းတွင်းယူႇ တိုၵ်ႉလူဝ်ႇတၢင်းၸွႆႈထႅမ် လွင်ႈ ငိုၼ်းတွင်းထႅင်ႈယူႇ” ဝႃႈၼႆ။

သင်ဝႃႈ ၵေႃႉလႂ် ၽူႈမီးၼမ်ႉၸႂ်ၸေႇတၼႃႇ ၶႂ်ႈၵမ်ႉထႅမ် တွင်ႈထၢမ် လၢႆးႁူဝ်ယွႆႈမၼ်းၼႆၸိုင် ၵပ်းသိုပ်ႇလႆႈတီႈ မၢႆ ၾူၼ်း ၸၢႆးၵျေႃႇၸေႇယ ၽူႈတႅၼ်ႈသၽႃးၸႄႈမိူင်းလၢႆးၶႃႈ 094-28310035, ၸၢႆးသူႉ (မေႃမိုဝ်း) 097-74493771, ၸၢႆးယွတ်ႈၾႃႉ 097-74984261 ၸိူဝ်းၼႆႉ။